Read Batak Karo 2 KORINTI 9 Bible Online

2 KORINTI 9 - Batak Karo bible

2 KORINTI 9

¹Si tuhuna labo perlu kusuratken kerna penampat si isehken man kalak Kristen si sangana i bas kekurangen e.

²Kueteh maka ersuruh nge ukurndu guna nampati, janah kupujiken pe kam i tengah-tengah kalak Makedoni enda. Kukataken man bana, “Senina-senina si i propinsi Akaya tahun nderbih kin enggo sikap nampati.” Janah erkiteken ketutusenndu e teremen i bas ia enggo keke ukurna.

³Aminna pe bage isuruh kami ka nge senina-senina enda, gelah kai si enggo ipujiken kami kerna kam la sia-sia. Dage bagi si enggo kukataken e, sikap dage kam.

⁴Adi lang, maka adi reh kalak Makedoni ras aku janah idapeti kami kam la sikap, tentu mela iakap kami, apai denga ka kam -- sabap tek kal kami man bandu.

⁵E maka perlu kuakap mindo kempak senina-seninanta enda berkat leben asa aku ndahi kam gelah isikapkenna leben perkuah ate si enggo ipadankenndu e. Adi enggo pagi leben sikap perkuah atendu e, bekas ukurndu meriah kap e, labo erkiteken terpaksa.

⁶Inget lah maka kalak si sitik ngerdangken benih, sitik ka iperanina; kalak si melala ngerdangken benih, melala ka iperanina.

⁷Sekalak-sekalak iberekennalah sue ras si enggo itetapkenna i bas ukurna; ola alu pusuh jungut-jungut tah pe bagi si terpaksa, sabap Dibata engkelengi kalak si mere alu ukur meriah.

⁸Dibata ngasup mereken man bandu kasakai pemereNa alu sampur. Alu bage kerina keperlun guna dirindu i bas kai pe icukupi, seh maka sampur pe guna banci kam ndahiken dahin-dahin si mehuli si apai pe.

⁹Kerna kalak si bage lit tersurat i bas Pustaka Si Badia, “Enggo iambur-amburna pemerena man si musil, kiniulinna e tahan seh rasa lalap.” [22†]

¹⁰Dibata si nikapken benih man kalak si merdang bage pe nakan si man pangan. IA pe si nikapken benih si iperlukenndu. IA ka nge si peturah benih e dingen si mereken ulih si erlipat ganda i bas kiniulinndu e nari. [23†]

¹¹Dibata erbahanca kam bayak i bas kai pe, seh maka kam melumbar mere katawari pe, janah nterem kalak ngataken bujur man Dibata erkiteken pemerendu si ialokenna bekas pendahin kami.

¹²Sabap penampat si ipersembahkenndu e labo saja encukupi keperlun kalak Kristen si lit i bas kekurangen, tapi pe sampur jadi pengataken bujur man Dibata.

¹³Kam ngaku maka patuh kam nandangi Berita Si Meriah kerna Kristus. Pengakunndu e payo adi teridah kam menang i bas soal nampati. Janah erkiteken penampatndu e, nterem me pagi kalak muji Dibata. Tole pe ipujina Dibata erkiteken persadanndu si enteguh e, si teridah man bana ras man kerina kalak Kristen si deban.

¹⁴Itotokenna pe kam alu dem keleng ate, nginget lias ate Dibata si la tersipati si seh man bandu.

¹⁵Bujur ninta man Dibata kerna pemereNa si la terkataken nari uga ulina.