Read Batak Karo JOSUA 1 Bible Online

JOSUA 1 - Batak Karo bible

JOSUA 1

¹Kenca mate Musa, suruh-suruhen TUHAN e, ngerana TUHAN man Josua anak Nun pembantu Musa.

²Nina, “Suruh-suruhenKu Musa enggo mate. Ersikap lah kam genduari ras kerina kalak Israel, jenari keparilah Lau Jordan lako mengketi negeri si Kubereken man bana.

³Bagi si enggo Kukataken man Musa, enggo Kubereken man bandu ras bangsangKu kerina taneh si idalanindu pagi. [1†]

⁴Baleng daerahndu e mulai i gurun pasir nari arah Selatan terus ku deleng-deleng Libanon i Utara; i Lau Eprat si mbelin nari arah Timur, arah tengah-tengah negeri Heti, terus ku Lawit Tengah i Barat.

⁵O, Josua, ise pe la ngasup naluken kam kidekah kam nggeluh. Aku ras kam bagi Aku enggo ras Musa. Aku tetap ras kam, la ndigan pe kam Kutadingken. [2†]

⁶Tetaplah ukurndu janah tek lah, sabap kam kap si minpin bangsa enda guna ndatken taneh si enggo Kupadanken man nini-ninina. [3†]

⁷Tetap lah ukurndu, tek lah. Janah inget! Ikutken kerina undang-undang si ibereken suruh-suruhenKu Musa man bandu. Sada bagin pe ola lupaken, maka ku japa pe kam lawes, jadi bagi sura-surandu.

⁸Bage pe ola kam lupa maka kitap undang-undang e arus tetap rusur iogeken i bas kebaktianndu. Pelajarilah e suari ras berngi, janah arus iperdiatekenndu maka kerina si tersurat i je ipatuhindu. Alu bage la banci la kam sangap janah seh sura-surandu.

⁹Inget maka enggo Kuperentahken man bandu gelah tetap ukurndu ras tek! Ola kam mbiar, ola aru atendu, sabap aku TUHAN Dibatandu, tetap ras kam ku japa pe kam lawes.”

¹⁰Kenca bage isuruh Josua peminpin-peminpin bangsa e, gelah lawes

¹¹niari ingan erkemah janah ngataken man bangsa e nina, “Sikapkenlah bekal, sabap telu wari nari ikeparindu Lau Jordan guna ngkuasai taneh si ibereken TUHAN Dibatandu man bandu.”

¹²Ikataken Josua man suku Ruben ras Gat ras man setengah suku Manase nina, [4†]

¹³“Ingetlah kuga Musa, suruh-suruhen TUHAN e, enggo ngataken man bandu maka TUHAN Dibatandu mereken taneh si arah Timur Lau Jordan enda man bandu jadi inganndu tading.

¹⁴Ndeharandu, anak-anakndu, ras lembundu tading i jenda. Tapi tenterandu ola maba senjata guna erperang, leben ngepar asa senina-seninana bangsa Israel guna nampatisa,

¹⁵seh ikuasaina taneh si arah Barat Lau Jordan si enggo ibereken TUHAN Dibatandu man bana. Kenca iberekenNa keamanen man kerina suku Israel, banci kam mulih janah tading i negerindu jine i jenda, e me arah Timur Lau Jordan si ibereken Musa -- suruh-suruhen TUHAN e man bandu.”

¹⁶Nina kalak enda ngaloi man Josua, “Asa kai si ikatakenndu man kami banci idalanken kami, janah nggit kami lawes ku japa pe kami isuruhndu.

¹⁷Nggit kami patuh man bandu, bali ras perpatuh kami man Musa. TUHAN Dibatandulah si nemani kam bali ras penemaniNa Musa.

¹⁸Ise si la nggit ngakui kuasandu, ntah pe la patuh man perentahndu la banci la ibunuh. Tetap lah ukurndu janah tek lah!”