Read Batak Karo JOSUA 10 Bible Online

JOSUA 10 - Batak Karo bible

JOSUA 10

¹Ibegi Adonisedek, raja Jerusalem, maka kuta Ai enggo italuken ras ihancurken Josua tuhu-tuhu. Rajana pe enggo ibunuh, bagi si enggo ibahanna man kuta Jeriho ras rajana. Enggo pe ibegina maka kalak Gibeon enggo erbahan perdamen ras bangsa Israel janah enggo ras ia tading.

²Perban e seh kal biarna penduduk Jerusalem sabap Gibeon e me sada kuta si mbelinna si lit rajana. Kuta e belinen asa kuta Ai, janah pendudukna kalak si beluh erperang.

³E maka itenahken Adonisedek me berita enda man Raja Hoham i Hebron nari, Raja Piran i Jarmut nari, Raja Japia i Lakis nari, ras man Raja Debir i Eglon nari nina,

⁴“Rehlah kam, sampati aku merang kuta Gibeon, sabap pendudukna enggo erbahan perdamen ras Josua ras bangsa Israel.”

⁵Raja Amori si lima enda: raja Jerusalem, raja Hebron, raja Jarmut, raja Lakis, raja Eglon, ipersadana gegehna; ikepungna Gibeon, jenari iserangna kuta e.

⁶Kalak Gibeon minter nehken berita man Josua ku ingan erkemah i Gilgal nina, “Ola min tadingken kam kami, bapa! Pedas lah kam reh, sampati kami! Selamatken kami! Kerina raja-raja kalak Amori i deleng nari enggo mpersada gegehna, lako merang kami!”

⁷E maka Josua ras kerina tenterana, ikut pasukenna si mbisana, berkat i Gilgal nari.

⁸Nina TUHAN man Josua, “Ola kam mbiar man kalak e. Enggo Kubereken man bandu kemenangen. La lit sada pe i bas ia nari si ngasup ertahan ngelawan kam.”

⁹Gedang-gedang berngi Josua ras tenterana erdalan i Gilgal nari ku Gibeon, jenari ibahanna sada serangen si rempet mahanca sengget kalak Amori.

¹⁰Gentar kalak Amori ibahan TUHAN ngidah tentera Israel. Nterem ia ibunuhi kalak Israel i Gibeon, jenari iayakina ia arah dalan ngincuah-ngincuah si mentasi Bet-Horon, janah terus iserangna seh ku Aseka ras Makeda i Selatan.

¹¹Sanga kalak Amori kiam ku berneh arah dalan e i bas tentera Israel nari, idabuhken TUHAN ku ia batu si galang bagi udan baho, la erpeltep gedang-gedang dalan seh ku Aseka. Buen ibunuh batu si bagi udan e asa si ibunuh kalak Israel jine.

¹²I bas warina TUHAN mereken kemenangen man bangsa Israel ngelawan kalak Amori, ngerana Josua man TUHAN, i lebe-lebe kalak Israel kerina nina Josua, “O matawari, ngadilah i babo Gibeon; o bulan, ngadilah i babo Baluren Ayalon.”

¹³Matawari ngadi ras bulan pe la miser seh bangsa e enggo naluken musuh-musuhna. Si enda isuratken i bas Kitap Kalak Bujur. Matawari ngadi i tengah-tengah langit janah la sundut gedang-gedang wari. [15†]

¹⁴La enggo pernah bage ope denga si e, janah kenca si e pe lanai enggo pernah jadi bagi si jadi i bas wari e, asum TUHAN ngikutken kata manusia. TUHAN erperang i pihak Israel!

¹⁵Kenca si enda, Josua ras tenterana mulih ku ingan erkemah i Gilgal.

¹⁶Tapi raja kalak Amori si lima enggo lompat jenari cebuni ia i bas gua i Makeda.

¹⁷Lit sekalak jumpa ras ia, jenari ikatakenna man Josua inganna cebuni.

¹⁸Nina Josua, “Gulingken batu si galang ku babah gua e. Tamaken piga-piga kalak si erjaga i je,

¹⁹tapi kam ola tading i je. Teruskenlah ayaki musuhndu jenari seranglah ia i pudi nari, ola pelepas ia bengket ku bas kutana! TUHAN Dibatandu enggo mereken kemenangen man bandu ngelawan musuhndu.”

²⁰Josua ras bangsa Israel munuhi kalak ndai, aminna gia lit sempat ndat ingan si aman i bas kutana si erbenteng janah la terbunuh.

²¹Kenca bage kerina tentera Josua mulihken ndahi ia alu selamat i bas ingan erkemah i Makeda. I belang-belang negeri e lanai lit ise pe si pang ncakapken si la mehuli kerna Israel.

²²Kenca bage nina Josua, “Talangi babah gua e jenari baba ndarat raja si lima e man bangku.”

²³E maka italangi me gua ndai, jenari raja-raja Jerusalem, Hebron, Jarmut, Lakis, ras Eglon ibaba ndarat,

²⁴ibaba man Josua. Jenari idilo Josua kerina kalak Israel ndahi ia janah iperentahkenna man kepala-kepala pasuken si enggo lawes ras ia gelah reh ndedeh kerahung raja-raja e. E maka bage me ibahanna.

²⁵Kenca bage nina Josua man kepala-kepala pasukenna, “Ola kam mbiar, ola aru atendu. Tetapkenlah ukurndu janah teklah sabap bagenda me ate TUHAN ibahanNa man kerina musuhndu.”

²⁶Jenari ibunuh Josua raja-raja ndai, igantungna i das lima batang kayu, i ja maitna gantung seh ben.

²⁷Kenca matawari sundut ibereken Josua perentah, e maka mait-mait raja ndai ipesusur janah ibenterken ku bas gua inganna cebuni ndai. Itamaken batu si galang i bas babah gua e, janah i je denga lalap.

²⁸I bas wari e Makeda ras rajana iserang ras italuken Josua. Ibunuhna tep-tep kalak si lit i bas kuta e; la lit sada pe itadingken nggeluh. Ibahanna man raja Makeda bagi si enggo ibahanna man raja Jeriho.

²⁹Enggo kenca dung si enda, Josua ras tenterana lawes i Makeda nari ku Lipna, jenari iserangna kuta e.

³⁰I bas kuta enda pe ibereken TUHAN kang kemenangen man kalak Israel. La lit sada pe ipelepasna nggeluh, tapi ibunuhna kerina kalak si lit i bas kuta e. Man rajana bali ibahanna ras kai si enggo ibahanna man raja Jeriho.

³¹Kenca si enda, Josua ras tenterana lawes i Lipna nari ku Lakis. Ikepungna kuta e jenari iserangna.

³²Kenca peperangen e erdalan dua wari, TUHAN mereken kemenangen man bangsa Israel ngelawan Lakis. I je pe bali ka nge ibahanna ras Lipna. La lit sada pe ipelepasna nggeluh, tapi ibunuhna kerina kalak si i bas kuta e.

³³Raja Horam i Geser nari reh nampati Lakis, tapi italuken Josua ia ras tenterana janah la lit sada pe itadingkenna nggeluh.

³⁴Seterusna, Josua ras tentera berkat i Lakis nari ku Eglon. Ikepungna kuta e jenari iserangna.

³⁵Italukenna kuta e i bas wari e kang janah ibunuhna kerina si lit i je, bali ras si enggo ilakokenna i Lakis.

³⁶Kenca si enda, Josua ras tenterana lawes i Eglon nari nangkeng ku Hebron, iserangna kuta e

³⁷jenari italukenna. Ibunuhna rajana ras kerina si lit i bas kuta e bage pe i bas kuta-kuta i sekelewetna. Ikernepken Josua kuta e seh getem tuhu-tuhu, bali ras si enggo ibahanna man Eglon. La lit sada pe itadingkenna nggeluh i bas kuta e.

³⁸Kenca bage Josua ras tenterana mulihken ku Debir jenari iserangna kuta e.

³⁹Italukenna kuta e ras rajana bage pe kerina kuta-kuta i sekelewetna. Ibunuhna kerina kalak si lit i je. Man Debir ras rajana pe bali ibahan Josua ras si enggo ibahanna man Hebron ras man Lipna ras rajana.

⁴⁰Kerina taneh e ikuasai Josua. Italukenna raja-raja si ringan arah deleng-deleng, arah rebe-reben si arah Timur, ras si i bas kendit si arah Barat, bage pe taneh si la lit launa i Selatan. La lit sada pe ipelepasna nggeluh. Kerina ibunuhna. Enda me kai si ipedahken TUHAN, Dibata Israel.

⁴¹Daerah si italuken Josua e mulai i Kades-Barnea nari i Selatan seh ku Gasa deher tepi lawit, bengket kerina daerah Gosen, bage pe terus ku Gibeon i Utara.

⁴²Kerina raja-raja enda ras tanehna italuken Josua sekali erperang saja ngenca sabap TUHAN, Dibata Israel, nampati Israel i bas peperangen e.

⁴³Kenca si enda kerina Josua ras tenterana mulih ku inganna erkemah i Gilgal.