Read Batak Karo JOSUA 11 Bible Online

JOSUA 11 - Batak Karo bible

JOSUA 11

¹Kenca berita kemenangen-kemenangen Israel seh man Raja Jabin i Hasor nari, itenahkenna Raja Jobap i Madon nari, raja-raja i Simron ras Aksap nari,

²bage pe raja-raja si erkuasa arah deleng-deleng i Utara, i Baluren Lau Jordan arah Selatan Dano Galilea, i uruk-uruk, ras i tepi lawit deher Dor.

³Itenahkenna pe kalak Kanaan si ringan arah Timur ras Barat Lau Jordan, e me kalak Amori, kalak Heti, kalak Peris, ras kalak Jebusi i deleng-deleng bage pe kalak Hewi si ringan i teruh Deleng Hermon i taneh Mispa.

⁴E maka reh raja-raja e ras kerina tenterana, teremna bagi kersik i tepi lawit. Kuda ras gereta perangna pe melala.

⁵Kerina raja-raja enda mpersada gegeh jenari ras-ras ia reh, ibahanna inganna erkemah i Lau Merom, gelah iperangna Israel.

⁶Nina TUHAN man Josua, “Ola kam mbiar. Pagi, kira-kira bagi genduari ka, enggo kubunuh ia kerina guna Israel. Arus ipengkarkenndu kudana jenari ciluk geretana.”

⁷E maka rempet iserang Josua ras tenterana kalak ndai i Lau Merom.

⁸Ibereken TUHAN kemenangen man bangsa Israel; iserang kalak Israel ia, iayak-ayakna seh ndauh ku Utara ku Misrepot Maim ras Sidon, janah ku Timur seh i Baluren Mispa. Pertempuren e la ngadi seh musuh e lanai sada pe tading nggeluh.

⁹Ibahan Josua man bana kai si enggo iperentahken TUHAN: ipengkarkenna kudana janah icilukna geretana.

¹⁰Kenca si e Josua, naluken kerajan Hasor, rajana ibunuhna. (Sanga si e Hasor me si megegehna i bas kerina kerajan e.)

¹¹Kerina kalak si i je ibunuhna; la lit sekalak pe ipelepasna nggeluh, janah kuta e iciluk.

¹²Kerina kuta e ras rajana italuken Josua, kerina kalak ibunuhna, sue ras si enggo ipedahken Musa, suruh-suruhen TUHAN e.

¹³Tapi kuta-kuta si ipajekken i das reruntuhen kuta si enggo jadi uruk la iciluk kalak Israel, seakatan Hasor si enggo kin iciluk Josua.

¹⁴Ibuat bangsa Israel kerina erta-erta ras lembu i bas kuta-kuta e jenari isimpanna man sikerajangenna. Tapi manusia kerina ibunuhna; la lit sekalak pe itadingkenna nggeluh.

¹⁵TUHAN enggo mereken pedahNa man Musa; Musa nehken pedah e man Josua, janah ipatuhi Josua pedah e kerina. Ilakokenna kerina si enggo ipedahken TUHAN man Musa.

¹⁶Ikuasai Josua kerina daerah si arah deleng-deleng ras si i teruh deleng, arah Utara ras Selatan, kerina daerah Gosen ras taneh si la lit launa arah Selatan Gosen, bage pe Baluren Lau Jordan.

¹⁷[17-18] Daerah e mulai i Deleng Halak nari i Selatan deher Edom, janah dauhna ku Utara seh ku Balgat, i Baluren Libanon arah Selatan Deleng Hermon. Ndekah Josua erperang ras raja-raja daerah enda, tapi italukenna kerina, jenari ibunuhna.

¹⁹Kuta Gibeon ngenca erbahan perdamen ras bangsa Israel, i je ringan kalak Hewi. Si debanna kerina italuken i bas peperangen.

²⁰TUHAN mahanca tetap ukurna ngelawan bangsa Israel maka ia iukum seh kernep gelah kerina ibunuh alu la ndatken perkuah ate. Enda me si enggo ipedahken TUHAN man Musa.

²¹Tupung e lawes Josua, ngeradasken seh keri manusia raksasa si igelari kalak Enak si ringan arah daerah deleng-deleng Hebron, Debir, Ahap, ras i bas kerina daerah deleng-deleng Juda ras Israel. Iradasken Josua ia kerina ras kuta-kutana.

²²Lanai lit kalak Enak si tading i taneh Israel, tapi piga-piga lit denga tading i Gasa, Gat, ras Asdot.

²³Ikuasai Josua kerina taneh e, bagi si enggo iperentahken TUHAN man Musa. Ibereken Josua taneh e man kalak Israel jadi sikerajangenna janah ibagi-bagikenna jadi piga-piga bagin, sada bagin man tep-tep suku. E maka bangsa e enggo banci pekesahken i bas peperangen nari.