Read Batak Karo JOSUA 13 Bible Online

JOSUA 13 - Batak Karo bible

JOSUA 13

¹Josua enggo metua kal genduari. Ikataken TUHAN man bana, nina, “Kam enggo metua kal, tapi mbelang denga taneh si man buaten.

²Kerina daerah Pilisti ras Gesur,

³bage pe kerina daerah Apim kempak Selatan. (Taneh si i bas Lau Sihor nari, i perbalengen Mesir, seh ku Utara ku perbalengen Ekron ianggap taneh kalak Kanaan; raja-raja kalak Pilisti ringan i Gasa, Asdot, Askelon, Gat, ras Ekron.)

⁴Negeri kalak Kanaan pe lit denga, ras Meara (sikerajangen kalak Sidon), seh ku Apek, i perbalengen kalak Amori;

⁵taneh kalak Gebal; kerina daerah Libanon kempak Timur, i Baalgat nari, e me si arah Selatan Deleng Hermon, ku dalan Hamat.

⁶Enda subuk kerina daerah kalak Sidon, si ringan i deleng-deleng kelang-kelang Deleng Libanon ras Misrepot Maim. Kupelawes ateKu bangsa-bangsa enda asum bangsa-bangsa e iserang bangsa Israel. Arus ibagi-bagikenndu taneh e sapih-sapih kalak Israel, bagi si enggo Kupedahken man bandu gelah ilakokenndu. [18†]

⁷Dage genduari, bagikenlah taneh e man si siwah suku nari ras setengah suku Manase, jadi sikerajangenna.”

⁸Suku Ruben ras Gat ras setengah i bas suku Manase enggo ngaloken taneh si ibereken Musa, suruh-suruhen TUHAN, man bana; taneh e arah Timur Lau Jordan. [19†]

⁹Daerahna seh ku Aroer (i tepi Baluren Arnon) ras kuta si i tengah baluren subuk pe taneh kendit i Medeba nari seh ku Dibon.

¹⁰Taneh e seh ku perbalengen Amon ras bengket kerina kuta-kuta si nai iperentah Sihon raja kalak Amori, si ringan i Hesbon.

¹¹I je bengket Gileat, daerah Gesur ras Maaka, kerina Deleng Hermon, ras kerina taneh Basan seh ku Saleka.

¹²I je bengket kerajan Raja Og, si perpudina i bas kalak Repaim, si erkuasa i Astarot ras Edrei. Musa enggo naluken bangsa-bangsa enda jenari ipelawesna ndarat.

¹³Amin bage gia, kalak Gesur ras Maaka la ipelawes bangsa Israel; ia tetap denga ringan i Israel.

¹⁴Man suku Lewi la lit ibereken Musa taneh, sue ras si enggo ipedahken TUHAN man Musa. Kalak Lewi arus ngaloken sikerajangenna sada bagin i bas persembahen si itutung i babo batar-batar man TUHAN Dibata Israel. [20†]

¹⁵Musa enggo mereken sada bagin taneh e man keluarga-keluarga i bas suku Ruben jadi sikerajangenna.

¹⁶Daerahna seh ku Aroer (i tepi Baluren Arnon) ras kuta si i tengah baluren e, subuk kendit-kendit i sekelewet Medeba.

¹⁷I je bengket Hesbon ras kerina kuta-kuta i kendit-kendit e, e me kap: Dibon, Bamot Baal, Bet Baalmeon,

¹⁸Jahas, Kedemot, Mepaat,

¹⁹Kiriataim, Sipma, Seretsahar si i das uruk-uruk i bas baluren e,

²⁰Betpeor, reben-reben Deleng Pisga, ras Bet Jesimot.

²¹I je kerina kuta-kuta si lit i bas kendit-kendit ras kerina kerajan Sihon raja kalak Amori, si ringan i Hesbon. Italuken Musa ia, bage pe pengulu-pengulu Midian: Ewi, Rekem, Sur, Hur, ras Reba. Kerina pengulu enda lit i teruh kuasa Raja Sihon, janah kalak e erdahin nampati raja e.

²²I bas kalak si ibunuh bangsa Israel e lit sekalak guru si beluh ngoge nasip, gelarna Bilham anak Beor.

²³Lau Jordan baleng suku Ruben arah Barat. Enda me kuta-kuta ras kuta-kuta si ibereken man keluarga i bas suku Ruben jadi sikerajangenna.

²⁴Man keluarga suku Gat pe enggo ibereken Musa sada bagin taneh e jadi sikerajangenna.

²⁵Daerahna bengket Jaser ras kerina kuta-kuta Gileat, setengah taneh Amon seh ku Aroer, si arah Timur Raba;

²⁶tanehna e mulai i Hesbon nari ku Ramat Mispa ras Betonim, i Mahanaim nari ku perbalengen Lodebar.

²⁷I bas Baluren Lau Jordan si ku je e me Bet Haram, Betnimra, Sukot, ras Sapon, sisa kerajan Raja Sihon i Hesbon nari. Balengna arah Barat e me Lau Jordan seh ku Dano Galilea i Utara.

²⁸Enda me kuta-kuta ras kuta-kuta si ibereken man keluarga suku Gat jadi sikerajangenna.

²⁹Musa enggo mereken sada bagin taneh e man setengah keluarga suku Manase jadi sikerajangenna.

³⁰Daerahna seh ku Mahanaim janah bengket kerina daerah Basan, e me kerina kerajan Raja Og, raja Basan, bage pe enem puluhna kuta-kuta Jair i Basan.

³¹I je bengket setengah taneh Gileat, bage pe Astarot ras Edrei, duana kuta kerajan Raja Og i Basan. Kerina si enda ibereken man setengah keluarga kesusuren Mahir anak Manase.

³²Bagenda me Musa magi-magiken taneh si arah Timur Jeriho ras Lau Jordan asum ia i Kendit Moap.

³³Tapi man suku Lewi la lit iberekenna taneh. Ikatakenna man suku e kerina maka sikerajangenna e me sada bagin i bas persembahen man TUHAN Dibata Israel. [21†]