Read Batak Karo JOSUA 14 Bible Online

JOSUA 14 - Batak Karo bible

JOSUA 14

¹Si tersurat arah teruh enda e me keterangen kerna kuga taneh Kanaan si arah Barat Lau Jordan ibagi-bagiken man sapih-sapih bangsa Israel. Imam Eleasar, Josua anak Nun, ras peminpin-peminpin keluarga i bas suku bangsa Israel magi-magiken taneh e man si nandangi ringan i je.

²Sue ras si enggo iperentahken TUHAN man Musa, daerah si siwah setengah suku arah Barat Lau Jordan itentuken alu erbahan tikam tanduk. [22†]

³[3-4] Taneh si arah Timur Lau Jordan enggo itentuken Musa man dua setengah suku si deban. (Kesusuren Jusup ibagi jadi dua suku: Manase ras Eperaim.) Tapi man kalak Lewi labo lit daerah ibereken Musa. Man bana ibereken kuta-kuta man inganna tading, bage pe mbalmbal guna lembuna ras biri-birina. [23†]

⁵Bangsa Israel magi-magiken taneh e sue ras si enggo ipedahken TUHAN man Musa.

⁶I bas sada wari piga-piga kalak i bas suku Juda nari reh ndahi Josua i Gilgal. Sekalak i bas ia nari e me Kalep anak Jepune, kalak Kenis, ngataken man Josua nina, “Tentu itehndu kai si ikataken TUHAN i Kades-Barnea man Musa suruh-suruhen Dibata e kerna kam ras aku. [24†]

⁷Umurku empat puluh tahun asum Musa, suruh-suruhen TUHAN, nuruh aku i Kades-Barnea nari jadi mata-mata ku taneh enda. Sanga mulih, kubereken laporen si payo man bana, [25†]

⁸sedang kalak si lawes ras aku ibahanna maka mbiar bangsanta. Tapi alu patuh aku tetap ngikutken TUHAN Dibatangku.

⁹Erkite-kiteken si e, ipadanken Musa man bangku maka anak-anakku ras aku la banci la ngaloken taneh si kudalani jadi sikerajangen kami. [26†]

¹⁰Tapi genduari, nehenlah enggo empat puluh lima tahun si enda ndai ikataken TUHAN man Musa. Tupung si e Israel sangana erdalan arah gurun pasir, janah sue ras si ipadanken TUHAN, ibereNa aku nggeluh seh asa genduari. Nehenlah aku! Genduari umurku enggo waluh puluh lima tahun.

¹¹Tapi gegehku bali denga nge ras asum aku isuruh Musa. Aku megegeh denga erperang ntahpe i bas dahin-dahin kai pe si deban.

¹²Dage genduari, berekenlah man bangku taneh deleng-deleng si enggo ipadanken TUHAN asum aku ras anak buahku ngelapor. Ikataken kami tupung e man bandu maka manusia raksasa si igelari kalak Enak, lit i je i bas kuta-kuta mbelin si ertembok. Mbera-mbera TUHAN ras aku, gelah kupelawes ia kerina, bagi si enggo ikatakenNa.”

¹³E maka ipasu-pasu Josua me Kalep anak Jepune jenari iberekenna man bana kuta Hebron jadi sikerajangenna.

¹⁴Seh asa genduari Hebron tetap denga sikerajangen kesusuren Kalep anak Jepune, kalak Kenis, sabap Kalep tetap patuh ngikutken TUHAN Dibata Israel.

¹⁵Ope denga si enda, Hebron igelari kuta Arba. (Arba e me si mbelinna i bas kalak Enak.) Genduari enggo dame negeri e.