Read Batak Karo JOSUA 16 Bible Online

JOSUA 16 - Batak Karo bible

JOSUA 16

¹Baleng Selatan taneh si itetapken man sikerajangen kesusuren Jusup mulai i Lau Jordan nari deherken Jeriho, i bas sada ingan arah Timur ulu lau kuta Jeriho, jenari terus ku gurun pasir. I kuta Jeriho nari nangkeng ku deleng-deleng seh ku Betel,

²i Betel nari terus ku Lus, mentasi terus ku Atarot Adar, i je ringan kalak Arki.

³Kenca bage terus ku Barat ku daerah kalak Japlet, kempak daerah Bet-Horon si arah berneh. I jenari terus ku Geser seh ku Lawit Tengah.

⁴Kesusuren Jusup, suku Eperaim ras Manase Barat ngaloken taneh enda jadi sikerajangenna.

⁵Enda me daerah keluarga kalak Eperaim: Balengna mulai Atarot Adar nari terus kempak Timur ku Bet-Horon si arah gugung janah

⁶i jenari baginna si arah Utara e me kap Mikmetat. Balengna e mbelok kempak Taanat Silo jenari terus erdalan mentasi ingan e arah Timur ku Janoa.

⁷Kenca bage i Janoa nari ngincuah ku Atarot ras ku Naara, seh ku Jeriho ngadi-ngadi i Lau Jordan.

⁸Balengna e mulai i Tapua nari ngikuti Lau Kana seh ku Lawit Tengah. Enda me taneh si ibereken man keluarga suku Eperaim jadi sikerajangenna,

⁹rikut pe ras piga-piga kuta ras dusun si lit i bas baleng-baleng daerah Manase, tapi ibereken man kalak Eperaim.

¹⁰Tapi la ipelawesna kalak Kanaan si ringan i Geser, e maka kalak Kanaan ringan i tengah-tengah kalak Eperaim seh sendah, tapi ia enggo ipaksa erdahin jadi budak. [27†]