Read Batak Karo JOSUA 18 Bible Online

JOSUA 18 - Batak Karo bible

JOSUA 18

¹Kenca ikuasaina negeri e, kerina perpulungen Israel pulung i Silo, jenari ipasangna Kemah Perjumpan ras TUHAN.

²Lit denga pitu suku i bas bangsa Israel si langa itetapken baginna i bas taneh e.

³E maka ikataken Josua man bangsa Israel nina, “Asa kai nari dekahna itimaindu maka kam lawes muat taneh si enggo ibereken TUHAN, Dibata nini-ninindu, man bandu?

⁴Berekenlah man bangku telu kalak i bas tep-tep suku nari. Ateku nuruh ia niari negeri e kerina guna erbahan peta daerah si mesikel ia muatsa jadi sikerajangenna. Kenca bage arus ia mulih ndahi aku.

⁵Taneh e ibagiken pagi jadi pitu bagin; suku Juda ringan i bas daerahna i Selatan, janah suku Jusup i bas daerahna i Utara.

⁶Suratkenlah keadan taneh si pitu bagin e jenari endesken man bangku. Kenca e kubahan pagi tikam tanduk guna meteh sura-sura TUHAN Dibatanta man bandu.

⁷Tapi kalak Lewi, la dat bagin i bas taneh e bagi kam kerina sabap baginna e me kap ndahiken dahin selaku imam TUHAN, sedangken suku Gat, Ruben, ras Manase Timur enggo ngaloken taneh na arah Timur Lau Jordan, si enggo ibereken Musa, suruh-suruhen TUHAN, man bana.”

⁸Jenari lawes me kalak ndai erbahan peta taneh e kenca enggo ibereken Josua man bana perentah-perentah enda, “Siari kerina taneh e, bahan petana, jenari mulihken kam ndahi aku. Janah kenca si e i Silo enda kusungkuni pagi sura-sura TUHAN man bandu alu erbahan tikam tanduk.”

⁹E maka lawes me kalak ndai niari kerina taneh e janah isuratkenna me kuga cara magisa jadi pitu bagin, alu erbahan daftar kerina kuta-kuta. Kenca bage mulihken ia ndahi Josua i bas ingan erkemah i Silo.

¹⁰Ibahan Josua tikam tanduk guna nungkun sura-sura TUHAN jenari man tep-tep suku Israel si tading denga, itetapkenna sada bagin si tertentu i bas taneh e.

¹¹Si pemena kal itetapken e me daerah si jadi sikerajangen keluarga i suku Benyamin. Cibal tanehna e kelang-kelang suku Juda ras Jusup.

¹²Arah Utara, balengna imulai i Lau Jordan nari janah kenca si e terus nangkeng arah rebe-reben si arah Utara Jeriho jenari kempak Barat arah tengah-tengah taneh deleng-deleng seh ku gurun pasir Bet-Awen.

¹³I jenari terus ku rebe-reben si arah bagin Selatan Lus (igelari ka pe Betel), kenca bage ngincuah ku Atarot Adar, i das deleng si arah Selatan Bet-Horon si arah berneh.

¹⁴Kenca si e nimpang ku ingan si deban, melok ku Selatan i bas bagin Barat deleng enda jenari terus ku Kiryat Baal (ntah pe Kiryat Jearim), si jadi sikerajangen suku Juda. Enda me balengna arah Barat.

¹⁵Balengna arah Selatan mulai i bas tepi Kiryat Jearim nari jenari terus ku ulu lau Neptoa.

¹⁶Kenca bage ngincuah ku ture-ture deleng si i babo Baluren Hinnom, i ujung Utara Baluren Repaim. Jenari terus ku Selatan arah tengah-tengah Baluren Hinnom, arah Selatan uruk Jebusi, kempak Enrogel.

¹⁷Jenari melok ku Utara ku Ensemes janah kenca e terus ku Gelilot, petala-tala ras Dalan Adumim. Balengna kenca si e ngincuah ku Batu Bohan (Bohan e me anak Ruben),

¹⁸jenari lewat arah Utara uruk si i babo Baluren Lau Jordan. I jenari ngincuah ku baluren e,

¹⁹mentas arah Utara uruk Bet-Hogela, jenari ngadi i bas Lawit Mate si arah Utara, ingan Lau Jordan malerken launa. Enda me balengna arah Selatan.

²⁰Lau Jordan e me balengna arah Timur. Enda me baleng-baleng taneh si ialoken keluarga i bas suku Benyamin jadi sikerajangenna.

²¹Kuta-kuta si man keluarga suku Benyamin e me: Jeriho, Bet-Hogela, Emek Kesis,

²²Bet-Araba, Semaraim, Betel,

²³Awim, Para, Opera,

²⁴Keparammoni, Opni, ras Geba, sepuluh dua kuta kerina, rikut pe ras kuta-kuta i sekelewetna.

²⁵Lit ka pe Gibeon, Rama, Beerot,

²⁶Mispa, Kepira, Mosa,

²⁷Rekem, Irpel, Tarala,

²⁸Sela, Haelep, Jebus, (ntahpe Jerusalem), Gibea, ras Kiryat Jearim; sepuluh empat kuta kerina, rikut pe ras kuta-kuta i sekelewetna. Enda me taneh si ialoken keluarga-keluarga i bas suku Benyamin jadi sikerajangenna.