Read Batak Karo JOSUA 20 Bible Online

JOSUA 20 - Batak Karo bible

JOSUA 20

¹Kenca bage TUHAN nuruh Josua [32†]

²gelah ikatakenna man bangsa Israel bagenda, “Tetapkenlah kuta benteng ingan terkelin sue ras si enggo Kuperentahken man bandu arah Musa.

³Kalak si munuh alu la sengaja banci lompat ku je nilahken kalak si erbalas atena.

⁴Banci ia kiam ku salah sada kuta enda, jenari lawes ku ingan runggu i bas dalan bengket ku bas kuta e, guna nuriken man peminpin-peminpin i bas kuta e, kai si enggo jadi. Kenca bage banci iberena ia bengket ku bas kuta e janah iberekenna man bana inganna tading, gelah banci ia ringan i je.

⁵Adi kalak si erbalas atena ndai ndarami ia ku je, penduduk kuta e la banci ngendeskenca man bana; la banci la ikawalina ia, sabap ia munuh labo alu sengaja janah labo erkite-kiteken nembeh atena.

⁶Banci ia ringan i bas kuta e seh ia iadili i tengah-tengah jelma si nterem janah seh kematen Imam si Mbelin tupung e. Kenca bage banci ia mulihken ku kutana, i ja nari ia enggo lompat mbarenda.”

⁷E maka, arah Barat Lau Jordan itetapken me kuta Kades i Galilea, i taneh deleng-deleng Naptali; Sikem, i taneh deleng-deleng Eperaim; ras Hebron, i taneh deleng-deleng daerah Juda.

⁸Arah Timur Lau Jordan, i bas gurun pasir si kendit si arah Timur Jeriho, itetapkenna kuta Beser i bas daerah Ruben; kuta Ramot i Gileat, i bas daerah Gat, ras kuta Golan i Basan, i bas daerah Manase.

⁹Enda me kuta benteng ingan terkelin si nitetapken man kerina bangsa Israel ras man kalak pertandang si ringan i tengah-tengahna. Tep-tep kalak si munuh alu la sengaja banci ndatken perlindungen i je gelah ola ia sempat ibunuh kalak si erbalas atena, ope denga ia iadili i tengah-tengah jelma si nterem.