Read Batak Karo JOSUA 21 Bible Online

JOSUA 21 - Batak Karo bible

JOSUA 21

¹Peminpin-peminpin keluarga kalak Lewi lawes njumpai Imam Eleasar, Josua, anak Nun, ras kepala-kepala keluarga i bas kerina suku-suku Israel,

²i kuta Silo i negeri Kanaan. Nina man bana kerina, “Enggo ipedahken TUHAN arah Musa maka man kami ibereken kuta-kuta jadi ingan kami tading, bage pe mbalmbal i sekelewet kuta-kuta e man ingan lembu kami.” [33†]

³E maka sue ras pedah TUHAN ibereken bangsa Israel tanehna man kalak Lewi piga-piga kuta ras mbalmbalna.

⁴Si pemena kal itetapken e me kuta-kuta si man keluarga kalak Lewi i bas terpuk Kohat. Keluarga kesusuren Imam Harun itetapken man bana sepuluh telu kuta i daerah Juda, Simeon, ras Benyamin.

⁵Man terpuk Kohat si deban, itetapken sepuluh kuta i daerah Eperaim, Dan, ras Manase Barat.

⁶Man terpuk Gerson itetapken sepuluh telu kuta i daerah Isakar, Aser, Naptali, ras Manase Timur.

⁷Man terpuk Merari itetapken sepuluh dua kuta i daerah Ruben, Gat, ras Sebulon.

⁸Alu erbahan tikam tanduk, bangsa Israel netapken kuta-kuta enda ras mbalmbal man kalak Lewi, sue ras si enggo iperentahken TUHAN arah Musa.

⁹Enda me gelar-gelar kuta i bas daerah Juda ras Simeon si ibereken

¹⁰man kesusuren Harun si lit i bas terpuk Kohat, kesusuren Lewi. Man bana me si pemenana itetapken.

¹¹Si ibereken man bana e me kuta Arba (Arba e me kap bapa Enak), genduari igelari Hebron, i taneh deleng-deleng daerah Juda, rikut pe ras mbalmbal i sekelewetna.

¹²Tapi mbalmbal kuta-kuta e ras kuta-kutana enggo leben ibereken jadi sikerajangen Kalep anak Jepuna.

¹³Tambah Hebron (salah sada kuta benteng keterkelinen), kuta-kuta si tersurat arah teruh enda itetapken man kesusuren Imam Harun: Lipna,

¹⁴Jattir, Estemoa,

¹⁵Holon, Debir,

¹⁶Ain, Juta, ras Bet-Semes, ras mbalmbalna; dage lit siwah kuta i bas suku Juda ras Simeon nari.

¹⁷I bas daerah Benyamin nari man bana ibereken empat kuta, e me: Gibeon, Geba,

¹⁸Anatot, ras Almon, ras mbalmbalna.

¹⁹Dage lit sepuluh telu kuta kerina ras mbalmbalna, ibereken man imam-imam, kesusuren Harun.

²⁰Man keluarga kalak Lewi si deban i bas terpuk Kohat itetapken piga-piga kuta i bas daerah Eperaim nari.

²¹Man bana ibereken empat kuta: Sikem ras mbalmbalna i taneh deleng-deleng Eperaim (e me kuta benteng keterkelinen), Geser,

²²Kibsaim, ras Bet-Horon, ras mbalmbalna.

²³I bas daerah Dan nari man bana ibereken empat kuta: Elteke, Gibeton,

²⁴Ayalon, ras Gatrimon, ras mbalmbalna.

²⁵I bas daerah Manase Barat nari man bana ibereken dua kuta: Taanak ras Gatrimon, ras mbalmbalna.

²⁶Keluarga-keluarga i bas terpuk Kohat enda ngaloken sepuluh kuta kerina, ras mbalmbalna.

²⁷Terpuk Gerson, e me perpulungen si deban i bas kalak Lewi, ngaloken dua kuta i bas Manase Timur nari: Golan i Basan (e sada kuta benteng keterkelinen) ras Bestera, ras mbalmbalna.

²⁸I bas daerah Isakar nari ialokenna empat kuta, e me: Kision, Daberat,

²⁹Jarmut, ras En-Ganim, ras mbalmbalna.

³⁰I bas daerah kalak Aser ialokenna empat kuta e me: Misal, Abdon,

³¹Helkat, ras Rehop, ras mbalmbalna.

³²I bas daerah Naptali nari ialokenna telu kuta, e me: Kedes i Galilea, ras mbalmbalna (e me kuta benteng keterkelinen), Hamot Dor, ras Kartan, ras mbalmbalna.

³³Jumlah kuta-kuta ras mbalmbalna si ialoken keluarga Gerson kerina lit sepuluh telu kuta.

³⁴Kalak Lewi selebihna e me, terpuk Merari, ngaloken empat kuta i bas daerah Sebulon nari: Jokneam, Karta,

³⁵Dimna, ras Nahalal, ras mbalmbalna.

³⁶I bas daerah Ruben nari ialokenna empat kuta e me: Beser, Jahas,

³⁷Kedemot, ras Mepaat, ras mbalmbalna.

³⁸I bas suku Gat nari ialokenna empat kuta, e me: Ramot i Gileat ras mbalmbalna (e me kuta benteng keterkelinen), Mahanaim,

³⁹Hesbon, ras Jaser, ras mbalmbalna.

⁴⁰Jadi man terpuk Merari lit itetapken sepuluh dua kuta.

⁴¹ [41-42] I bas taneh bangsa Israel nari, lit empat puluh waluh kuta, rikut ras mbalmbal i sekelewetna, ibereken man kalak Lewi.

⁴³Jadi ibereken TUHAN kerina taneh e man Israel. Enda sue ras si enggo ipadanken TUHAN man nini-ninina maka taneh e iberekenNa man bana. Kenca ibuatna taneh e jadi sikerajangenna, i je me ia tetap ringan.

⁴⁴Ibereken TUHAN keamanen man Israel i belang-belang taneh e, sue ras si enggo ipadankenNa man nini-ninina. Kerina musuhna la lit sada pe si ngasup ngelawan ia. Sabap TUHAN si mereken kemenangen man kalak Israel ngelawanca.

⁴⁵Isehken TUHAN kerina padan si enggo ibahanNa man bangsa Israel.