Read Batak Karo JOSUA 22 Bible Online

JOSUA 22 - Batak Karo bible

JOSUA 22

¹Kenca bage idilo Josua pulung suku Ruben, Gat, ras Manase Timur.

²Nina man bana kerina, “Enggo ilakokenndu kerina si enggo iperentahken Musa, suruh-suruhen TUHAN e, man bandu, janah enggo ipatuhindu kerina perentahku. [34†]

³Kidekah enda sekali pe la pernah itadingkenndu seninandu kalak Israel. Enggo metenget kam ngikuti perentah TUHAN Dibatandu.

⁴Genduari, sue ras si enggo ipadankenNa man senina-seninandu kalak Israel, TUHAN Dibatandu enggo mereken keamanen. E maka mulihlah kam ku kutandu, taneh si arah Timur Lau Jordan, taneh si ibereken Musa suruh-suruhen TUHAN e man bandu.

⁵I bas si e arus iingetndu gelah ipatuhindu undang-undang si ipedahken Musa man bandu: kelengilah TUHAN Dibatandu, bahanlah kai si ngena ateNa ikutken pedahNa, erkemalangenlah man baNa, janah pemuliakenlah Ia alu bulat ukurndu ras tendindu.”

⁶[6-8] Isuruh Josua ia kerina mulih ku kutana alu pemasu-masunna janah ipedahina pe ia kerina nina, “Mulihlah kam ku kutandu maba mbue kebayaken: lembu, pirak, emas, tembaga, besi, ras mbue paken. Kai si enggo ibuatndu i bas musuh-musuhndu nari bereken deba man senina-seninandu si sada suku.” Kenca bage berkat ia kerina mulih ku kutana. Musa enggo mereken taneh i Timur Lau Jordan man setengah suku Manase, tapi man si setengah nari enggo ibereken Josua arah Barat Lau Jordan, radu ras suku-suku si deban.

⁹E maka mulih kalak Ruben, Gat, ras Manase Timur ku kutana. Itadingkenna bangsa Israel si debanna i Silo i taneh Kanaan janah mulai berkat ku tanehna Gileat, si enggo jadi sikerajangenna sue ras si enggo ipedahken TUHAN arah Musa.

¹⁰Kenca suku Ruben, Gat, ras Manase Timur seh i Gelilot, arah bagin Barat Lau Jordan denga, ipajekkenna batar-batar galang ras mejile deherken Lau Jordan.

¹¹E maka man bangsa Israel si debanna ikataken nina, “Nehenlah! Kalak si i bas suku Ruben, Gat, ras Manase Timur enggo majekken batar-batar i Gelilot, deherken balengta Lau Jordan arah sembelahta enda!”

¹²Kenca ibegi bangsa Israel si enda pulung kerina perpulungen e i Silo guna lawes erperang ngelawan suku-suku si arah Timur.

¹³Jenari isuruh bangsa Israel me Pinehas, anak Imam Eleasar, ndahi suku Ruben, Gat ras Manase Timur ku taneh Gileat.

¹⁴Sepuluh kalak peminpin berkat ras Pinehas, e me sekalak i bas tep-tep suku si arah Barat. Kalak enda ndai e me kepala keluarga i bas terpukna ras Pinehas.

¹⁵Reh ia ku taneh Gileat, njumpai suku Ruben, Gat ras Manase Timur.

¹⁶Ngerana ia i bas gelar kerina perpulungen TUHAN nina man kalak e, “Engkai maka ibahanndu si jahat man Dibata Israel? Kam enggo mberontak man TUHAN alu majekken batar-batar enda man bandu jine! Kam lanai ngikutken Ia! [35†]

¹⁷Ma ingetndu dosanta i Peor, sanga TUHAN ngukum bangsaNa alu penakit si ngkenai nterem jelma? Genduari pe mesera denga siakap erkite-kiteken si e. Langa kin iakapndu bias dosa si ilakokenndu e? [36†]

¹⁸Lanai kin atendu ngikutken Ia genduari? Adi isimbakndu TUHAN sendah, la banci la merawa pagi Ia man kerina jelma i Israel.

¹⁹Genduari dage, adi tanehndu e la kin cocok man ingan ersembah, reh kam ku taneh TUHAN, ingan KemahNa ipajekken. Pindo deba taneh si lit i bas kami. Tapi ola kal isimbakndu TUHAN, ola kal ibahanndu kami jadi pemberontak alu kam erbahan batar-batar nambahi batar-batar TUHAN Dibatanta.

²⁰Inget kuga Akan anak Sera la nggit ngikutken pedah TUHAN kerna barang-barang si arus ikernepken. Kerina perpulungen Israel iukum erkite-kiteken si e. La Akan ngenca mate erkite-kiteken dosana.” [37†]

²¹Ngaloi suku Ruben, Gat ras Manase Timur kepala-kepala keluarga suku-suku si arah Barat nina,

²²“Dibata si meganjangna kap Dibata si tuhu-tuhu! Ia kap TUHAN! Dibata si meganjangna kap Dibata si tuhu-tuhu! Ia kap TUHAN! ItehNa kai si ibahan kami enda, janah ate kami maka kam pe metehsa ka! Adi ngelawan kin kami man TUHAN, adi lanai kin kami tek man TUHAN olanai pelepas kami nggeluh!

²³Adi isimbak kami kin TUHAN janah adi ibahan kami kin batar-batar guna diri kami jine man ingan nutung persembahen ntah pe gelah ipake guna persembahen buah gandum ntah pe persembahen persadan, TUHAN jine lah si ngukum kami.

²⁴Labo e tujun kami! Ipajekken kami batar-batar e, sabap mbiar kami maka pagin kesusurenndu ngerana man kesusuren kami, nina, ‘La kap lit hubungendu ras TUHAN Dibata Israel?

²⁵IbahanNa Lau Jordan jadi baleng kami ras kam kalak Ruben ras Gat. Labo lit baginndu i bas TUHAN.’ Jenari banci jadi ilarang kesusurenndu pagi kesusuren kami ersembah man TUHAN.

²⁶E maka ipajekken kami sada batar-batar, labo man ingan nutung persembahen ntah pe man ingan persembahen,

²⁷tapi gelah jadi sada tanda man kami ras kam, bage pe man kerina kesusurenta si reh, maka kami pe tuhu-tuhu nge ersembah man TUHAN i lebe-lebe KemahNa si Badia rikut pe ras persembahen-persembahen persadan. Enda ibahan kami njaga gelah ola pagi ikataken kesusurenndu, maka kesusuren kami labo lit urusenna ras TUHAN.

²⁸Si e iukurken kami, gelah kune si enda terjadi, kesusuren kami banci ngerana nina, ‘Nehenlah! Nini-nini kami erbahan sada batar-batar TUHAN. Batar-batar e labo guna nutung persembahen ntah guna persembahen gelehen, tapi jadi sada tanda man kami ras kam.’

²⁹Dage, labo ate kami ngelawan TUHAN ntah pe nundalken Ia genduari, alu majekken sada batar-batar man ingan nutung persembahen ntah pe persembahen buah gandum ntahpe persembahen gelehen. Labo kami nggit majekken batar-batar si deban lain asa batar-batar TUHAN Dibatanta si pajek i lebe-lebe Kemah PerjumpanNa.”

³⁰Imam Pinehas ras peminpin-peminpin perpulungen si sepuluh kalak si ras ia, kepala-kepala keluarga i bas suku-suku si arah Barat, megi kai si ikataken suku Ruben, Gat, ras Manase Timur, janah payo iakapna.

³¹Pinehas anak Imam Eleasar ngerana nina, “Genduari enggo ieteh kami maka TUHAN ras kita kap, sabap labo kepe atendu ngelawan man baNa. Erkite-kiteken si e enggo ipulahindu bangsa Israel i bas ukumen TUHAN nari.”

³²Kenca bage Pinehas ras peminpin-peminpin e lawes nadingken kalak Ruben ras Gat i taneh Gileat janah mulih ia ku Kanaan, ku bangsa Israel, jenari nuri-nuri ia man bangsa e.

³³Payo iakap kalak Israel jenari ipujina Dibata. Lanai icakapkenna kerna lawes erperang guna ngkernepken taneh ingan tading kalak Ruben ras Gat.

³⁴Nina kalak Ruben ras Gat, “Batar-batar enda jadi sada saksi man banta kerina maka TUHAN kap Dibata.” E maka ibahanna gelar batar-batar e “Saksi”.