Read Batak Karo JOSUA 23 Bible Online

JOSUA 23 - Batak Karo bible

JOSUA 23

¹Ndekah denga kenca si e TUHAN mereken keamanen man Israel i bas musuh-musuhna nari si lit i sekelewetna. Tupung e Josua enggo metua kal,

²e maka idilona kerina kalak Israel, pertua-pertua, peminpin-peminpin, hakim-hakim ras kepala-kepala pasuken bangsa e, jenari nina, “Genduari aku enggo metua kal.

³Enggo idahndu kai si ibahan TUHAN Dibatandu man kerina bangsa enda erkite-kiteken kam. TUHAN Dibatandu enggo erperang guna kam.

⁴Enggo kutetapken jadi sikerajangen suku si lit i bas kam taneh bangsa-bangsa si lit denga tading, bage pe kerna taneh kerina bangsa-bangsa si enggo kutaluken, mulai i Lau Jordan nari i Timur seh ku Lawit Tengah i Barat.

⁵TUHAN Dibatandu mahanca pagi kiam kerina bangsa e i adep-adepenndu nari, janah asum kam merangisa ipelawesNa bangsa e kerina. Tanehna la banci la iendesken man bandu pagi, bagi si enggo ipadanken TUHAN Dibatandu man bandu.

⁶E maka arus kam metenget ngikuti ras ngelakoken kerina si tersurat i bas kitap Undang-undang Musa. Ola kam nilah sitik pe i bas Undang-undang e nari,

⁷janah ola kam erteman ras bangsa si lit denga tading i tengah-tengahndu. Kam la banci erbelas i bas gelar dibatana, ntahpe ersumpah i bas gelarna. Nembah man dibatana e pe kam la banci, ntah pe erjimpuh nembah man bana.

⁸Tapi tetaplah kam setia man TUHAN, bagi kam tetap setia seh genduari.

⁹Enggo ipelawes TUHAN bangsa-bangsa si mbelin ras megegeh asum kam merangisa janah la lit sada pe si ngasup ngelawan kam.

¹⁰Sekalak saja pe ngasup kam ngayak-ngayak seribu kalak, sabap TUHAN Dibatandu erperang guna kam, sue ras si ipadankenNa. [38†]

¹¹Dage tutuslah atendu ngkelengi TUHAN Dibatandu.

¹²Adi la kam patuh, tapi ersada kam ras bangsa-bangsa si lit denga i tengah-tengahndu, ntahpe si empon kam ras ia,

¹³arus itehndu tuhu-tuhu maka bangsa e lanai ipelawes TUHAN Dibatandu tupung kam merangisa. Tapi bangsa e jadi bahaya man bandu desken siding ntah pe ragum si erbahanca mesui iakapndu, desken perligas ngeligas gurungndu. Ntah pe bali ras duri si lit i bas matandu. Si enda tetap pagi bage seh lanai lit sada pe kam tading i bas taneh si mehuli enda si enggo ibereken TUHAN Dibatandu man bandu.

¹⁴Genduari enggo seh paksana aku mate. Sekalak-sekalak kam meteh i bas ukurna ras i bas tendina maka TUHAN Dibatandu enggo mereken man bandu kerina si mehuli si enggo ipadankenNa. Kerina si ipadankenNa la lit sada pe si la seh, kerina enggo itepatiNa.

¹⁵Tapi bali ras penepatiNa tep-tep padan si ipadankenNa man bandu, bageme pe la banci lang isehkenNa ancamenNa man bandu.

¹⁶Adi la ingetndu perpadanen si ipedahken TUHAN Dibatandu man bandu, janah adi ipehaga ras isembahndu dibata-dibata si deban, tentu la banci lang minter kam keri i bas taneh si mehuli enda si enggo iberekenNa man bandu.”