Read Batak Karo JOSUA 24 Bible Online

JOSUA 24 - Batak Karo bible

JOSUA 24

¹Ipepulung Josua kerina suku Israel i Sikem. Idilona pertua-pertua, peminpin-peminpin, hakim-hakim, ras kepala-kepala pasuken Israel, jenari ngadap ia kerina ku lebe-lebe Dibata.

²Nina Josua man kerina bangsa e, “Enda me kai si ikataken TUHAN, Dibata Israel, ‘Nai nini-ninindu ringan arah lepar Lau Eprat janah isembahna dibata-dibata si deban. Sekalak i bas nini-ninindu e nari e me Terah, bapa Abraham ras Nahor. [39†]

³Kenca bage Kubuat ninindu Abraham i bas taneh si i lepar Lau Eprat nari, Kutaruhken ia ku taneh Kanaan. Nterem Kubahan kesusurenna. Kubereken man bana Isak, [40†]

⁴jenari man Isak Kubereken Jakup ras Esau. Man Esau Kubereken taneh deleng-deleng Edom jadi sikerajangenna, tapi ninindu Jakup ras anak-anakna lawes ngincuah ku Mesir. [41†]

⁵Kenca si e Kusuruh Musa ras Harun, janah Kubahan kesusahen si mbelin man Mesir. Tapi kam kubaba ndarat i jah nari, jenari iayaki kalak Mesir ia alu gereta perang ras tentera erkuda. [42†]

⁶Kubaba nini-ninindu ndarat i Mesir nari. Tapi asum nini-ninindu seh i Lawit Merah, [43†]

⁷nderkuh ia ku Aku mindo penampat, jenari Kutamaken kegelapen kelang-kelangna ras kalak Mesir. Kubahan lawit reh ergalun i babo kalak Mesir si erbahanca ia gedap kerina. Itehndu kai si Kubahan man Mesir. Ndekah kam ringan i gurun pasir.

⁸Kenca bage Kubaba kam ku taneh Amori si ringan arah Timur Lau Jordan. Ilawanna kam, tapi Kubereken man bandu kemenangen. Ibuatndu tanehna, janah Kukernepken ia tupung kam merangisa. [44†]

⁹Kenca bage raja Moap, Balak anak Sipor, erperang ngelawan kam. Itenahkenna Bilham anak Beor jenari ipindona man bana gelah isumpahina kam. [45†]

¹⁰Tapi la Aku nggit megiken Bilham, e maka ipasu-pasuna kam, janah alu bage Kuselamatken kam i bas Balak nari.

¹¹Ikeparindu Lau Jordan jenari seh kam i Jeriho. Ilawan kalak Jeriho kam, bagi si ibahan kalak Amori, Peris, Kanaan, Heti, Girgasi, Hewi, ras kalak Jebusi, tapi Kubereken man bandu kemenangen ngelawan ia kerina. [46†]

¹²Asum kam merangisa, Kuhuntakken ia kerina gelah ipelawesndu raja kalak Amori si dua e. Si e labo erkite-kiteken pedangndu ntah panahndu. [47†]

¹³Kubereken man bandu taneh si la enggo pernah ikerjakenndu ras kuta-kuta si la pernah ipajekkenndu. Genduari kam ringan i je janah man buah anggur si labo kam nuanca, ras buah saitun i bas batangna nari si labo kam nuanca.’ ” [48†]

¹⁴“Dage genduari,” nina Josua ngumputi rananna, “pehagalah TUHAN janah sembahlah Ia alu tutus ate ras patuh. Pedauhlah dibata si nai isembah nini-ninindu i Mesopotami ras i Mesir, janah man TUHAN sajalah kam ersembah.

¹⁵Adi la iakapndu mehuli ersembah man TUHAN, pilihlah sendah ise atendu isembahndu, dibata si isembah nini-ninindu i Mesopotami, ntah dibata kalak Amori si inganindu tanehna genduari. Tapi adi aku ras isi jabungku, TUHAN saja ngenca isembah kami.”

¹⁶Ngaloi bangsa e nina, “Ndigan pe la kami nggit nadingken TUHAN jenari nembah man dibata si deban!

¹⁷TUHAN Dibata kami maba kami ras bapa kami i bas perbudaken nari i Mesir, janah idah kami tanda kuasa si ibahanNa. IjagaiNa kami gelah terkelin ku japa pe kami mentas arah tengah-tengah bangsa-bangsa si ibentasi kami.

¹⁸Asum kami merangi taneh enda, ipelawes TUHAN kerina kalak Amori si ringan i jenda. E maka kami pe nembah man TUHAN. Ia kap Dibata kami.”

¹⁹Nina Josua man bangsa e, “Tapi ntah labo kam ngasup nembah man baNa. Ia Dibata si Badia, Sitonggal! Ia Dibata si mecimberu. La ialemiNa dosandu

²⁰adi itundalkenndu jenari nembah man dibata-dibata si deban. Tapi erkusur Ia ngelawan kam jenari iukumNa kam. La banci la ikernepkenNa kam, aminna gia mehuli Ia gelgel nari man bandu.”

²¹Nina bangsa e man Josua, “Lang! Ate kami nembah man TUHAN saja.”

²²Nina Josua man bana kerina, “Kam jine jadi saksindu maka kam enggo milih TUHAN janah ersembah man baNa.” “Ue,” nina kerina, “kami saksina.”

²³“Adi bage pedauhlah dibata si deban si lit i bas kam,” nina Josua ngumputisa, “janah ersumpahlah kam man dirindu jine maka kam setia man TUHAN, Dibata Israel.”

²⁴Jenari nina bangsa e man Josua, “Ate kami ersembah man TUHAN Dibata kami. Ate kami ngikutken pedahNa.”

²⁵E maka ibahan Josua sada perpadanen ras bangsa e i bas wari e, janah i bas ingan e, i kuta Sikem iberekenna man bana undang-undang ras peraturen si man ikutenken.

²⁶Isuratken Josua pedah-pedah i bas kitap undang-undang Dibata. Kenca bage ibuatna sada batu galang jenari itamakenna i teruh kayu jati i bas ingan TUHAN si badia.

²⁷Ikatakenna man bangsa e kerina nina, “Batu enda jadi saksi man banta. Enggo ibegi batu enda kerina kata si ibelasken TUHAN man banta. Dage, batu e jadi ersaksi ngelawan kam, gelah ola kam ngelawan man Dibatandu.”

²⁸Kenca bage isuruh Josua bangsa e lawes, janah sekalak-sekalak ia mulih ku taneh baginna.

²⁹Kenca si e mate Josua anak Nun, suruh-suruhen TUHAN e. Tupung e umurna seratus sepuluh tahun.

³⁰Ikuburken ia i tanehna jine i Timnat Sera i taneh deleng-deleng Eperaim arah Utara Deleng Gaas. [49†]

³¹Kidekah geluh Josua, bangsa Israel nembah man TUHAN. Janah kenca ia mate pe tetap denga kalak Israel nembah man TUHAN, kidekah nggeluh denga peminpin-peminpin si enggo naksiken kerina si enggo ibahan TUHAN man Israel.

³²Badan Jusup, si enggo ibaba bangsa Israel i Mesir nari, ikuburken i Sikem, i bas taneh si itukur Jakup i bas anak-anak Hamor nari, bapa Sikem, alu seratus duit pirak. Taneh tetap jadi sikerajangen kesusuren Jusup. [50†]

³³Eleasar anak Harun mate jenari ikuburken i Gibea, kuta i taneh deleng-deleng Eperaim si enggo ibereken man anakna Pinehas.