Read Batak Karo JOSUA 3 Bible Online

JOSUA 3 - Batak Karo bible

JOSUA 3

¹Pepagina lampas, keke Josua ras kerina bangsa Israel, berkat ia i bas inganna erkemah i Sitim nari ku Lau Jordan. I je erkemah ka ia kerina ope denga ngepar.

²Telu wari kenca si e, peminpin-peminpin bangsa e lawes niari ingan erkemah e

³janahna ermomo man bangsa e nina, “Kenca idahndu imam-imam ngangkat Peti Perpadanen TUHAN Dibatandu, minter tangtangi kerina kemahndu jenari ikutken lah ia.

⁴La enggo pernah kam i jenda, e maka kalak e si nuduhken dalan man bandu. Tapi ola deheri Peti Perpadanen e erdalanlah kira-kira sada kilometer i pudina.”

⁵Nina Josua man bangsa e, “Bersihken bandu, rikutken aturen agama, sabap pagi TUHAN erbahan sada tanda kuasa i tengah-tengahndu.”

⁶Kenca si e isuruhna imam-imam ngelanja Peti Perpadanen e janah erdalan leben asa bangsa e. Minter ilakoken imam bagi si ikataken Josua.

⁷Nina TUHAN man Josua, “Erkiteken perbahanenKu si sendah mulai me kam ipermuliaken bangsa Israel, janah iangkana maka Aku kap ras kam bagi Aku enggo ras Musa.

⁸Suruh imam-imam si ngangkat Peti Perpadanen maka adi enggo ia seh i Lau Jordan, la banci la tedis ia i bas lau e.”

⁹Jenari nina Josua man bangsa e, “Mari begiken kai si ikataken TUHAN Dibatandu man bandu.

¹⁰I bas perdalanenndu la banci la ipelawesNa kerina kalak Kanaan, Heti, Hewi, Peris, Girgasi, Amori ras Jebusi. Itehndu me maka Dibata si nggeluh lit i tengah-tengahndu.

¹¹E maka Peti Perpadanen TUHAN si nasa lit, ngepari Lau Jordan leben asa kam.

¹²Genduari pilih sepuluh dua kalak, sekalak i bas tep-tep suku Israel nari.

¹³Kenca imam-imam, si ngangkat Peti Perpadanen TUHAN si nasa lit, ndedehken nahena ku bas lau, Lau Jordan la banci la ngadi maler, janah lau si maler ku berneh pulung i bas sada ingan, tempa-tempa itambak.”

¹⁴ [14-15] Tupung e sangana paksa peranin, janah lau e sangana banjir. Kenca bangsa e berkat i bas ingan erkemah e nari guna ngepari Lau Jordan, imam-imam si maba Peti Perpadanen e kerina erdalan arah lebe,

¹⁶minter ngadi launa maler janah nengneng terus ku gugung i kuta Adam, e me kuta deherken Saretan. Lau si maler ku berneh ku Lawit Mate enggo kerah tuhu-tuhu, e maka bangsa e banci ngepar deherken Jeriho.

¹⁷Asum bangsa e erdalan ngepar arah taneh si kerah, imam-imam si ngelanja Peti Perpadanen TUHAN tedis i babo taneh kerah i tengah-tengah Lau Jordan seh kerina bangsa e ngepar.