Read Batak Karo JOSUA 4 Bible Online

JOSUA 4 - Batak Karo bible

JOSUA 4

¹Kenca kerina bangsa e enggo ngepari Lau Jordan nina TUHAN man Josua,

²“Pilih sepuluh dua kalak, sekalak i bas tep-tep suku nari.

³Jenari suruh ia muat batu sepuluh dua i tengah-tengah Lau Jordan nari e me i bas ingan tedis imam-imam e. Suruh ia maba batu-batu e jenari tamaken i bas inganndu erberngi sendah.”

⁴E maka idilo Josua si sepuluh dua kalak si enggo ipilihna e,

⁵jenari nina, “Lawes lah kam ku Lau Jordan leben asa Peti Perpadanen TUHAN Dibatandu. Buat lah batu i je tersada kam, sada guna tep-tep suku Israel, jenari persan.

⁶Batu enda jadi sada peringet-ingeten man bangsa e kerna kai si enggo ibahan TUHAN. Denggo, adi isungkun anak-anakndu kai ertina batu enda man bandu,

⁷kataken man bana maka Lau Jordan ngadi maler asum Peti Perpadanen TUHAN ngepari lau e. Batu enda tentu rusur ngingetken bangsa Israel kerna kai si enggo jadi i jenda.”

⁸Iikutken kalak ndai perentah Josua. Sue ras si enggo ipedahken TUHAN man Josua, ibuatna batu sepuluh dua i tengah-tengah Lau Jordan nari, sada man tep-tep suku Israel, ibabana ku ingan erkemah, jenari itamakenna i je.

⁹Josua pe ngamparken sepuluh dua batu i tengah-tengah Lau Jordan, i bas ingan tedis imam-imam si ngelanja Peti Perpadanen e. (Batu e lit denga i je.)

¹⁰Imam-imam tedis i tengah-tengah Lau Jordan seh kerina enggo dung ilakoken kai si enggo isuruh TUHAN man Josua guna idalanken bangsa e. Enda me kai si enggo iperentahken Musa. Pedas-pedas bangsa e ngepar.

¹¹Kenca ia enggo ngepar kerina, imam-imam erdalan leben asangken bangsa e maba Peti Perpadanen TUHAN.

¹²Dilaki i bas suku Ruben ras Gat bage pe setengah i bas suku Manase nari, si sikap erperang, leben ngepar asangken kalak si debanna e kerina bagi si enggo isuruh Musa man bana.

¹³I lebe-lebe TUHAN kira-kira empat puluh ribu dilaki si sikap erperang lawes ngepar ku kendit deherken Jeriho.

¹⁴Kai si ibahan TUHAN i bas wari e, erbahanca maka bangsa Israel malang ngenehen Josua. Ipehaga bangsa e ia kidekah geluhna, bali ras ipehagana Musa.

¹⁵Kenca bage ikataken TUHAN man Josua

¹⁶gelah isuruhna imam-imam si ngelanja Peti Perpadanen e ndarat i Lau Jordan nari.

¹⁷E maka minter isuruh Josua imam-imam e ndarat.

¹⁸Janah kenca imam-imam e seh i darat mulai ka lau ndai maler bagi si gelgel, mulsak launa seh ku tepi.

¹⁹Ikepari bangsa e Lau Jordan i bas wari pesepuluhken bulan si pemena jenari ibahanna inganna erkemah i Gilgal, arah Timur Jeriho.

²⁰I je isusun Josua batu si sepuluh dua ndai si ibuat i bas Lau Jordan nari.

²¹Ikatakenna man bangsa Israel nina, “Adi isungkun anak-anakndu kam denggo kai ertina batu enda,

²²turiken man bana kerna kejadin tupung Israel ngepari Lau Jordan arah taneh kerah.

²³Turiken man bana maka TUHAN Dibatandu ngkerahi Lau Jordan guna kam seh kam ngepar, bali ras enggo ikerahiNa Lawit Merah man kami.

²⁴Erkite-kiteken si enda kerina bangsa i doni enda meteh kuga belinna kuasa TUHAN, janah ipehagandu TUHAN Dibatandu seh rasa lalap.”