Read Batak Karo JOSUA 5 Bible Online

JOSUA 5 - Batak Karo bible

JOSUA 5

¹Kerina raja-raja kalak Amori si arah Barat Lau Jordan ras kerina raja-raja kalak Kanaan si ringan i gedang-gedang Lawit Tengah megisa e maka mbiar ia kerina, janah bene ukurna erkite-kiteken bangsa Israel.

²Kenca e ikataken TUHAN man Josua nina, “Bahanlah piga-piga piso i bas batu nari jenari sunatken kalak Israel.”

³E maka ibahan Josua me bagi si isuruh TUHAN, jenari isunatkenna bangsa Israel i bas sada ingan si igelari Uruk Ingan Sunat.

⁴[4-6] Asum kidekah bangsa e ngepari gurun pasir empat puluh tahun dekahna, kerina dilaki si enggo cukup umurna jadi tentera asum nadingken Mesir, enggo mate sabap enggo isimbakna TUHAN. Sue ras kai si enggo isumpahkenNa, kalak e la ibereNa ngidah taneh si mehuli dingen mehumur si enggo ipadankenNa man nini-ninina. [7†]

⁷Kerina anak kalak enda langa isunatken, janah kesusuren si enda me si isunatken Josua.

⁸Kenca enggo dung isunatken, kerina bangsa e tading i bas ingan erkemah seh enggo malem ugahna.

⁹Nina TUHAN man Josua, “Gelgel megombang kalak man bandu erkiteken nai kam jadi budak i Mesir. Tapi sendah enggo kuagui si e kerina i bas kam nari.” Em sabapna maka ingan e igelari Gilgal seh asa genduari.

¹⁰Sanga bangsa Israel erkemah i Gilgal i bas (sada) kendit deherken Jeriho, irayakenna Paskah tupung berngi i bas wari si pesepuluh empatken i bas bulan e. [8†]

¹¹Pepagina me si pemenana kal ipanna pangan si turah i taneh Kanaan, e me: buah gandum si isauk ras roti si la itama ragi.

¹²Mulai i jenari manna enggo ngadi ndabuh, janah lanai lit sitik pe i bas kalak Israel. Mulai i bas paksa e nari ipanna me pangan si turah i Kanaan. [9†]

¹³Sanga Josua deher Jeriho, rempet idahna sekalak dilaki tedis i lebe-lebena. Idahi Josua ia jenari isungkunina nina, “Tentera pihak kami nge kam, ntah musuh kami?”

¹⁴“Si apai pe lang,” nina dilaki ndai erjabap. “Aku reh ku jenda sekalak komendan tentera TUHAN.” Minter mungkuk Josua nembah, ayona seh ku taneh janah nina, “Aku kap suruh-suruhenndu. Kai atendu kubahan?”

¹⁵E maka ikataken komendan tentera TUHAN man bana nina, “Tangtangi sepatundu, kam sangana tedis i taneh si badia.” Jenari ibahan Josua bagi si ikataken man bana.