Read Batak Karo JOSUA 8 Bible Online

JOSUA 8 - Batak Karo bible

JOSUA 8

¹Nina TUHAN man Josua, “Baba kerina tentera e ras kam jenari laweslah nangkeng ku Ai. Ola kam mbiar janah ola aru atendu. Kubereken man bandu kemenangen ngelawan raja Ai; rayatna, kutana, ras tanehna jadi sikerajangenndu.

²Uga perbahanndu man Jeriho ras rajana bage me arus ibahanndu pe man Ai ras rajana, tapi sekali enda banci ibuatndu barang-barangna ras lembuna man sikerajangenndu. Ersikap gelah banci iserangndu kuta e rempet i pudi nari.”

³E maka ersikap Josua ras kerina tenterana berkat ku Ai. Ipilihna telu puluh ribu kalak tentera si mbisana jenari isuruhna lawes berngi-berngi.

⁴Iperentahkenna nina, “Cebuni lah kam i pudi kuta ah, tapi ola ndauhsa i jenari; sikaplah nerangsa katawari pe.

⁵Aku ras tenterangku reh ndeheri kuta e. Sanga kalak Ai reh ndarat ngelawan kami, minter kami mulih jenari kiam, bali ras si ibahan kita i bas si pemena mbarenda.

⁶Tentu iayakina kami seh maka ibabai kami ia ndauh i bas kuta e nari. Iakapna kami kiam nadingken ia, bagi si ibahan kita mbarenda.

⁷Kenca bage ndarat kam i bas inganndu cebuni nari jenari taluken kuta e. TUHAN Dibatandu si mereken kuta e man bandu.

⁸Kenca ibuatndu kuta e, ciluklah, sue ras si ipedahken TUHAN. Enda me perentah man bandu.”

⁹E maka isuruh Josua kerina lawes, jenari lawes ia ku inganna cebuni janah itimaina i je, arah Barat Ai, kelang-kelang Ai ras Betel. I bas berngi e Josua tading i bas ingan erkemah.

¹⁰Pepagina lampas erpagi-pagi, keke Josua jenari ipepulungna tenterana. Kenca e ia ras peminpin-peminpin Israel minpin tentera e ku Ai.

¹¹Tentera si ras ia e lawes kempak dalan bengket ku bas kuta e jenari ipajekkenna kemahna arah Utara, kelang-kelangna ras Ai lit sada baluren.

¹²Ibuatna kira-kira lima ribu kalak jenari isuruhna cebuni arah Barat kuta, kelang-kelang Ai ras Betel.

¹³Tentera e iatur guna erperang, si nteremna tading i bas ingan erkemah arah Utara kuta e. Si debanna arah Barat. I bas berngi e Josua ringan i baluren e.

¹⁴Tupung idah raja Ai tentera Josua, minter iperangina kalak Israel i bas ingan si mbarenda ka, alu la meteh maka ia nandangi iserang i pudi nari.

¹⁵Josua ras tenterana mpekulah-kulah mundur jenari kiam ku daerah gurun pasir.

¹⁶Kerina dilaki si lit i bas kuta Ai enggo idilo ngayakisa, janah asum iayakina Josua, terus ia erdauhna i kuta e nari.

¹⁷Tep-tep dilaki si lit i bas kuta Ai lawes ngayaki kalak Israel, janah kuta e talang itadingken la lit ise pe si mpertahankenca.

¹⁸Kenca bage nina TUHAN man Josua, “Angkat lembingndu, pepinter ujungna kempak Ai, sabap Kubereken kuta e ku bas kuasandu.” Ibahan Josua bagi si ikataken man bana,

¹⁹janah minter kenca iangkatna tanna, tentera si cebuni ndai pedas-pedas keke, kiam ku bas kuta e jenari italukenna. Minter icilukna kuta e.

²⁰Asum itulihken kalak Ai ku pudi, iidahna cimber nangkih ku das. Lanai lit dalanna lompat, sabap kalak Israel si ndai kiam ku taneh si mesawang genduari enggo erkusur merang ia.

²¹Asum idah Josua ras tenterana maka tentera si debanna ndai enggo muat kuta e, janah enggo meseng, erkusur ia kerina jenari mulai ibunuhina kalak Ai.

²²Kalak Israel si i bas kuta e genduari reh ku berneh ikut i bas peperangen e. Idah kalak Ai maka ia enggo ikepung bangsa Israel, janah kerina ia mate ibunuh. La lit sada pe si pulah, la lit si tading,

²³seakatan raja Ai. Ia itaban jenari ibaba man Josua.

²⁴Kerina musuh e ibunuh kalak Israel i taneh si mesawang ku ja ia enggo ndai iayak-ayak kalak Ai. Kenca bage mulihken ia ku kuta Ai e maka ibunuhna kerina kalak si lit i je.

²⁵ [25-26] Lembing tetap ipepinter Josua kempak kuta Ai janah lalap la ipesusurna seh tep-tep kalak si lit i je enggo ibunuh. Kerina kalak kuta Ai si ibunuh i bas wari e lit sepuluh dua ribu dilaki ras diberu.

²⁷Lembu ras barang-barang si deban si itaban i bas kuta e ibuat bangsa Israel jadi sikerajangenna, sue ras si enggo ipedahken TUHAN man Josua.

²⁸Iciluk Josua kuta Ai janah ipelepasna runtuh. Seh sendah pe bage denga nge.

²⁹Igantungna raja Ai i bas sada batang kayu, janah ipelepasna maitna gantung i je seh berngi. Kenca matawari sundut iperentahken Josua gelah mait raja Ai ibuat, jenari ibenterken ku dalan i pintu gerbang kuta e. Itamburina mait e alu batu si ergun-gun, si lit denga i je seh sendah.

³⁰Jenari ipajekken Josua i Deleng Ebal sada batar-batar ingan persembahen man TUHAN, Dibata Israel.

³¹Ibahanna e sue ras pedah si enggo ibereken Musa, suruh-suruhen TUHAN, maka kalak Israel, bagi si ikataken i bas Undang-undang Musa, “Sada batar-batar ingan persembahen ibahan i bas batu nari si langa ibar-bar alu alat-alat besi.” I babo batar-batar e ipersembahkenna persembahen tutungen man TUHAN, janah ibahanna pe persembahen persadan.

³²I je, alu ipernehen bangsa Israel, ibahan Josua i babo batu sada salinen Undang-undang si enggo isuratken Musa.

³³Bangsa Israel, ras peminpin-peminpin, pegawai-pegawai, ras hakim-hakimna, bage pe kalak asing si lit i tengah-tengahna, tedis arah kawes ras arah kemuhen Peti Perpadanen TUHAN, ngala ku imam-imam kalak Lewi si ngelanja Peti e. Jelma si nterem e tedis, setengah mpudiken Deleng Gerisim janah setengah nari mpudiken Deleng Ebal. Musa suruh-suruhen TUHAN e enggo mereken pedah man bana kerina guna ngelakoken si enda, adi enggo seh paksana ia ngaloken pemasu-masun.

³⁴Jenari alu sora megang, iogeken Josua Undang-undang e kerina, subuk pasu-pasu ras sumpahna, sue ras si tersurat i bas kitap Undang-undang.

³⁵Tep-tep perentah Musa iogeken Josua man kerina perpulungen e, subuk man diberu ras anak-anak, bage pe kalak pertandang si ringan i tengah-tengahna.