Read Batak Karo JOSUA 9 Bible Online

JOSUA 9 - Batak Karo bible

JOSUA 9

¹Kemenangen Israel enggo tereteh man kerina raja-raja si arah Barat Lau Jordan, i uruk-uruk, i berneh, ras kerina i gedang-gedang kendit tepi Lawit Tengah, seh ku Libanon i Utara. Si enda kerina e me kap raja-raja kalak Heti, Amori, Kanaan, Peris, Hewi ras Jebusi.

²Pulung ia kerina jenari ipersadana gegehna merangi Josua ras bangsa Israel.

³Tapi enggo ibegi penduduk Gibeon, e me kap kalak Hewi, kai si enggo ibahan Josua man Jeriho ras Ai.

⁴E maka irencanakenna nipu Josua. Ibuatna bekalna jenari itamakenna ku das kaledena tare guni si merigat-rigat ras kulit ingan lau anggur si enggo irangkap-rangkapi.

⁵Ipakena paken si merigat-rigat ras sepatu buruk si enggo itempel-tempel. Roti si ibabana enggo kerah-kerah janah dawanen.

⁶Jenari lawes ia ku ingan bangsa Israel erkemah i Gilgal. Ikatakenna man Josua ras kalak Israel nina, “Enggo kami reh i bas negeri si ndauh nari. Ate kami gelah ibahanndu sada perpadanen ras kami.”

⁷Tapi nina bangsa Israel man bana, “Engkai ka maka kami erbahan perpadanen ras kam? Banci jadi inganndu tading deher-deher enda nge.” [13†]

⁸Nina man Josua, “Suruh-suruhenndu kap kami.” Isungkun Josua ia nina, “Ise kin kam? I ja nari kam?”

⁹Kenca bage ituriken kalak ndai me turi-turin enda man bana nina, “O bapa, kami reh i negeri si ndauh nari kal, sabap enggo ibegi kami kerna TUHAN Dibatandu. Enggo ibegi kami kerna kai si ibahanNa i Mesir.

¹⁰Janah kai si ibahanNa man raja kalak Amori duana arah Timur Lau Jordan: Raja Sihon i Hesbon nari ras Raja Og i Basan nari, si ringan i Astarot. [14†]

¹¹Peminpin kami ras kerina jelma si ringan i negeri kami nuruh gelah ibuat kami bekal guna perdalanen si ndauh njumpai kam. Kami isuruh gelah jadi suruh-suruhenndu ras mindo man bandu erbahan perpadanen ras kami.

¹²Nehenlah roti si ibaba kami. Asum kami berkat i rumah kami nari, asum ibenaken kami perdalanen kami njumpai kam, roti si ibaba kami e melas-melas denga. Tapi nehen lah! Genduari enggo kerah ras dawanen.

¹³Asum ingan lau anggur enda iisi kami, mbaru denga kal kerina, tapi nehenlah! Genduari enggo merigat! Uis kami ras sepatu kami enggo jadi male i bas perdalanen si ndauh e.”

¹⁴Ialoken bangsa Israel pangan i bas ia nari, tapi la isungkunina TUHAN kerna si e.

¹⁵Ibahan Josua sada perpadanen tandana ia erteman ras kalak Gibeon janah ipelepasna ia nggeluh. Peminpin perpulungen Israel erpadan tuhu-tuhu maka perpadanen e itepatina.

¹⁶Telu wari kenca perpadanen e ibahan, enggo tereteh man kalak Israel maka kepeken kalak ndai ndeher kal nge inganna.

¹⁷E maka berkat bangsa Israel janah kenca telu wari seh ia i kuta ingan kalak ndai tading: Gibeon, Kepira, Beerot, ras Kiryat Jearim.

¹⁸Tapi la banci ibunuh kalak Israel ia, sabap peminpin enggo erbahan sumpah ras ia i bas gelar TUHAN, Dibata Israel. Kerina bangsa e jungut-jungut man peminpin e kerna si enda,

¹⁹tapi nina ngaloi, “Enggo kami ersumpah ras ia i bas gelar TUHAN Dibata Israel. E maka genduari la banci ugapa pe ia ibahan kami.

²⁰La banci la ipelepas kami ia nggeluh erkite-kiteken perpadanen kami. Adi la bage ibahan kami, tentu iukum Dibata kita.

²¹Pelepaslah ia nggeluh, tapi arus ia erdahin, naka ranting ras ngelegi lau man banta.” Enda me si iusulken peminpin-peminpin e.

²²Iperentahken Josua gelah penduduk Gibeon ibaba man bana, jenari isungkunina ia nina, “Engkai maka itipundu kami janah ikatakenndu man kami maka kam i bas ingan si ndauh nari, tapi i jenda nge kepe kam ringan?

²³Erkite-kiteken ibahanndu si enda, kam enggo iukum Dibata. Bangsandu la banci la tetap jadi budak, naka ranting ras ngangkat lau guna rumah Dibatangku.”

²⁴Ngaloi ia nina, “Ibahan kami si e, Bapa, erkite-kiteken enggo tereteh man kami maka tuhu-tuhu enggo ipedahken TUHAN Dibatandu man Musa, suruh-suruhenNa, guna mereken kerina taneh enda man bandu ras munuh kalak si ringan i je asum kam mengketisa. Ibahan kami si enda erkite-kiteken mbiar kami man bandu. Mbiar kami bene kesah kami.

²⁵Genduari kami lit i bas kuasandu. Bahanlah man kami kai iakapndu payo.”

²⁶E maka bagenda me ibahan Josua: ikawalina kalak ndai janah la iberena bangsa Israel munuhsa.

²⁷Tapi ibahanna kalak ndai jadi budak, naka ranting ras ngangkat lau man bangsa Israel ras man batar-batar TUHAN. Seh wari si sendah dahin enda terus ilakokenna i bas ingan si enggo ipilih TUHAN lako ersembah man baNa.