Read Batak Karo 2 TIMOTIUS 1 Bible Online

2 TIMOTIUS 1 - Batak Karo bible

2 TIMOTIUS 1

¹Surat enda i bas aku nari, Paulus si enggo ipilih Dibata jadi rasul Kristus Jesus. Aku isuruhNa pembarken kegeluhen si ipadanken guna ialoken i bas persadanta ras Kristus Jesus.

²Surat enda man Timotius, anakku si kukelengi. Dibata Bapa ras Kristus Jesus Tuhanta mereken lias ate, perkuah ate ras kemalemen ate min man bandu. [1†]

³Bujur kukataken man Dibata, si kusembah alu tutus, bagi nini-niningku nai. Bujur kukataken man Dibata asum kuinget kam rusur i bas pertotonku subuk suari bage pe berngi.

⁴Kuinget kuga pertangisndu, janah mesikel kal aku jumpa ras kam gelah meriah kal min kuakap.

⁵Kuinget tutus atendu erkiniteken bali ras kiniteken nini tudungndu Lois ras nandendu Enike. Tek aku maka i bas kam pe lit kiniteken si bage. [2†]

⁶Erkiteken si e kupersingeti man bandu gelah gara mulihken i bas kam pemere Dibata, si ialokenndu asum kutamaken tanku i babo takalndu.

⁷Sabap Kesah si ibereken Dibata man banta labo erbahanca gelah kita percik-cik; tapi KesahNa e ndemi kita alu kuasa, kekelengen, bage pe gelah ngasup kita ngkuasai dirinta.

⁸E maka ola kam mela ersaksi kerna Tuhanta; bage pe ola kam mela kerna aku si ipenjaraken erkiteken Kristus. Tapi buat baginndu i bas kiniseran guna Berita Si Meriah bagi ibereken Dibata man bandu gegeh guna si e.

⁹Kita enggo iselamatkenNa janah enggo kita ipilihNa jadi sikerajangenNa, labo erkiteken kai si ibahan kita, tapi erkiteken sura-suraNa dingen lias ateNa nge. Lias ateNa e iberekenNa arah Kristus Jesus ope denga tembe si nasa lit enda.

¹⁰Tapi genduari perkuah ateNa e enggo tangkas man banta arah kerehen Si Ngkelini kita, Kristus Jesus. Jesus enggo naluken kuasa kematen janah enggo ipetangkasNa kegeluhen si la erkeri-kerin arah Berita Si Meriah.

¹¹Aku enggo iangkat Dibata jadi rasul dingen guru guna pembarken Berita Si Meriah. [3†]

¹²Janah erkiteken si me maka aku ngenanami kiniseran-kiniseran. Tapi tetap aku tek, sabap kutandai nge ise penalemenku. Janah tek aku IA ngasup ngkawali aku ras si enggo iendeskenNa man bangku seh ku Wari pendungi e.

¹³Tagangilah alu nteguh kata si kuajarken man bandu, jadi usihen si man ikutenkenndu. Janah tetaplah kam i bas kiniteken ras kekelengen si idat kita erkiteken persadanta ras Kristus Jesus.

¹⁴Jagalah erta-erta si mehuli si enggo iendesken Dibata man bandu arah Kuasa Kesah Si Badia si ringan i bas kita.

¹⁵Ietehndu maka kerina kalak si ringan i Propinsi Asia enggo nundalken aku, ikut pe Pigelus ras Hermogenes.

¹⁶Icidahken Tuhan min perkuah ateNa man keluarga Onesiporus, sabap aku enggo megati iapulina. La mela iakapna aminna pe ietehna aku i bas penjara.

¹⁷Tapi seh kenca ia i Roma minter aku idaramina ngayak jumpa.

¹⁸Tuhanlah mereken perkuah ateNa man Onesiporus i bas Wari e pagi! Tangkas kal ietehndu maka megati aku isampatina i Epesus.