Read Batak Karo 2 TIMOTIUS 3 Bible Online

2 TIMOTIUS 3 - Batak Karo bible

2 TIMOTIUS 3

¹Ingetlah! I bas wari-wari pendungi pagi mbue reh kiniseran.

²Sanga si e pagi manusia nggeluh ngukurken dirina saja, merangap, meganjang rukur dingen nipu. Cekurak ia, la ibegikenna kata nande-bapana, la ia nggit ngataken bujur, dingen lanai diatena eragama.

³Lanai lit i bas ia kekelengen dingen ate mekuah. Ijurukenna kalak si deban. La ia ralang-alang merawa dingen merampus. La atena ngena si mehuli.

⁴Idayakenna temanna, njulmit ukurna dingen meganjang ukurna. Lanai diatena Dibata, tapi kesenangen saja idaramina.

⁵Tempa-tempa idalankenna aturen-aturen agama, tapi kuasa agama si tuhu-tuhu itulakna. Kalak si bagi enda ola deheri.

⁶Piga-piga kalak pagi i bas si e lawes kirumah-kirumah, mpengaruh diberu-diberu si kote kinitekenna, si mberat baban dosana dingen dem erbage-bage kerincuhen kula,

⁷e me diberu si megati erlajar atena tapi la pernah ietehna kai kin si tuhu-tuhu ngena ate Dibata.

⁸Bagi Jannes ras Jambres nimbak Musa nai, bage pe kalak enda nimbak kai si tuhu-tuhu ngena ate Dibata. Lanai ia ngasup rukur, janah sia-sia kinitekenna. [6†]

⁹Tapi labo banci sempat mbelang bekasna, sabap kerina pagi kalak meteh maka ia bodoh, bali ras si jadi nandangi Jannes ras Jambres.

¹⁰Tapi kam enggo ikutkenndu kai si kuajarken, kai si kubahan bage pe kai tujun geluhku. Enggo iperdiatekenndu kinitekenku, kesaberenku, kekelengenku, kinigenggengenku.

¹¹Enggo idahndu aku isiksa bage pe ngenanami erbage-bage kiniseran. Ietehndu kerinana si jadi man bangku i Antiokia, i Ikoni ras i Listera. Melala kal kiniseran si enggo kunanami, tapi i bas si e kerina isampati Tuhan aku. [7†]

¹²Kalak si nggit nggeluh rikutken si ngena ate Dibata i bas persadan ras Kristus Jesus, la banci la ngenanami kiniseran.

¹³Kalak jahat ras penipu reh dekahna reh jahatna; itipuna kalak janah ia pe kena tipu.

¹⁴Tapi kam, tetaplah ndalanken kebenaren si rehna i bas Dibata nari si enggo iajarken man bandu dingen enggo tuhu-tuhu kam tek. Ietehndu kap ise nai si ngajari kam.

¹⁵Janah ingetndu pe maka kitik-kitikndu nari enggo ietehndu kerna Pustaka Si Badia, si ngasup mereken kepentaren man bandu, e me si mabai kam ku keselamaten arah kiniteken man Kristus Jesus.

¹⁶Kerina si tersurat i bas Pustaka Si Badia rehna i bas Dibata nari janah erguna i bas ngajari kalak kerna si ngena ate Dibata, mandang si lepak, pekena si salah dingen erguna i bas mereken pedah-pedah gelah nggeluh alu mehuli.

¹⁷Gelah kalak si nehken sura-sura Dibata cukup saratna ras ilengkapi guna erbahan kerina perbahanen si mehuli.