Read Batak Karo 2 TIMOTIUS 4 Bible Online

2 TIMOTIUS 4 - Batak Karo bible

2 TIMOTIUS 4

¹Jesus Kristus reh denga pagi jadi Hakim nandangi kalak si nggeluh ras si enggo mate. IpantekiNa pagin KinirajanNa. E maka kupindoken kal man bandu i lebe-lebe Dibata ras Jesus Kristus:

²Pembarkenlah Berita e, subuk tengteng ras la tengteng paksana terusken gelah beritaken. Cidahken salah kalak, persingeti dingen pegegehi ia sanga iajarkenndu ia alu dem kesabaren.

³Reh me pagi paksana lanai ibegiken kalak pengajaren si tuhu-tuhu. Sura-surana saja me idalankenna. Ipepulungna guru-guru guna ngajari ia kerna kai si iakapna ntabeh megikenca.

⁴La ibegikenna pengajaren si tuhu-tuhu, tapi tutus atena megiken turi-turin si la tuhu.

⁵Tapi kam, ntah kai gia jadi, ola bene ukurndu. Megenggenglah i bas ngenanami kiniseran. Dahikenlah dahin meritaken Berita Si Meriah e, janah dalankenlah tanggung jabapndu jadi suruh-suruhen Dibata.

⁶Tapi aku, enggo seh paksana ipersembahken. Enggo seh paksana aku nadingken kegeluhen enda.

⁷Enggo kupala-palai asa ngasupku i bas perlumban e, enggo seh aku ku garis batas, janah enggo kucikep kiniteken e.

⁸E maka genduari enggo sikap pemere kemenangen e guna iendesken man bangku, e me rudang-rudang kebenaren si ibereken Tuhan, Hakim si adil, si iberekenNa man bangku i bas Wari e. Janah pemere e labo man bangku saja, tapi pe man kerina kalak si nimai kerehenNa alu erkeleng ate.

⁹Usahakenlah maka pedas kam reh ndahi aku.

¹⁰Demas enggo nadingken aku janah genduari ia erngena ate man doni si genduari enda. Enggo lawes ia ku Tesalonika. Si Kresens pe enggo lawes ku Galati janah Titus ku Dalmati. [8†]

¹¹Lukas nari ngenca ras aku. Legi Markus gelah ras kam ku jenda, sabap banci ia nampati aku i bas dahinku. [9†]

¹²Tikikus enggo kusuruh ku Epesus. [10†]

¹³Adi reh kam baba mantelku, tading kubahan i Troas i bas si Karpus. Baba pe kitap-kitapku, terlebih-lebih kitap kulit e. [11†]

¹⁴Aleksander, tukang tembaga e, enggo megati erbahan jahat man bangku. Tuhanlah mbalassa perbahanenna e. [12†]

¹⁵Kam pe metengetlah nandangi ia, sabap megegeh kal ia ngelawan kai si iberitaken kita.

¹⁶Asum tangtangna aku iadili, ise pe la lit nemani aku; kerina nadingken aku. Mbera-mbera la itak-taki Dibata si enda man bana!

¹⁷Tapi Tuhan tetap nemani aku, iberekenNa man bangku gegeh, seh maka tuhu-tuhu i bas paksa e ngasup aku meritaken Berita Si Meriah e man bangsa si erbage-bage. Ipulahi Tuhan aku tempa-tempa i bas babah singa nari.

¹⁸Janah ipulahi Tuhan me pagi aku i bas kerina si jahat nari, jenari ibabaNa aku alu selamat ku bas KinirajanNa i Surga. Man baNalah kemulian seh rasa lalap. Amin.

¹⁹Kataken mejuah-juah man Persila ras perbulangenna Akuila, bage pe man Onesiporus sada jabu. [13†]

²⁰Erastus genduari i Korinti, janah Tropimus kutadingken i Mileti, sabap sakit ia. [14†]

²¹Usahaken kal gelah reh kam ope denga musim mbergeh. Eubulus, Pudens, Linus ras Klaudia ngataken mejuah-juah man bandu, bage pe kerina senina-senina si enggo tek man Jesus Kristus.

²²Tuhanlah nemani kam. Lias ate Dibata ras kam kerina gelah.