Read Batak Karo 1 JOHANES 1 Bible Online

1 JOHANES 1 - Batak Karo bible

1 JOHANES 1

¹Isuratken kami man bandu kerna Kata si mereken kegeluhen, si enggo lit ope denga kai pe lit. Enggo ibegi kami Kata e, enggo idah kami alu mata kami; tuhu-tuhu enggo idah kami, janah enggo pe idadap kami alu tan kami. [1†]

²Kenca kegeluhen e ncidahken diriNa, enggo idah kami IA, e maka ngerana kami kerna si e, janah ituriken kami man bandu kerna kegeluhen si tuhu-tuhu si la erkeri-kerin si lit i bas Bapa si enggo ipetangkas man kami. [2†]

³Kai si enggo idah kami dingen ibegi kami e, iberitaken kami man bandu pe gelah kam ikut ras kami ersada ras Bapa dingen ras AnakNa Jesus Kristus.

⁴Isuratken kami enda man bandu gelah kuh keriahenta.

⁵Enda me berita si enggo ibegi kami i bas AnakNa e nari janah ipeseh kami man bandu: Dibata terang kap janah la lit sitik pe si gelap i bas IA.

⁶Dage, adi ninta ersada kita ras IA, tapi nggeluh kita i bas gelap, erbual kap kita i bas kata ras perbahanenta.

⁷Tapi adi nggeluh kita i bas terang bali e ras IA nggeluh i bas terang; lit persadanta sapih-sapih kita janah kematen Jesus, AnakNa e mbersihken kita i bas kerina dosa nari.

⁸Adi ninta maka la lit dosanta, sitipu kap dirinta, janah Kata si tuhu-tuhu i bas Dibata nari la lit i bas kita.

⁹Tapi adi siakuken dosanta man Dibata, isehkenNa me padanNa, ilakokenNa kai si bujur, ialemiNa dosa-dosanta, janah ibersihkenNa kita i bas kerina perbahanenta si la payo.

¹⁰Adi ninta maka la kita erdosa, sibahan Dibata jadi perguak, janah KataNa la lit i bas kita.