Read Batak Karo 1 JOHANES 3 Bible Online

1 JOHANES 3 - Batak Karo bible

1 JOHANES 3

¹Nehen uga kelengna ate Bapa man banta! Bage belinna kekelengenNa man banta seh maka kita igelari anak-anak Dibata. Janah labo gelar saja, tapi tuhu-tuhu me kita anak-anak Dibata. Enda me sabapna maka doni si jahat enda la nandai kita: sabap doni la nandai Dibata. [4†]

²O kam si kukelengi, kita enda genduari anak-anak Dibata, tapi kuga kita pagi, langa ipetangkas man banta. Tapi sieteh maka kenca pagi reh Kristus, bali me kita ras IA, sabap siidah me IA bagi si tuhu-tuhuna.

³Kalak si bagenda pengarapenna nandangi Kristus, ijagana bana gelah tetap bersih i bas dosa-dosa nari, bali ras Kristus pe bersih i bas dosa nari.

⁴Kalak si erbahan dosa, ilanggarna pe perentah Dibata, sabap dosa e me ngelanggar perentah Dibata.

⁵Itehndu maka Kristus enggo reh ku doni enda guna ngangkut dosa manusia, janah IA jine la erdosa. [5†]

⁶Jadi kerina kalak si nggeluh i bas persadan ras Kristus lanai iteruskenna erbahan dosa; tapi si terus erbahan dosa, langa idahna Kristus ntah pe langa itandaina IA.

⁷O anak-anakku, ola pelepas ise pe mabai kam papak! Kalak si ngelakoken si ngena ate Dibata asalna i bas Dibata nari, bali ras Kristus pe asalna i bas Dibata nari.

⁸Tapi kalak si terus erbahan dosa ia sikerajangen Iblis kap, sabap Iblis e erdosa mula-mula nari kin. Anak Dibata reh ku doni enda guna engkernepken pendahin Iblis.

⁹Ise si enggo jadi anak Dibata la iteruskenna erbahan dosa, sabap biak Dibata lit i bas ia. Janah erkiteken Dibata kap Bapana, lanai banci iteruskenna erbahan dosa.

¹⁰Enda me lainna anak-anak Dibata ras anak-anak Iblis: ise si la ngelakoken si ngena ate Dibata, ntah pe la ikelengina seninana ia labo anak Dibata.

¹¹Mula-mulana nari kin enggo ibegindu berita enda, e me kita arus sikeleng-kelengen. [6†]

¹²Ola bagi Kain si jadi anak Iblis, agina pe ibunuhna. Engkai kin maka ibunuh Kain agina? E me erkiteken kai si ibahan Kain salah, janah kai si ibahan agina, rikutken si ngena ate Dibata. [7†]

¹³Jadi ola mamang atendu o senina-senina, adi nembeh ate bangsa doni enda man bandu.

¹⁴Sieteh kap maka enggo sitadingken kematen janah lawes kita ku kegeluhen; si enda sieteh perbahan keleng ateta seninanta. Kalak si la erkeleng ate, tandana ia tetap denga i teruh kuasa kematen. [8†]

¹⁵Kalak si nembeh atena seninana, pemunuh kap. Janah ietehndu maka kalak pemunuh la lit i bas ia kegeluhen si tuhu-tuhu si la erkeri-kerin.

¹⁶Arah enda me sieteh kekelengen e: Kristus enggo ngendesken geluhNa man gunanta. E maka kita pe arus ngendesken geluhta guna seninanta.

¹⁷Adi lit sekalak bayak idahna seninana kekurangen, tapi la atena mekuah man seninana e, kuga banci kalak si bage ngatakenca maka keleng atena Dibata?

¹⁸O anak-anakku, kekelengenta ola terjeng biber saja ntah pe i bas cakap saja ngenca. Arus maka tuhu-tuhu kekelengenta e, si teridah arah perbahanenta.

¹⁹Bagenda me dalanna maka si eteh kita bengket ku bas si asalna i bas Dibata nari, seh maka tetap ukurta i adep-adepen Dibata.

²⁰Adi pusuh peratenta nalahken kita, sieteh maka Dibata belinen asa pusuh peratenta, janah kai pe ietehNa.

²¹E maka o senina-senina si kukelengi, adi pusuh peratenta la nalahken kita, tetap kap ukurta i adep-adepen Dibata.

²²Kai pe si ipindo kita man baNa iberekenNa nge, sabap patuh kita ngikutken perentahNa janah sibahan si ngena ateNa.

²³Si iperentahkenNa man banta e me kap arus maka kita tek man AnakNa, e me Jesus Kristus; janah kita arus sikeleng-kelengen bagi enggo ipedahken Kristus man banta. [9†]

²⁴Ise si patuh ngikutken perentah-perentah Dibata, ia nggeluh i bas persadan ras Dibata janah Dibata nggeluh i bas persadan ras ia. Janah sieteh maka Dibata nggeluh i bas persadan ras kita erkiteken KesahNa si iberekenNa man banta.