Read Batak Karo 1 JOHANES 5 Bible Online

1 JOHANES 5 - Batak Karo bible

1 JOHANES 5

¹Ise si tek maka Jesus e me Mesias si ipadanken e, ia me kap anak Dibata; janah ise si ngkelengi Bapa, ikelengina pe anak Bapa e.

²Bagenda me dalanna maka sieteh kita ngkelengi anak-anak Dibata, e me: alu ngkelengi Dibata ras patuh man perentah-perentahNa.

³Ngkelengi Dibata ertina patuh man perentah-perentahNa. Perentah-perentah e labo mberat, [11†]

⁴sabap kerina anak-anak Dibata enggo naluken doni enda. Janah doni enda sitaluken alu kinitekenta man Jesus Kristus.

⁵Ise kin si naluken doni enda? E me kalak si tek maka Jesus e me Anak Dibata.

⁶Jesus Kristus me si enggo reh ku doni enda. IA reh alu lau lakon peridinNa ras dareh kematenNa. IA reh labo alu lau saja tapi alu lau ras dareh. Janah Kesah e jine naksiken maka si enda tuhu me, sabap Kesah e kebenaren kap.

⁷Dage lit telu saksi:

⁸Kesah, lau ras dareh; janah teluna sada kesaksinna.

⁹Tek kita nandangi kesaksin manusia; tapi ndauh gegehen kesaksin si ibereken Dibata. Janah enda kesaksin si enggo ibereken Dibata kerna AnakNa.

¹⁰E maka kalak si tek Anak Dibata, enggo lit kesaksin enda i bas dirina jine. Tapi kalak si la tek Dibata, enggo ibahanna Dibata e perguak, sabap la ia tek kai si enggo isaksiken Dibata kerna AnakNa.

¹¹Enda me kesaksin e: Dibata enggo mereken man banta kegeluhen si tuhu-tuhu si la erkeri-kerin, janah AnakNa e me sumbul kegeluhen e. [12†]

¹²Kalak si lit i bas ia Anak e, i bas ia lit kegeluhen e; kalak si la lit i bas ia Anak Dibata e, la lit i bas ia kegeluhen.

¹³Kusuratken enda man bandu gelah itehndu kegeluhen si tuhu-tuhu si la erkeri-kerin enggo jadi sikerajangenndu e me kam si tek i bas gelar Anak Dibata.

¹⁴La kita mbiar i bas adep-adepen Dibata sabap ibegikenNa kita adi sipindo man baNa kai si sentudu ras peratenNa.

¹⁵IbegikenNa kita katawari pe adi kita mindo man baNa; erkiteken sieteh maka enda tuhu me, sieteh pe maka iberekenNa man banta kai si ipindo kita i bas IA nari.

¹⁶Adi idahndu seninandu erbahan dosa si la maba kematen, arus maka kam ertoto man Dibata, janah iberekenNa nge kegeluhen man kalak si erdosa e. Enda ibahan man kalak si dosana la maba kematen. Tapi lit dosa si maba kematen, janah la kukataken maka arus kam ertoto man Dibata kerna dosa si bage.

¹⁷Kerina perbahanen si salah dosa kap, tapi lit dosa si la maba kematen.

¹⁸Sieteh maka kalak si enggo jadi anak Dibata labo terus erbahan dosa, sabap Anak Dibata njagai ia, janah si Jahat e la ngasup erbahan kai pe man bana.

¹⁹Sieteh maka asalta i bas Dibata nari aminna gia kerina doni enda lit i bas kuasa si Jahat e.

²⁰Sieteh maka Anak Dibata enggo reh ku doni enda. Enggo iberekenNa man banta kepentaren gelah sitandai Dibata si tuhu-tuhu. Kita kerina lit i bas Dibata si tuhu-tuhu e arah AnakNa Jesus Kristus. IA me Dibata si tuhu-tuhu, janah enda me kegeluhen si tuhu-tuhu si la erkeri-kerin e.

²¹O anak-anakku, jagai dirindu i bas dibata-dibata si perguak nari!