Read Batak Karo HAKIM-HAKIM 1 Bible Online

HAKIM-HAKIM 1 - Batak Karo bible

HAKIM-HAKIM 1

¹Kenca Josua mate isungkun bangsa Israel TUHAN nina, “Suku si apai kami arus lebe lawes erperang ngelawan bangsa Kanaan?”

²Nina TUHAN njabapsa, “Suku Juda lebe. Aku merekenca negeri e ku bas kuasana.”

³Nina kalak Juda man kalak Simeon, “Ota ras kita ku negeri si enggo itetapken man kami, gelah ras kita erperang ngelawan bangsa Kanaan. Kenca bage ras kita ku negeri si enggo itetapken man bandu.” Bage me, suku Simeon

⁴ras suku Juda lawes ku peperangen. TUHAN mereken kemenangen man kalak enda i bas peperangen ngelawan bangsa Kanaan ras bangsa Peris, janah italuken kalak enda lit sepuluh ribu kalak teremna i Besek.

⁵Ijumpaina i je Adonibesek, e maka ilawan kalak enda ia.

⁶Kiam Adonibesek, tapi iayaki kalak enda, itangkapna, jenari ikeretna indung jari-jari tan ras nahena.

⁷Nina Adonibesek, “Pitu puluh raja si enggo ikeret indung jari-jari tan ras nahena mumahi iba-iba nakan i teruh mejangku. Dibata mahanca genduari man bangku bagi kai si kubahan man kalak e.” Ibaba ia ku Jerusalem, janah i je me ia mate.

⁸Jenari iperang kalak Juda kuta Jerusalem janah talu ibanna kuta e. Ibunuhina rayatna ras icilukna kuta e.

⁹Kenca si e lawes ia merang bangsa Kanaan si tading i deleng-deleng negeri e, i teruh deleng-deleng e, ras i negeri si kerah arah Selatan.

¹⁰Erdalan kalak enda ngelawan bangsa Kanaan si tading i kuta Hebron, si nai igelari Kiryat Arba. I jah italukenna suku Sesai, Ahiman ras Talmai.

¹¹I jah nari erdalan kalak Juda ngelawan kuta Debir, si paksa e igelari Kiryat Seper.

¹²Sekalak i bas kalak enda, Kalep gelarna nina, “Kuserehken anakku Aksah man kalak si ngasup naluken Kiryat Seper.”

¹³Otniel anak Kenas, e me anak senina Kalep, naluken kuta e, e maka iserehken Kalep anakna Aksah man Otniel.

¹⁴I bas wari perjabun e, iasak Otniel ndeharana mindo selambar juma man bapana. Nusur Aksah i das keledena nari, e maka isungkun Kalep kai ate anakna.

¹⁵Nina Aksah njabapsa, “Ulu lau ateku. Taneh si enggo iberekenndu bangku taneh kerah kap e.” E maka ibereken Kalep man anakna ulu lau si arah gugung ras si arah berneh.

¹⁶Sinursur mama Musa e me kalak Keni, lawes terus ras suku Juda i Jeriho nari, si igelari kuta Batang Palma e, ku daerah gurun pasir arah Selatan Arad i Juda. I jah me kalak enda tading i tengah-tengah bangsa Amalek.

¹⁷Kalak Juda lawes ras kalak Simeon. Isumpahi ras ikernepkenna kuta e, e maka ibahanna gelarna Hormah.

¹⁸[18-19] TUHAN si nampati bangsa Juda. Erkiteken si e, daerah si erdeleng-deleng enggo jadi sikerajangen Juda. Tapi daerah sekelewet Gasa, Askelon, ntahpe Ekron ras daerah-daerah sekelewetna la tertalukenca. Bangsa e ringan i gedang-gedang tepi lawit, lit gereta besina. E maka kalak Juda la ngasup nalukenca.

²⁰Bali ras si enggo iperentahken Musa, Hebron enggo ibereken man Kalep. Kalep enggo mpelawes telu suku sinursur Anak i bas kuta e nari. [1†]

²¹Tapi la ipelawes kalak Benyamin bangsa Jebusi si tading i Jerusalem. E maka bangsa Jebusi tetap denga tading i je ras kalak Benyamin. [2†]

²² [22-23] Suku Eperaim ras suku Manase, kesusuren Jusup lawes erperang ngelawan kuta Betel; paksa si e Betel igelari Lus. Isampati TUHAN kalak enda. Isuruh kalak enda mata-mata ku kuta e.

²⁴Mata-mata ndai jumpa ras sekalak dilaki e maka isungkunna dilaki ndai nina, “Tuduhken man kami kuga dalanna maka banci bengket ku bas kuta e. Adi ituduhkenndu la kam isakiti kami.”

²⁵E maka ituduhkenna dalan e man mata-mata ndai, jenari ibunuh bangsa Eperaim ras Manase kerina si i bas kuta e, seakatan dilaki si sekalak ndai ras keluargana.

²⁶Arah pudi lawes ia ku negeri Heti, ipantekina sada kuta i jah, janah kuta ndai igelarina Lus, seh ngayak genduari pe e denga nge gelarna.

²⁷Kalak si la ipelawes suku Manase e me si ringan i kuta-kuta Bet San, Tanak, Dor, Ibleam, Megido ras kalak si ringan i deher kuta-kuta enda ndai. Kalak Kanaan tetap ertahan i je. [3†]

²⁸Kenca bangsa Israel enggo jadi bangsa si megegeh, ipaksana bangsa Kanaan e erdahin man bana, tapi amin bage gia labo ipelawesna kerina bangsa e.

²⁹Suku Eperaim la ipelawesna bangsa Kanaan si ringan i kuta Geser. E maka bangsa Kanaan terus ringan i jah ras suku Eperaim. [4†]

³⁰Suku Sebulon la ipelawesna bangsa si ringan i kuta Kitron ras Nahalal. E maka bangsa Kanaan terus ringan i jah ras suku Sebulon, tapi ipaksana kalak e erdahin guna suku Sebulon.

³¹Suku Aser la ipelawesna bangsa si tading i kuta Akko, Sidon, Ahlab, Aksip, Helba, Apek ras Rehop.

³²Kalak Aser nggeluh ras bangsa Kanaan si ringan i bas daerah e, erkiteken la ipelawesna bangsa Kanaan e.

³³Suku Naptali la ipelawesna bangsa si ringan i kuta Bet Semes, ras Betanat. Kalak Naptali nggeluh ras bangsa Kanaan si ringan i bas daerah e, tapi ipaksana bangsa Kanaan erdahin guna kalak Naptali.

³⁴Iasak bangsa Amori suku Dan ku daerah deleng-deleng, janah la ipediatna bangsa e mulihken ku berneh.

³⁵Bangsa Amori terus nggeluh i Ayalon, Salbim, ras i Deleng Heres, tapi bangsa-bangsa e lit i teruh kuasa suku Manase ras suku Eperaim. E maka ipaksana kalak e erdahin man gunana.

³⁶I Utara Sela, baleng daerah bangsa Edom mentasi Baluren Akrabim.