Read Batak Karo HAKIM-HAKIM 10 Bible Online

HAKIM-HAKIM 10 - Batak Karo bible

HAKIM-HAKIM 10

¹Kenca mate Abimelek, Tola anak Puah, kempu Dodo reh mbebasken Israel. Ia i bas suku Isakar nari janah ringan i Samir i deleng-deleng Eperaim.

²Ia jadi peminpin Israel dua puluh telu tahun dekahna. Kenca ia mate e maka ikuburken i Samir.

³Kenca Tola, keke ka Jair i Gileat nari. Ipinpinna Israel dua puluh dua tahun.

⁴Anakna lit telu puluh kalak si ngersak telu puluh kelede. Lit telu puluh kutana i negeri Gileat, janah seh asa genduari igelari kuta-kuta Jair.

⁵Mate si Jair e maka ikuburken i Kamon.

⁶Bangsa Israel erbahan dosa denga man TUHAN alu nembah man Baal ras Astarte, bage pe man dibata-dibata Siria, Sidon, Moap, Amon ras Pilisti. Itadingkenna TUHAN janah ngadi ia nembah man baNa.

⁷E maka merawa TUHAN man bangsa Israel, janah ipelepasNa bangsa Pilisti ras bangsa Amon ngkuasaisa.

⁸Sepuluh waluh tahun dekahna bangsa Pilisti ras Amon nindih ras ngayak-ngayak bangsa Israel si ringan i negeri bangsa Amori i Timur Lau Jordan i Gileat.

⁹Bangsa Amon pe ngepari Lau Jordan merangi suku Juda, Benyamin ras Eperaim. Israel lit i bas kiniseran si mbelin.

¹⁰E maka erlebuh bangsa Israel ku TUHAN nina, “Enggo kami erdosa man baNdu, erkiteken itadingken kami Kam, Dibata kami, janah isembah kami Baal.”

¹¹Ibereken TUHAN jabapen enda, “Bangsa Mesir, bangsa Amori, bangsa Amon, bangsa Pilisti,

¹²bangsa Sidon, bangsa Amalek, ras bangsa Maoni ndedeh kam i bas paksa si lepas, e maka erlebuh kam man bangKu. La kin kam Kuselamatken i bas kalak e nari?

¹³Tapi itadingkenndu kang Aku janah nembah man dibata-dibata si deban, e maka tetap nge ateKu lanai mulahi kam.

¹⁴To lebuh dibata-dibata si enggo ipilihndu. Suruh ia mulahi kam katawari kam i bas kiniseran.”

¹⁵Tapi nina bangsa Israel man TUHAN, “Kami enggo erdosa. Bahanlah kai ateNdu, saja ngenca ngarap kami gelah ibebaskenNdu kami genduari.”

¹⁶E maka iambekkenna dibata-dibata si deban, jenari isembahna TUHAN. E maka lanai tahan TUHAN ngidah kiniseran Israel.

¹⁷Kenca bage ersikap tentera bangsa Amon ku peperangen, janah erkemah ia i Gileat. Bangsa Israel pulung janah erkemah i kuta Mispa i Gileat.

¹⁸I jah nina bangsa Israel ras peminpinna sapih-sapih ia, “Ise pang arah lebe ngelawan bangsa Amon. Ia jadi peminpin kerina kalak si ringan i Gileat.”