Read Batak Karo HAKIM-HAKIM 11 Bible Online

HAKIM-HAKIM 11 - Batak Karo bible

HAKIM-HAKIM 11

¹Jepta e me kap sekalak tentera si mbisa i Gileat nari. Ia anak sekalak diberu si pendahinna erlua-lua. Bapana Gileat gelarna.

²Ndehara Gileat mupus piga-piga anak dilaki. E maka kenca anakna ndai mbelin ipelawesna Jepta i rumahna nari. Nina, “Kam la dat kai pe i bas tading-tadingen bapa kami. Kam la anak nande kami.”

³Kiam Jepta nadingken seninana, ringan i negeri Tob. I jah ipepulungna sada terpuk kalak mampa-mampa e maka ras ia ku japa pe.

⁴Piga-piga wari dekahna kenca si e reh bangsa Amon erperang ngelawan Israel.

⁵Sanga kejadin e, ilegi peminpin bangsa Israel Jepta ku Tob.

⁶Nina, “Mari pinpin kami, maka banci silawan bangsa Amon e.”

⁷Tapi nina Jepta njabapsa, “Perbahan nembeh kal atendu aku ipelawesndu aku i rumah bapangku nari. Engkai maka kam reh man bangku genduari sanga kam i bas kiniseran?”

⁸Nina peminpin Israel man Jepta, “Kami mulihken ngelegi kam genduari erkiteken ras ate kami kita, gelah silawan bangsa Amon, dingen minpin kerina penduduk Gileat.”

⁹Nina Jepta, “Adi ibabandu aku mulih ku Gileat ngelawan bangsa Amon, janah ibereken TUHAN man banta kemenangen, aku pagi si merentah kam kerina.”

¹⁰Nina kalak ndai, “Kami setuju. TUHAN jadi saksinta.”

¹¹E maka lawes Jepta ras peminpin-peminpin Gileat, janah ibahan rayat maka Jepta merentah ras jadi peminpinna. Jepta nuntut sarat-sarat e i adep-adepen TUHAN i Mispa.

¹²Kenca bage itenahken Jepta berita man raja bangsa Amon nina, “Kai kin perubatenta? Engkai atendu merangi negeringku?”

¹³Ijabap raja Amon tenah Jepta, “Sanga bangsa Israel ndarat i Mesir nari, ibuatna tanehku mulai i Lau Arnon nari seh ku Lau Jabok ras Lau Jordan. Genduari arus maka iulihkenndu e alu dame.”

¹⁴Itenahken Jepta ka tenah mulihken man raja Amon

¹⁵alu jabapen enda, “Labo payo ibuat Israel negeri Moap ntah negeri Amon.

¹⁶Si payo e me: sanga bangsa Israel nadingken Mesir ia erdalan mentasi gurun pasir ku Teluk Akaba janah seh i Kades.

¹⁷E maka isuruhna sekalak pertenahen ku raja Edom mindo ijin erdalan mentasi negeri e. Tapi la ibere raja Edom pemindonna. Raja Moap pe isungkun kalak enda kang, tapi raja e pe la meresa bangsa Israel erdalan mentasi negeri e. E maka tading bangsa Israel i Kades. [11†]

¹⁸Kenca bage maka lawes bangsa Israel arah gurun pasir, erdalan ngkelewati negeri Edom ras negeri Moap ngayak seh kalak enda i Timur Moap i lepar Lau Arnon. Erkemah ia i jah, tapi la ikeparina Lau Arnon erkiteken Lau Arnon e me perbalengen Moap. [12†]

¹⁹E maka itenahken bangsa Israel pertenahen ndahi Sihon raja bangsa Amori i Hesbon, janah mindo gelah iberena min kalak Israel erdalan mentas arah negeri e ku negerina. [13†]

²⁰Tapi la ibere Sihon pemindon Israel e. Ipepulungna kerina tenterana, ipajekkenna kemahna i Jahas, iserangna Israel.

²¹Tapi TUHAN, Dibata Israel, mereken kemenangen man bangsa Israel ngelawan Sihon ras kerina tenterana. E maka ibuat Israel negeri sikerajangen bangsa Amori si ringan i daerah e.

²²Ibuat Israel kerina daerah Amori i Lau Arnon nari arah Selatan seh ku Lau Jordan arah Barat.

²³Dage TUHAN, e me Dibata nu Israel, pelawes bangsa Amori guna bangsaNa, bangsa Israel.

²⁴Icubakenndu kin atendu muatca e mulihken? Banci man bandu kai si ibereken dibatandu Kemos man bandu. Tapi man kami kai si enggo ibereken TUHAN Dibata kami man kami.

²⁵Akapndu kin kam ulin asang Balak anak Sipor, raja Moap? Pernah kin idilona Israel rubat? Pernah kin ia lawes erperang ngelawan Israel? [14†]

²⁶Enggo telu ratus tahun Israel muat Hesbon ras Aroer, ras kuta-kuta sekelewetna ras kerina kuta-kuta i tepi Lau Arnon. Engkai maka i bas paksa si e la ibuatndu mulihi?

²⁷Lang, la lit kubahan salah man bandu. Kam salah alu mahan perang ras aku. TUHAN jadi hakim. Ia jadi hakim kerna bangsa Israel ras bangsa Amon.”

²⁸Tapi la diate raja Amon tenah Jepta.

²⁹Kenca bage nusur Kesah TUHAN man Jepta. Ia erdalan mentasi Gileat ras Manase, jenari mulihken ku Mispa i Gileat terus ia ku Amon.

³⁰Erpadan Jepta ku TUHAN nina, “Adi iberekenndu kemenangen man bangku naluken bangsa Amon,

³¹ise si pemenana ndarat i rumahku nari ngalo-ngalo aku sanga aku mulih i bas kemenangen nari kututung e jadi persembahen. Kupersembahken e man Bandu jadi korban.”

³²E maka ikepari Jepta lau belin e ngelawan bangsa Amon, janah TUHAN mereken kemenangen man bana.

³³Ielis-elisna bangsa Amon i Aroer nari terus ku daerah Minit; lit dua puluh kuta buena, seh ku Abel Keramim. I je me pembunuhen si mbelin, janah bangsa Amon enggo italuken Israel.

³⁴Sanga Jepta mulih ku Mispa, i jah ialo-alo anakna diberu ia, landek dingen malu gendang. Sada e kal ngenca anakna.

³⁵Kenca idahna anak e, irigatkenna bajuna i bas kepiceten ukur nina, “O anakku! Igetemkenndu pusuhku! Engkai maka kam kal si erbahanca ukurku ceda? Enggo aku erpadan tuhu-tuhu man TUHAN, janah perpadanen e arus isehken!” [15†]

³⁶Nina anakna e man bana, “Adi enggo ibahanndu perpadanen ras TUHAN lakokenlah kai atendu ilakokenndu kerna aku, erkiteken TUHAN enggo erbalas man musuh-musuhndu bangsa Amon.”

³⁷Tapi ipindona man bapana, “Sada kal pemindonku. Bere aku nggeluh dua bulan nari, gelah banci aku ras teman-temanku ku deleng-deleng, gelah i jah banci kutangisi bangku sabap aku arus mate sanga singuda-nguda denga.”

³⁸Ipelepasna anakna e lawes nggeluh dua bulan nari. Ia ras teman-temanna lawes nangkih deleng janah erceda ate erkiteken arus mate langa erjabu ras langa lit anakna.

³⁹Kenca dua bulan mulihken ia ndahi bapana. Ilakoken Jepta rikutken kai si enggo ipadankenna man TUHAN, e maka mate anak e tupung ia singuda-nguda denga. Si e enggo jadi adat i Israel,

⁴⁰maka singuda-nguda lawes ngandung empat wari i bas sada tahun kerna anak Jepta i Gileat nari.