Read Batak Karo HAKIM-HAKIM 12 Bible Online

HAKIM-HAKIM 12 - Batak Karo bible

HAKIM-HAKIM 12

¹Kalak Eperaim ersikap lawes erperang. Ikeparina Lau Jordan muat lawes ku Sapon nina man Jepta, “Engkai maka la ilebuhndu kami gelah ras kita ngelawan bangsa Amon? E maka iciluk kami ate kami rumahndu ras kerina isina.”

²Tapi nina Jepta ngaloi, “Aku ras bangsangku mbelin perubaten kami ras bangsa Amon. Enggo kam kulebuh, tapi la kam nggit nampati kami ngelawan bangsa Amon.

³Kenca ieteh kami maka kam la nggit, kuasamken kesahku, kukepari perbalengen kami, janah kuperang kalak e, janah TUHAN mereken kemenangen man bangku. E maka ngkai maka kam reh ngelawan kami genduari?”

⁴Kenca bage ipepulung Jepta kerina kalak Gileat ngelawan kalak Eperaim janah talu ibahanna. (Pernah ikataken kalak Eperaim, “Kam kalak Gileat si ringan i Eperaim ras Manase, enggo kiam i bas bangsa Eperaim nari!”)

⁵Gelah bangsa Eperaim ola kiam, itimai bangsa Gileat i bas ingan-ingan ngepar Lau Jordan. Sanga icubaken bangsa Eperaim kiam alu mindo ijin ngepar, isungkun bangsa Gileat ia, “Bangsa Eperaim kam?” Adi “lang” nina,

⁶isuruhna ia melasken, “Syibolet.” Tapi ibelaskenna “Sibolet” erkiteken la ia beluh melaskenca alu payo. E maka itangkapna janah ibunuhna i bas sada ingan ngepar Lau Jordan. I bas paksa e lit empat puluh dua ribu kalak bangsa Eperaim ibunuh.

⁷Jepta minpin Israel enem tahun dekahna. Kenca bage, mate ia e maka ikuburken i bas kutana i Gileat.

⁸Kenca Jepta, si minpin Israel e me Ibsan i Betlehem nari.

⁹Lit anakna telu puluh kalak dilaki, telu puluh kalak diberu. La ibere Ibsan anakna si dilaki ras si diberu erjabu ras kalak si sada terpuk ras ia, tapi arus ras terpuk si deban. Ibsan minpin Israel pitu tahun dekahna,

¹⁰e maka mate ia janah ikuburken i Betlehem.

¹¹Kenca Ibsan, Elon i Sebulon nari minpin Israel lit sepuluh tahun dekahna.

¹²E maka mate ia janah ikuburken i Ayalon i daerah Sebulon.

¹³Kenca Elon, kalak Israel ipinpin Abdon anak Helel i Piraton nari.

¹⁴Lit empat puluh anakna dilaki ras telu puluh kempuna dilaki, si ngersak pitu puluh kelede. Abdon minpin Israel waluh tahun,

¹⁵e maka mate ia janah ikuburken i Piraton i daerah Eperaim i deleng-deleng Amalek.