Read Batak Karo HAKIM-HAKIM 13 Bible Online

HAKIM-HAKIM 13 - Batak Karo bible

HAKIM-HAKIM 13

¹Bangsa Israel erdosa ka man TUHAN, e maka ipelepasNa bangsa Pilisti ngkuasai bangsa Israel empat puluh tahun dekahna.

²I bas paksa e lit sekalak dilaki i kuta Sora, Manoah gelarna. Ia i bas suku Dan nari. Ndeharana la banci mupus.

³Sekali jadi malekat TUHAN encidahken bana man diberu e, janah nina, “La kam pernah mupus, tapi lanai ndekah nari mehuli kulandu, ipupusndu sekalak anak dilaki.

⁴Tengeti maka ola kam minem anggur ntah bir, ola pan pangan pantangen.

⁵Janah kenca tubuh anak e, la banci iguntingndu bukna, sabap tangtang tubuhna nari anak e enggo iendesken man Dibata jadi kalak Nasir. Ia pagi mulahi Israel i bas bangsa Pilisti nari.” [16†]

⁶E maka lawes diberu e ikatakenna man perbulangenna, nina, “Sekalak jelma i bas Dibata nari enggo njumpai aku, janah potongenna bali ras malekat Dibata si man kebiarenken. La kusungkun i ja nari ia reh, janah la ikatakenna gelarna man bangku.

⁷Tapi ikatakenna man bangku maka mehuli me kulangku gelah kupupus sekalak anak dilaki. Ikatakenna man bangku maka ola aku minem anggur ntah bir, ntah man pangan pantangen, erkiteken anak e iendesken ku Dibata jadi Nasir gedang geluhna.”

⁸E maka ertoto Manoah ku TUHAN nina, “O, TUHAN. Suruh mulihken jelma i bas Dibata nari e ku kami nuriken kai arus ibahan kami kenca tubuh anak e.”

⁹Ibegiken TUHAN pemindon Manoah, e maka mulihken malekat ndai ku diberu e sanga ia kundul i juma. Perbulangenna Manoah la ras ia i je,

¹⁰e maka minter ia kiam janah ikatakenna man perbulangenna nina, “Nen me! Dilaki si reh man bangku i bas wari si enggo lepas icidahkenna bana tole man bangku.”

¹¹Keke Manoah e maka ikutkenna ndeharana. Idahina dilaki e jenari isungkunna nina, “Kam kin dilaki si mbarenda ngerana man ndeharangku?” “Ue,” nina njabapsa.

¹²E maka isungkun Manoah ka nina, “Adi enggo pagi seh si ikatakenndu e, kai arus ilakoken anak e? Kuga pagi kegeluhenna?”

¹³Nina Malekat e njabapsa, “Arus maka inget ndeharandu tuhu-tuhu ngikutken kerina si enggo kukataken man bana.

¹⁴La banci ipanna kai pe si rehna i bas batang anggur nari; la banci iinemna anggur ntah bir; la banci ipanna pangan si ipantangken. Arus ilakokenna kerina si enggo kukataken man bana.”

¹⁵[15-16] La ieteh Manoah maka malekat TUHAN kap e. E maka nina man bana “Ola kam lawes lebe. Gelah kutasakken kambing nguda man bandu.” Tapi nina malekat e, “Aminna pe aku langa lawes, labo banci kupan pangandu. Tapi adi atendu nikapkenca, tutunglah e jadi persembahen man TUHAN.”

¹⁷Nina Manoah, “Kataken man kami ise gelarndu, gelah ieteh kami pehaga kam kenca seh katandu e.”

¹⁸Nungkun malekat e nina, “Engkai maka merincuh kam meteh gelarku? Gelarku gelar si mejin kap.”

¹⁹Kenca bage ibuat Manoah sada kambing nguda ipersembahkenna i babo batar-batar batu man TUHAN si ngelakoken perbahanen si mejin.

²⁰[20-21] Sanga nangkih gebuk api e i bas batar-batar nari, Manoah ras ndeharana ngidah malekat TUHAN nangkih ku surga arah gebuk api e. Kenca bage ieteh Manoah maka jelma e malekat TUHAN kap. E maka ia ras ndeharana nembah, ayona seh ku taneh. Kenca si e lanai pernah idahna malekat TUHAN e.

²²Nina Manoah man ndeharana, “Ugapa pe kita mate, erkiteken enggo siidah Dibata!”

²³Tapi nina ndeharana njabapsa, “Adi ibunuh TUHAN kin ateNa kita, labo icidahkenNa enda kerina ras labo iturikenNa perkara-perkara enda kerina man banta i bas paksa enda.”

²⁴Ipupus diberu e sekalak anak dilaki e maka Simson ibahanna gelarna. Anak e reh belinna janah ipasu-pasu TUHAN ia.

²⁵E maka kuasa TUHAN mulai pegehi ia sanga ia i kelang-kelang Sorah ras Estaol i bas perkemahen Dan.