Read Batak Karo HAKIM-HAKIM 18 Bible Online

HAKIM-HAKIM 18 - Batak Karo bible

HAKIM-HAKIM 18

¹I bas paksa e la lit raja i Israel, janah i bas suku-suku Israel suku Dan langa ndat taneh. Dage suku Dan sangana ndarami taneh jadi daerahna.

²E maka ipilihi kalak Dan lima kalak dilaki si mbisa i bas ia nari. Kenca bage isuruhna berkat i kuta Sorah ras Estaol alu perentah niari negeri e. Kenca ia seh i deleng-deleng Eperaim, ngadi ia i bas rumah Miha.

³Sanga ia i je itandaina logat cakap anak perana suku Lewi e. E maka isungkunna ia nina, “Erkai kam i jenda? Ise maba kam seh ku jenda?”

⁴Nina njabapsa, “Lit arih kami ras Miha, maka igalarina gajingku gelah aku jadi imamna.”

⁵Nina kalak ndai man anak perana e, “Cubaken sungkun Dibata ntah lit ntah lang gunana perdalanen kami enda.”

⁶Nina imam e, “Ola aru atendu. TUHAN si ngarak-ngarak kam i bas perdalanenndu.”

⁷E maka lawes si lima kalak e nadingken ingan ndai ku kuta Lais. Iidahna kuga sikapna kegeluhen kalak si i je seri ras kalak Sidon. Dame, rayatna mehuli, la rubat-rubat, kai atena e lit. Ndauh ia i bas bangsa Sidon nari, janah la lit hubungenna ras kalak si deban.

⁸Kenca si lima kalak enda mulih ku Sorah ras Estaol, ngalo-ngalo kalak si sada suku ras ia janahna nungkun kai si ijumpaina.

⁹“Mari nina kalak e. Ota siserang Lais. Enggo idah kami negeri e, janah tuhu-tuhu kal mejile. Erkai kam i jenda? Ota! Lawes kita, gelah sibuat man banta negeri e!

¹⁰Kenca enggo kam seh i jah, tentu itehndu maka rayat negeri e sitik pe la curiga. Negeri e sada negeri si mbelin. I je kai atendu e lit, janah enggo ibereken Dibata negeri e man bandu.”

¹¹E maka lit enem ratus kalak dilaki i bas suku Dan nari nadingken Sorah ras Estaol, enggo sikap erperang.

¹²Berkat ia ibahanna perkemahenna i Kiryat Jearim i Juda. E me sabapna maka ingan e igelari denga Perkemahen Dan.

¹³Kenca bage lawes ia i jenari e maka seh ia i rumah Miha i deleng-deleng Eperaim.

¹⁴Kenca e nina si lima kalak si enggo niar-niar i sekelewet Lais man rombongenna, “Ietehndu kang maka lit i jenda i bas rumah e gana-gana kayu si ilapisi alu pirak? Lit ka pe gana-gana si deban ras sada epod. Kai akapndu si arus sibahan?”

¹⁵E maka lawes kalak e ku rumah Miha, ingan anak perana suku Lewi e, janah ikatakenna mejuah-juah man bana.

¹⁶Sanga e tentera Dan si enem ratus si enggo ersikap ku peperangen, paksana tedis i pintu gerbang.

¹⁷Tapi mata-mata si lima kalak e erdalan terus ku bas rumah e, ibuatna gana-gana kayu si ilapisi alu pirak e, bage pe gana-gana si deban, ras epod, sedangken imam e tading i pintu gerbang ras tentera si enem ratus kalak e.

¹⁸Asum si lima kalak e lawes ku rumah Miha janah muati barang-barang si badia e, nungkun imam e nina, “Erkai kena e?”

¹⁹Nina kalak e erjabap, “Sinik saja kam, ola ngerana. Ikutken kami gelah kam jadi imam ras si ngajari kami. Apai akapndu ulin jadi imam man sada suku i bas bangsa Israel asangken jadi imam man keluarga sada jelma?”

²⁰E erbahan meriah kal akap imam e, e maka ibuatna barang-barang si badia e, kenca bage iikutkenna kalak ndai.

²¹Kenca bage erkusur kalak e mulai ia erdalan ras anak-anakna, asuh-asuhenna, ras kerina sikerajangenna erdalan arah lebe.

²²Enggo ndauh kalak ndai erdalan maka ilebuh Miha teman-temanna sada kesain gelah erperang. Kenca itundukna kalak Dan e,

²³e maka erlebuh ia man bana. Erkusur kalak Dan, e maka isungkunna Miha nina, “Kai e? Man kai kerina rayat ena?”

²⁴Nina Miha njabapsa, “Ola pekulah-kulahndu la ietehndu! Ibabandu imamku ras gana-gana si kubahan, jenari lawes kam! Kai nari i bas aku tading?”

²⁵Nina kalak Dan, “Madin kam olanai ngerana adi la atendu reh rawa kalak enda, ola kam kari iserangna. Kenca bage mate kari kam ras kerina keluargandu.”

²⁶Kenca bage iteruskenna perdalanenna. Perbahan idah Miha maka gegehen kalak Dan asangken ia, erkusur ia e maka mulih ia ku rumahna.

²⁷ [27-28] Kenca kalak Dan enggo maba imam ras barang-barang bahanen Miha, lawes ia, iserangna Lais, kuta si dame ras rayatna mehuli si ringan i Baluren Bet Rehop. Ibunuhna kerina rayat i bas ingan e, jenari icilukna kutana. Sada pe la lit nampatisa, erkiteken Lais ndauh i Sidon nari, janah la lit hubungen kalak enda ras rayat si deban. Kalak Dan manteki kuta e mulihi, e maka i je ia ringan.

²⁹Isambarina gelar Lais jadi Dan rikutken gelar nini-ninina anak-anak Jakup;

³⁰Ipajekken kalak Dan gana-gana e man sembahenna, e maka Jonatan, anak Gersom, kempu Musa erdahin jadi imam man suku Dan, janah sinursurna tetap jadi imam seh ngayak rayat Dan ibaba ku pembuangen.

³¹Gana-gana Miha tetap tading i jah kidekah rumah Dibata lit denga i Silo.