Read Batak Karo HAKIM-HAKIM 19 Bible Online

HAKIM-HAKIM 19 - Batak Karo bible

HAKIM-HAKIM 19

¹I bas paksa e, ope denga lit raja i Israel, lit sekalak suku Lewi ringan i deleng-deleng Eperaim. Iempoina sekalak singuda-nguda i Betlehem i Juda nari,

²tapi nembeh ate diberu e man bana. E maka lawes ia mulih ku rumah bapana i Betlehem janah i jah ia tading empat bulan dekahna.

³Kenca bage itetapkenna ndahi diberu e janah iendik-endikna gelah mulihken man bana. Ibabana suruh-suruhenna ras dua kelede. Ibaba diberu e kalak Lewi ndai ku rumah, janah meriah ukur bapana ngidahsa.

⁴La ibere bapa diberu e ia ermulih, e maka erberngi ia i je telu wari dekahna. Man ras minem ia, i jah ia erberngi.

⁵Erpagi-pagi i bas wari peempatken medak kalak ndai lampas, jenari ersikap ia gelah mulih. Tapi nina bapa diberu ndai man kalak Lewi e, “Man lebe, maka kam megegeh. Kentisik nari kam lawes.”

⁶E maka kundul ia duana janah man ras minem. Kenca bage nina bapa diberu e, “Pesenangken man bandu, i jenda kam sada berngi enda nari.”

⁷Keke kalak Lewi e lawes atena, tapi isekseki bapa diberu e gelah ola ia lawes, e maka tading ia i je sada berngi nari.

⁸Lampas erpagi-pagi i bas wari pelimaken ersikap ia lawes, tapi nina bapa diberu e, “Manken lebe, tik nari kam lawes.” E maka man kalak ndai duana.

⁹Kenca bage ersikap ka ia lawes ras ndeharana e bage pe ras suruh-suruhenna. Tapi nina bapa diberu e, “Enggo kap ben kal e. Kentisik nari gelap me. Madin kam erberngi i jenda, pesenang bandu. Pagi banci kam medak lampas guna erdalan ras mulih.”

¹⁰ [10-11] Tapi kalak Lewi e lanai nggit erberngi, e maka ersikap ia lawes ras ndeharana, ras suruh-suruhenna, ras duana keledena si enggo itama pelana. Enggo ben kal wari sanga kalak enda seh i deher Jebusi (e me Jerusalem), e maka nina suruh-suruhen e man tuanna, “Engkai maka la kita ngadi erberngi i bas kuta kalak Jebusi enda?”

¹² [12-13] Tapi nina tuanna, “La kita ngadi i bas sada kuta adi la kalak Israel empuna. Terus kita erdalan kentisik nari, gelah i Gibea ntah i Rama kita erberngi.”

¹⁴E maka ibentasina Jebusi janah iteruskenna erdalan. Enggo sundut matawari sanga kalak enda seh i Gibea daerah suku Benyamin.

¹⁵Singgah ia i Gibea e maka i je ia erberngi. Lawes ia ku kuta kenca bage kundul ia i tengah kesain, tapi ise pe la ndilosa gelah erberngi i rumahna.

¹⁶Sanga e, mentas sekalak dilaki tua-tua mulihna erdahin i juma nari. Situhuna asalna i deleng-deleng Eperaim nari, tapi sanga e i Gibea ia ringan. (Kalak si deban si tading i kuta e kerina i bas suku Benyamin nari.)

¹⁷Iperdiateken orang tua e kalak pertandang i kesain kuta e, e maka isungkunna nina, “I ja nari kam? Ku ja atendu?”

¹⁸Nina kalak Lewi e erjabap, “Kami i Betlehem i Juda nari, janah genduari kami sanga i bas perdalanen ku kuta kami i deleng-deleng Eperaim. Tapi ise pe la ndilo kami erberngi ku rumahna,

¹⁹aminna pe lit nggala ras gagaten man kelede kami, janah bias nge roti ras anggur man pangan ras inemenku ras ndeharangku ras suruh-suruhenku. Kerina cukup si iperluken kami.”

²⁰Nina orang tua e, “Ota ku rumahku kita! Aku muatca kerina si iperlukenndu, ola kam i bas kesain enda erberngi.”

²¹Kenca bage ibabana kalak enda ku rumah ras keledena pe iberena gagaten. Iburihi temuena nahena, man ia ras.

²²Sanga meriah iakap kalak e, rumah orang tua e rempet i kepung kalak gutul si lit i bas kuta e. Janah mulai me ipaluina pintun. Nina man orang tua e, “Baba ndarat dilaki si reh ku rumahndu enda! Ipake kami ate kami ia!” [18†]

²³Tapi ndarat orang tua e, janah nina, “Ola bage teman! Ola bahan si jahat, si la mehuli. Temuengku kal kalak enda.

²⁴Enda ndeharana ras anakku singuda-nguda denga. Kubaba ia genduari ndarat janah banci bandu ia duana. Bahan kuga atendu ibahanndu. Tapi man kalak enda ola kal ibahanndu si mejin e!”

²⁵Tapi la ibegiken kalak gutul-gutul e orang tua ndai. E maka ibuat kalak Lewi e ndeharana kenca bage ibabana ndarat man kalak ndai. E maka iperkosa kalak ndai ndeharana e la erngadi-ngadi seh erpagi-pagi.

²⁶Nandangi terang wari reh diberu e, janah guling ia i lebe-lebe pintun rumah orang tua e, ingan perbulangenna tading. Seh ngayak pultak matawari i je denga diberu e.

²⁷Medak perbulangenna erpagi-pagi tapi sanga italangina pintun lawes atena, idahna ndeharana ampar i lebe-lebe rumah e tanna ndada ku pintun.

²⁸Nina kalak Lewi e, “Kekeken. Lawes kita.” Tapi la ia ngaloi. Kenca bage iampekenna ndeharana e ku das kelede, lawes ia ku kutana.

²⁹Kenca enggo seh i rumah, ibuatna piso. Ibuatna mait ndeharana e, e maka ikeret-keretna jadi sepuluh dua ngkeret, e maka iberekenna sada ngkeret man tiap suku Israel si sepuluh dua. [19†]

³⁰Kerina kalak si ngidahsa nina, “Langa pernah si idah jadi si bagenda rupana! Langa pernah jadi mulai kin bangsa Israel ndarat i Mesir nari. Kai arus sibahan kerna si e? Arih-arihlah kita.”