Read Batak Karo HAKIM-HAKIM 2 Bible Online

HAKIM-HAKIM 2 - Batak Karo bible

HAKIM-HAKIM 2

¹Malekat TUHAN lawes i Gilgal nari ku Bokim janah nina man bangsa Israel, “Enggo Kubuat kam i Mesir nari jenari Kubaba kam ku negeri si Kupadanken man nini-ninindu. Ningku, ‘La pernah la Kusehken padanKu ras kam.

²Arus maka la ibahanndu perpadanen kai pe ras bangsa si ngiani negeri enda. Arus maka iruntuhkenndu batar-batar ingan persembahenna.’ Tapi la ilakokenndu kai si Kukataken man bandu! Kebalikenna nge si idahikenndu! [5†]

³E maka Kukataken man bandu genduari maka la Kupelawes bangsa-bangsa e tupung iasakndu ia. Ia jadi musuh-musuhndu janah kam kena siding alu nembah man dibata-dibatana.”

⁴Kenca enggo dung malekat ndai ngerana, tangis kerina bangsa Israel,

⁵janah e me sabapna maka ingan e igelari Bokim. I je ipersembahken persembahen man TUHAN.

⁶Isuruh Josua bangsa Israel berkat, janah tep-tep kalak lawes muat negeri si jadi baginna.

⁷Bangsa Israel nembah man TUHAN kidekah Josua nggeluh. Kenca kematenna pe tetap denga nge bage perbahan kalak e kidekah geluh peminpin-peminpin si enggo ngidah perbahanen TUHAN si mbelin man bangsa Israel.

⁸Josua anak Nun, suruh-suruhen TUHAN, mate i bas umur seratus sepuluh tahun.

⁹Ia ikuburken i negeri si jadi baginna jine i Timnat Serah i deleng-deleng Eperaim i Utara Deleng Gas. [6†]

¹⁰Kenca kerina sundut si e mate, e maka sundut si reh kenca si e ngelupaken TUHAN ras kai si ibahanNa man Israel.

¹¹Kenca bage enggo erdosa bangsa Israel man TUHAN janah mulai ia nembah man Baal.

¹²Ngadi ia nembeh man TUHAN, Dibata nini-ninina, Dibata si enggo maba ia ndarat i Mesir nari, janah mulai ia nembah man dibata-dibata si deban, dibata-dibata si isembah bangsa-bangsa sekelewetna. Bangsa Israel nembah ku dibata-dibata e, janah nembeh ate TUHAN ibahanna.

¹³Lanai ia nembah TUHAN tapi nembah man Baal ras Astarte.

¹⁴E maka reh rawa TUHAN man Israel. Erkiteken si e ipelepasNa perampok nggempangi ras ngerampokisa. Ipelepas TUHAN kerina musuh si lit i sekelewet bangsa Israel naluken bangsa e. E maka bangsa Israel lanai ngasup ngkawali dirina.

¹⁵Tep-tep kali Israel erperang, ilawan TUHAN ia, sue ras si enggo ikatakenNa. E maka Israel tetap i bas kebiaren.

¹⁶Kenca bage maka ibereken TUHAN man bangsa Israel peminpin si mulahi ia i bas perampok e nari.

¹⁷Tapi peminpin e pe la diate bangsa Israel. Israel la setia man TUHAN tapi nembah man dibata-dibata si deban. Nini-ninina ngikutken perentah-perentah TUHAN, tapi sinursur si mbaru enda minter ngadi ngikutken perentah-perentah e.

¹⁸Tep-tep TUHAN mereken peminpin man bangsa Israel, isampati TUHAN peminpin e, janah ipulahina bangsa e i bas musuh-musuhna nari, kidekah peminpin ndai nggeluh. Mekuah ate TUHAN man bangsa e, erkiteken nderkuh ia i teruh kiniseran ras penindih kalak.

¹⁹Tapi kenca peminpin e mate, mulihken ka bangsa e ku dalan si ndekah, janah jahaten lagu-langkahna asang sundut si lebena. Itami-tami ras isembahna dibata-dibata si deban, janah la ia nggit pengadisa lagu-langkahna si jahat e.

²⁰Kenca bage merawa kal TUHAN man Israel nina, “Bangsa enda enggo ngelanggar perpadanen si Kuperentahken si man cikepen nini-ninina. Erkiteken la ngikutken Aku,

²¹lanai ateKu mpelawes bangsa-bangsa si tading denga tupung Josua mate.

²²AteKu make bangsa-bangsa e guna ncubai Israel. Ntah kin ikutkenna dalanKu, bagi si idalanken nini-ninina ntah lang.”

²³E maka ipelepas TUHAN bangsa-bangsa e tetap ringan i negeri e. Ibahan Tuhan maka Josua la ngasup nalukenca. Kenca Josua mate pe, la minter ipelawes Tuhan bangsa-bangsa e.