Read Batak Karo HAKIM-HAKIM 20 Bible Online

HAKIM-HAKIM 20 - Batak Karo bible

HAKIM-HAKIM 20

¹Kerina bangsa Israel mulai i bas daerah Dan i Utara nari seh ku Berseba i Selatan, bage pe i Gileat nari arah Barat njabap pendilo e. Ersada ia kerina ngadap TUHAN i Mispa.

²Kerina peminpin suku Israel reh ku perpulungen bangsa Dibata enda janah tentera si erdalan nahe lit 400.000 kalak teremna.

³Paksa e enggo ibegi kalak Benyamin maka kerina bangsa Israel si debanna enggo pulung i Mispa. Nina bangsa Israel nungkun, “Turiken kuga kejahaten e jadi.”

⁴E maka ngerana kalak Lewi si ndeharana enggo mate ibunuh ndai nina, “Ndeharangku ras aku erdalan ku Gibea erberngi i daerah suku Benyamin e.

⁵Dilaki-dilaki i kuta Gibea reh ngelawan aku, ikepungna rumah e berngi-berngi. Ibunuhna atena aku, tapi iperkosana ndeharangku e maka mate ia.

⁶Kubuat ndeharangku e, kukeret-keret e maka kubereken sada ngkeret man tiap suku Israel si sepuluh dua. Kalak Benyamin e enggo erbahan si jahat ras njuruken man banta kerina.

⁷Kerina kita bangsa Israel si pulung i jenda, kai arus si bahan kerna si e?”

⁸Kerina bangsa e tedis ras-ras e maka nina, “Sada pe kita ola mulih ku kutana subuk si ringan i kemah ntah rumah.

⁹Bagendalah si bahan: si bahan tikam tanduk milih piga kalak merang Gibea.

¹⁰Sepersepuluhna i bas bangsa Israel nikapken pangan man tentera e, janah si debanna lawes ngukum Gibea kerna perbahanenna si jahat si enggo ilakokenna i Israel.”

¹¹Bage me kerina dilaki-dilaki i Israel ersada guna sada tujun, e me merang kuta e.

¹²Isuruh suku-suku bangsa Israel persuruhen ku kerina daerah suku Benyamin ngatakenca, “Kejahaten kai si enggo ibahanndu e?

¹³Genduari endeskenlah kalak jahat Gibea ndai, gelah ibunuh kami maka masap si jahat e i bas Israel nari.” Tapi la diate suku Benyamin pe suku-suku Israel si deban.

¹⁴E maka i bas kuta-kuta suku Benyamin si deban nari pe rehen kerina ku Gibea ngelawan suku-suku Israel si deban.

¹⁵[15-16] I bas wari e ipepulungna i bas kuta-kuta suku Benyamin si deban nari lit buena dua puluh enem ribu tentera. Tambah si e, ipepulung kalak Gibea tentera pilihen pitu ratus kalak jaluk. Tiap kalak ngasup ngkalibawangi selambar buk alu batu, janah la enggo la kena.

¹⁶

¹⁷Suku Israel si deban ipepulung lit buena empat ratus ribu tentera.

¹⁸Bangsa Israel lawes ku ingan ersembah i Betel, janah i jah isungkunna Dibata nina, “Suku si apai lebe ngelawan suku Benyamin?” Nina TUHAN erjabap, “Suku Juda.”

¹⁹E maka lampas erpagi-pagi mulai erdalan bangsa Israel kenca bage ibahanna perkemahen i deher kuta Gibea.

²⁰Iperangna tentera suku Benyamin, iaturna tenterana erbaris petala-tala ras Gibea.

²¹Ndarat tentera Benyamin i bas kuta e nari janah ope denga ben wari, enggo ibunuhna dua puluh dua ribu tentera Israel.

²²[22-23] E maka lawes bangsa Israel ku ingan ersembah. Kenca bage ngandung ia i adep-adepen TUHAN seh ben. Nina nungkun TUHAN, “Arus denga kin kami lawes ku peperangen ngelawan senina kami suku Benyamin?” Nina TUHAN erjabap, “Ue, laweslah.” E maka enggo gedang ate tentera Israel. Kenca bage iaturna barisen tenterana i bas ingan si nderbih ka.

²³

²⁴Tentera Israel maju ka pedua kaliken ngelawan suku Benyamin.

²⁵E maka pedua kaliken suku Benyamin ndarat i Gibea nari, janah i bas paksa si e ibunuhna sepuluh waluh ribu tentera Israel si terpilih.

²⁶Jenari kerina bangsa Israel lawes ngandung ku Betel. Kundul ia i adep-adepen TUHAN janah la man seh ben. Ipersembahkenna persembahen persadan ras persembahen tutungen i adep-adepen TUHAN.

²⁷[27-28] Peti Perpadanen Dibata lit i Betel i bas paksa si e, janah Pinehas anak Eleasar kempu Harun si ertugas jadi imam. Bangsa e nungkun man TUHAN nina, “Arus denga kin kami lawes ngelawan senina kami suku Benyamin ntah lang?” Nina TUHAN njabapsa, “Lawan. Pagi Kubereken kemenangen man bandu.”

²⁸

²⁹E maka itama bangsa Israel tenterana cebuni sekelewet Gibea.

³⁰Kenca bage, petelu kaliken bangsa Israel maju ngelawan tentera suku Benyamin, iaturkenna tenterana petala-tala ras Gibea bagi si bahanna ope si e.

³¹Ndarat suku Benyamin, janah la iarapna enggo ndauh ia sirang ras kuta e. Bagi si nggona mulai ibunuhna piga-piga kalak Israel i daerah si salang arah dalan ku Betel ras Gibea. Ibunuhna kira-kira telu puluh kalak Israel.

³²Nina suku Benyamin, “Enggo talu sibahan ia bagi si nggona.” Tapi irencanaken kalak Israel mundur, gelah mabai kalak Benyamin e reh ku dalan-dalan dingen ndauh sirang ras kuta e.

³³Asum bagin tentera Israel mundur janah ipepulungna bana mulihi i Baaltamar, kalak Israel si i sekelewet Gibea rempet ndarat i bas inganna cebuni i daerah si erbatu-batu i kelewet kuta peperangen e.

³⁴Kalak ndai pilihen i bas belang-belang Israel, teremna lit sepuluh ribu kalak. E maka asum si 10.000 kalak e merang Gibea, jadi me peperangen si mesangat. Sitik pe la isangka kalak Benyamin maka kentisik nari talu me ia.

³⁵Ibereken TUHAN kemenangen man Israel ngelawan tentera Benyamin. Ibunuh Israel 25.100 kalak tentera suku Benyamin i bas wari e;

³⁶e maka ieteh suku Benyamin ia enggo talu. Sada bagin tentera Israel mundur i suku Benyamin nari, erkiteken tek ia man tentera si cebuni i sekelewet Gibea.

³⁷Tentera si cebuni e pedas-pedas kiam ku Gibea, merap ia ku kuta e, e maka ibunuhina kerina si lit i je.

³⁸Tentera Israel ras kalak si cebuni ndai enggo lit arihna erbahan tanda. Kenca idahna asap erdipul ku das i bas kuta e nari,

³⁹kalak Israel si erperang i darat erkusur mulihken. Tupung si e suku Benyamin e enggo munuh telu puluh kalak Israel. Nina i bas ukurna, “Enggo talu kalak ah sibahan bagi si nggona.”

⁴⁰Kenca bage teridah me tanda ndai, gebuk api mulai nangkih i bas kuta e nari. Suku Benyamin nulih ku pudi janah sengget ngidah kuta e enggo keri ipan api.

⁴¹Kenca bage bangsa Israel mulihken ngelawan, e maka enggo gugup suku Benyamin, sabap ietehna maka nandangi kernep me ia.

⁴²Mundur ia i bas kalak Israel e nari, kiam ku ingan si salang, tapi lanai banci pulah. Enggo terkepung ia kelang-kelang tentera Israel ras kalak si ndarat i bas kuta e nari, kenca bage ikernepken ia.

⁴³Enggo isidingi Israel musuhna e maka iayakina musuh e seh i Timur Gibea, ibunuhina gedang-gedang dalan.

⁴⁴Lit sepuluh waluh ribu kalak tentera suku Benyamin si mbisana mate.

⁴⁵Si debanna mulihken janah kiam ku daerah si salang, ku deleng batu i Rimon. Lit lima ribu kalak ibunuh i bas dalan e. Si lebihna iayak tentera Israel terus ku Gidom, ibunuhna dua ribu kalak.

⁴⁶Kerina, lit dua puluh lima ribu suku Benyamin ibunuh i bas wari e, janah kerina si mate e tentera si mbisa.

⁴⁷Tapi lit 600 kalak si pulah ku daerah si mesawang ku deleng batu i Rimon, e maka i jah ia tading empat bulan dekahna.

⁴⁸Tapi Israel mulihken ngelawan janah munuhi suku Benyamin, dilaki ras diberu, anak-anak ras asuh-asuhen. Icilukna tiap kuta i bas daerah e.