Read Batak Karo HAKIM-HAKIM 21 Bible Online

HAKIM-HAKIM 21 - Batak Karo bible

HAKIM-HAKIM 21

¹Sanga Israel pulung i Mispa ersumpah ia man TUHAN nina, “Sada pe kami la mereken anak kami man empon suku Benyamin.”

²E maka lawes kalak Israel ku Betel, kenca bage kundul ia jah ngayak ben. Ngandung ia alu megang sorana nina,

³“O, TUHAN Dibata nu Israel, ngkai maka bagenda jadina? Engkai maka menam keri suku Benyamin, sada suku i bas bangsa Israel nari?”

⁴Pepagina lampas erpagi-pagi ipajekkenna sada batar-batar i je, ipersembahkenna persembahen persadan, janah deba itutungna persembahen alu bulat-bulat.

⁵Nungkun bangsa Israel nina, “Suku Israel si apai si la ikut pulung i adep-adepen TUHAN i Mispa enda?” (Kalak enda enggo ersumpah maka si la ikut pulung i Mispa la banci la ibunuh.)

⁶Mekuah ate bangsa Israel man seninana suku Benyamin e maka nina, “Sendah lit sada suku i Israel si bene.

⁷Uga sibahan nikapken ndehara man dilaki kalak Benyamin si tading denga? Enggo kita ersumpah man TUHAN maka la sibere anakta iempoina.”

⁸Sanga isungkun kalak e kerna suku si apai si la ikut pulung i Mispa, la lit idahna sekalak pe reh i Jabes nari i Gileat.

⁹Asum gelar tentera e ilebuhken sekalak pe la lit si ngaloi i Jabes nari.

¹⁰E maka isuruh perpulungen e sepuluh dua ribu tenterana si mbisana alu perentah bagenda, “To bunuh kalak si lit i Jabes, subuk diberu bage pe anak-anak.

¹¹Bunuh kerina dilaki ras diberu si lanai singuda-nguda.”

¹²I bas rayat Jabes nari idat kalak ndai empat ratus kalak diberu singuda-nguda denga, e maka ibabana ku perkemahen i Silo, i negeri Kanaan.

¹³Kenca bage itenahken perpulungen e perkatan man suku Benyamin si ringan i deleng batu Rimon ngataken maka perang enggo ngadi.

¹⁴Mulih suku Benyamin, e maka ibereken kalak Israel man bana singuda-nguda si i Jabes nari si la ibunuhna. Tapi la cukup singuda-nguda e man suku Benyamin.

¹⁵Mekuah kal ate bangsa e man suku Benyamin erkiteken TUHAN enggo ngerenggangken persadan suku-suku Israel.

¹⁶E maka nina peminpin perpulungen e, “Lanai lit diberu i bas suku Benyamin. Uga sibahan muat ndehara kalak enda?

¹⁷La arus bene sada pe suku Israel i bas si sepuluh dua suku e nari. Arus sidarami dalan gelah suku Benyamin ola masap,

¹⁸tapi la banci sibereken anakta man emponna, erkiteken kita enggo ersumpah maka la sibereken anakta iempoi suku Benyamin.”

¹⁹Kenca bage iukurken kalak enda, “Lanai ndekah kerja tahun man TUHAN i Silo.” (Silo e arah Utara Betel, i Selatan Lebona ras i Timur dalan kelang-kelang Betel ras Sikem.)

²⁰Nina man suku Benyamin, “Laweslah janah cebuni i kebun-kebun anggur,

²¹e maka intip. Sanga singuda-nguda Silo ndarat landek-landek kidekah pesta e, ndarat kam i bas peken anggur nari. Buat singuda-nguda e alu paksa man bandu tersada baba jadi ndeharandu ku daerah suku Benyamin.

²²Adi reh bapa ntah turangna nungkun man bandu, bagenda nindu, ‘Man kami min enda, erkiteken labo ibuat kami ia jadi ndehara kami i bas peperangen. Janah erkiteken labo iberekenndu ia man kami, e maka labo kam ersalah ngelanggar sumpahndu.’ ”

²³Ilakoken suku Benyamin bagi si ikataken peminpin perpulungen e. Ipilihna singuda-nguda si sangana landek-landek i Silo jadi ndeharana e maka ibabakenna. Kenca bage mulih ia ku daerahna, ipantekina ka kuta-kutana, e maka i jah me ia ringan.

²⁴I bas paksa e lawes ka bangsa Israel i Mispa nari, janah tiap kalak mulih ku sukuna ras ku keluargana ras ku tanehna.

²⁵I bas paksa si e la lit raja i Israel. E maka tiap kalak erbahan bagi atena ngena. [20†]