Read Batak Karo HAKIM-HAKIM 3 Bible Online

HAKIM-HAKIM 3 - Batak Karo bible

HAKIM-HAKIM 3

¹E maka itadingken TUHAN piga-piga bangsa i negeri e nguji bangsa Israel si la ikut i bas perang i Kanaan nai.

²IlakokenNa e guna ngajar tep-tep sinursur bangsa Israel kerna perang, terlebih-lebih kalak si gelgel e langa pernah erperang.

³Bangsa-bangsa si tading i negeri e, e me limana kuta Pilisti, kerina bangsa Kanaan, bangsa Sidon, ras bangsa Hewi si ringan i deleng-deleng Libanon, mulai i Deleng Baal Hermon nari seh ku dalan ku Hamat.

⁴Bangsa-bangsa e jadi sada ujin man Israel, metehsa nggit tah lang ia ngikutken perentah-perentah si ibereken TUHAN man nini-ninina arah Musa.

⁵Bageme bangsa Israel tading i tengah-tengah bangsa Kanaan, bangsa Heti, bangsa Amori, bangsa Peris, bangsa Hewi ras bangsa Jebusi.

⁶Bangsa Israel sibuaten ras bangsa-bangsa enda ndai, janah isembahna dibata bangsa-bangsa e.

⁷Bangsa Israel lupa man TUHAN Dibatana; erdosa ia man TUHAN janah isembahna berhala Baal ras Asera.

⁸E maka nembeh TUHAN man Israel, janah ipelepasNa Raja Kusan Risataim i Mesopotami nari naluken ras merentah Israel waluh tahun dekahna.

⁹Kenca bage maka erlebuh bangsa Israel man TUHAN, e maka iberekenNa sekalak si mbebasken bangsa e, e me Otniel, anak si Kenas, agi Kalep.

¹⁰Kesah TUHAN reh man Otniel, e maka ia jadi peminpin bangsa Israel. Otniel lawes erperang, janah ibereken TUHAN man bana kemenangen ngelawan raja Mesopotami e.

¹¹Empat puluh tahun dekahna negeri e dame, janah dungna mate Otniel.

¹²Erdosa ka bangsa Israel man TUHAN. Erkiteken si e ibahan TUHAN maka gegehen Raja Eglon i Moap nari asangken bangsa Israel.

¹³Eglon erteman ras bangsa Amon ras bangsa Amalek; italuken kalak enda Israel janah ikuasaina kuta Jeriho, kuta batang kurma e.

¹⁴Bangsa Israel lit i teruh kuasa Eglon sepuluh waluh tahun dekahna.

¹⁵Kenca bage erlebuh bangsa Israel ku TUHAN, e maka iberekenNa sekalak mbebasken bangsa e, e me sekalak si jaluk, Ehud gelarna. Ia anak si Gera, i bas suku Benyamin nari. Isuruh bangsa Israel Ehud ngembahken upeti man Eglon raja Moap.

¹⁶Enggo ibahan Ehud sada pedang dua babahna kira-kira setengah meter gedangna. Isilepkenna arah kemuhen i teruh bajuna.

¹⁷Kenca bage ibabana persembahen e man Eglon. Eglon e me sekalak si seh kal burna.

¹⁸Kenca enggo ibereken Ehud persembahen ndai, isuruhna mulih kalak si maba persembahen e.

¹⁹Tapi Ehud jine mulihken i batu si ipahat deher Gilgal nari ndahi Eglon, janah nina, “O Raja, lit tenah rahasia man bandu.” E maka iperentahken raja e suruh-suruhenna, “Lawes kena kerina ndarat!” E maka ndarat kalak ndai kerina.

²⁰Kenca bage, asum kundul raja e sisada i bas kamarna inganna cimalem-cimalem i datas, idahi Ehud ia nina, “Lit tenah i bas Dibata nari man bandu.” Tedis raja e.

²¹Isintak Ehud pedangna si gantung arah kemuhen alu tanna si kawes, itebakkenna ku beltek raja ndai.

²²Teldem kal ibahanna pedang e, ikut ras sukulna pe kerina, janah tabeh-tabehna nutupisa. La irintak Ehud pedang ndai i bas beltek raja nari, janah nduldul pedang e arah pudi, kelang-kelang nahena.

²³Kenca bage ndarat Ehud, ipintuna pintun, ierukna,

²⁴e maka lawes ia. Reh suruh-suruhen e, janah idahsa maka pintun e ieruk. Tapi iakap suruh-suruhen e raja sangana i kamar mandi.

²⁵Ndekah sitik itimaina, tapi lalap la italangi raja. E maka ibuatna kunci jenari italangina pintun e. Idapetina tuanna enggo mate terdang i lante.

²⁶Tarunna tertima-tima, Ehud enggo ndauh lawes. Lawes ia mentasi batu-batu si ipahat e, e maka lompat ia ku Seirah.

²⁷Kenca ia seh i deleng-deleng Eperaim e, iembusna terompet ngelebuh bangsa Israel ku peperangen. Ipinpinna bangsa e ngincuah i deleng-deleng e nari.

²⁸Nina, “Ikutken aku! Enggo ibereken TUHAN kemenangen bandu ngelawan musuh-musuhndu, bangsa Moap e.” E maka ikutken bangsa e Ehud ngincuah janah ikuasaina ingan-ingan bangsa Moap ngepari Lau Jordan. Sekalak pe la ipelepasna ngepar.

²⁹I bas wari e, lit ibunuh kalak enda kira-kira sepuluh ribu kalak tentera bangsa Moap si mbisana; la lit sekalak pe pulah.

³⁰I bas wari si e bangsa Moap italuken bangsa Israel. Kenca bage dame negeri waluh tahun dekahna.

³¹Peminpin kenca Ehud e me Samgar anak Anat. Ia pe ipulahina bangsa Israel alu munuh enem ratus kalak bangsa Pilisti alu sada ciken penggera lembu.