Read Batak Karo HAKIM-HAKIM 4 Bible Online

HAKIM-HAKIM 4 - Batak Karo bible

HAKIM-HAKIM 4

¹Kenca mate Ehud, bangsa Israel erdosa ka man TUHAN.

²E maka ibereken TUHAN maka Jabin ngkuasai Israel, sekalak raja kalak Kanaan si erkuasa i kuta Hasor. Puanglima perangna Sisera gelarna. Sisera tading i kuta Haroset-Hagoyim.

³Jabin lit siwah ratus gereta besina. Iperentahna bangsa Israel alu kejam, janah mesui kal ate bangsa e ibahanna lit dua puluh tahun dekahna. E maka erlebuh bangsa Israel mindo penampat man TUHAN.

⁴Debora, ndehara Lapidot sekalak nabi. Ia hakim si ngerunggui bangsa Israel i bas paksa e.

⁵Biasana kundul-kundul ia i teruh batang kurma, kelang-kelang Ramah ras Betel i deleng-deleng Eperaim. Ku je me ia idahi bangsa Israel mindo keputusen-keputusenna.

⁶I bas sada wari isuruhna reh si Barak anak Abinoam i kuta Kedes i Naptali nari, janah nina, “TUHAN Dibata Israel mereken man bandu perentah enda, ‘Buatlah sepuluh ribu kalak i bas suku Naptali ras Sebulon nari jenari babai ia ku Deleng Tabor.

⁷Aku mabasa Sisera, puanglima tentera Jabin, ngelawan kam i Lau Kison. Ibabana gereta besina ras tenterana, tapi Kubereken man bandu kemenangen ngelawan ia.’ ”

⁸Nina Barak ngaloisa, “Aku lawes adi kam pe ikut ras aku, tapi adi la kam ikut, aku pe la nggit lawes.”

⁹Nina Debora njabapsa, “Bage-bage! Ikut aku lawes ras kam. Tapi la kam ndat kehamaten i bas kemenangen e, erkiteken TUHAN ngendesken Sisera ku bas tan sekalak diberu.” E maka berkat Debora ras Barak ku Kedes.

¹⁰Idilo Barak suku Sebulon ras Naptali ku Kedes, janah sepuluh ribu kalak dilaki ngikutkenca. Debora ikut ras ia.

¹¹I bas paksa si e, Heber bangsa Keni e enggo sirang ras bangsana e me kap kesusuren Hobab, silih Musa. Ipajekkenna kemahna deherken Kedes, rembak ras batang kecing Sananim.

¹²Kenca ieteh Sisera maka Barak enggo nangkeng ku Deleng Tabor,

¹³ipepulungna gereta perangna si siwah ratus e ras kerina tenterana, e maka isuruhna lawes i Haroset-Hagoyim nari ku Lau Kison.

¹⁴Kenca bage nina Debora man Barak, “To! TUHAN mabai kam! I bas wari enda iberekenNa man bandu kemenangen ngelawan Sisera.” Kenca bage ngincuah Barak ras sepuluh ribu kalak anak buahna i Deleng Tabor nari.

¹⁵Sanga Barak ras tenterana lawes ngelawan, ihuntakken TUHAN Sisera rikut ras gereta perang besina ras tenterana kerina. Nusur Sisera i das gereta perangna nari jenari kiam ia.

¹⁶Ielis Barak gereta perang ras tentera e seh i Haroset-Hagoyim, e maka ibunuhna kerina tentera Sisera. Sekalak pe la lit tading.

¹⁷Kiam Sisera ku kemah Jael, ndehara Heber bangsa Keni e, erkiteken Raja Jabin i Hasor nari e erteman ras keluarga Heber.

¹⁸Ialo-alo Jail Sisera ndarat janah nina man Sisera, “Mari tuan, mari ku kemahku. Ola mbiar.” E maka bengket Sisera, ibuniken Jael ia i balik kire-kire.

¹⁹Nina Sisera man diberu e, “Enta sitik lau, muas kal aku.” Italangi diberu e kantong kulit ingan susu, ibere minemna Sisera, e maka ibunikenna ka ia mulihi.

²⁰Kenca bage ikatakenna man diberu e nina, “Tedis kam i lebe pintun kemah, janah adi lit kalak reh nungkun kam ntah lit sekalak i jenda, ‘la lit’, nindu.”

²¹Erkiteken latih kal akap Sisera, minter entabeh pertunduhna. E maka ibuat Jael martel ras pantuk-pantuk kemah, ideherina Sisera manjar-anjar, kenca bage ibunuhna alu mekpek pantuk-pantuk ndai alu martel arah pipi Sisera pultak ku taneh.

²²Sanga Barak reh ndarami Sisera, ndarat Jael ngalo-ngalo janah nina man Barak, “Mari ku jenda! Enda kutuduhken man bandu jelma si idaramindu.” E maka bengket Barak ras Jael. Iidahna Sisera ampar i babo taneh, enggo mate. Pultak takalna ibahan pantuk-pantuk kemah e.

²³I bas wari e ibereken Dibata kemenangen man bangsa Israel ngelawan Jabin, raja bangsa Kanaan e.

²⁴Reh dekahna reh tambahna gegeh kalak Israel naluken Jabin, raja kalak Kanan, seh maka kernep ibahanna.