Read Batak Karo HAKIM-HAKIM 5 Bible Online

HAKIM-HAKIM 5 - Batak Karo bible

HAKIM-HAKIM 5

¹I bas wari e iendesken Debora ras Barak ende-enden:

²Pujilah TUHAN! Itetapken bangsa Israel ukurna erperang alu ukur meriah.

³Begikenlah o raja-raja! Begikenlah o kam pemerentah! Rende ateku, rende man TUHAN, Dibata bangsa Israel.

⁴ TUHAN, sanga itadingkenNdu Deleng Seir, sanga Kam ndarat nadingken negeri Edom mugur-ugur doni enda janah udan ndabuh i langit nari. Payo, lau mambur i embun nari.

⁵Mundu-undu deleng i lebe-lebe TUHAN Deleng Sinai, mundu-undu deleng i lebe-lebe TUHAN Dibata Israel. [7†]

⁶I bas paksa Samgar anak Anat, i bas paksa Jael lanai lit arak-araken perbinaga mentasi negeri e, janah kalak gawah-gawah erdalan arah dalan si deban.

⁷Kuta-kuta Israel tempa-tempa terulang, O Debora; enggo mesuni seh kam reh, reh desken sekalak nande man bangsa Israel.

⁸Kenca bage lit perang i negeri e sanga bangsa Israel milih dibata-dibata si mbaru, empat puluh ribu kalak dilaki i bas bangsa Israel, lit kin si ngangkat ampang-ampang, ntah lembing?

⁹Megah kal ukurku ngidah puanglima-puanglima Israel, bage pe rayat si ermeriah ukur ngendesken bana. Pujilah TUHAN!

¹⁰Turikenlah e o, kam si ngersak kelede mbentar, kam si kundul i babo pelana, ras kam si terpaksa erdalan nahe ku japa pe kam lawes.

¹¹Begikenlah! Jelma si nterem ersurak i kelewet sumur. Nuriken kemenangen TUHAN, kemenangen bangsa Israel! Kenca bage bangsa TUHAN ngincuah i kutana nari.

¹²Pinpinlah, Debora, pinpinlah terus! Pinpinlah terus! Rendelah! Pinpinlah terus! Ku lebe kam, o Barak anak Abinoam! Babai tabanenndu erdalan!

¹³Kenca bage nusur kalak si setia ndahi peminpinna; bangsa TUHAN reh man baNa, sikap guna erperang.

¹⁴Reh ia i Eperaim nari ku baluren e, arah pudi suku Benyamin ras rayatna. Puanglima-puanglima nusur i Makir nari, perwirana nusur i Sebulon nari.

¹⁵Peminpin Isakar reh ras Debora; tuhu, Isakar reh ras Barak pe, janah ikutkenna Barak ku baluren e. Tapi suku Ruben erbelah-belah; la terputuskenca ikut tah lang.

¹⁶Engkai maka ia tading deherken karang asuh-asuhen? Megiken suling pendilo rarasen? Tuhu, suku Ruben erbelah-belah; la terputuskenca ikut tah lang.

¹⁷Suku Gat tading i Timur Lau Jordan, janah suku Dan tetap tading deherken kapal. Suku Aser tading i tepi lawit; kalak enda la nggit miser i tepi lawit nari.

¹⁸Tapi bangsa Sebulon ras Naptali, pang ngasamken kesahna i bas perang.

¹⁹Taanak, deherken lau i Megido, reh raja-raja janah erperang; raja-raja Kanaan e erperang, tapi pirak la lit irampasna.

²⁰Bintang-bintang pe ikut erperang. I bas perdalanenna i langit nari, erperang ia ngelawan Sisera.

²¹Lau Kison ergalun ngombakken musuh, Lau Kison deras permalerna. Aku maju, maju terus, alu megegeh!

²²Kenca bage reh kuda ngeratuh sora tapak-tapakna kuritap i babo taneh.

²³“Sumpahilah kuta Meros,” nina malekat TUHAN. “Kena sumpah, kena sumpah kerina si tading i je. La ia reh nampati TUHAN, la ia reh bagi tentera si erperang guna TUHAN.”

²⁴Sangap me Jael ndehara Heber bangsa Keni e diberu si sangapna i bas kerina diberu si ringan i bas kemah.

²⁵Ipindo Sisera man Jael lau, tapi iberekenna susu. Tare mangkuk si mejile, idudurkenna susu si mehulina.

²⁶Ibuatna pantuk-pantuk kemah alu tanna si kawes, janah sada martel tukang alu tanna si kemuhen ipaluna Sisera, ipecahkenna takalna; itajakna takalna seh pultak.

²⁷Erjimpuh Sisera, guling ampar i deher nahe Jael. I deher nahe Jael erjimpuh Sisera jenari guling; guling ia ku taneh, mate.

²⁸Ipernehen nande Sisera arah jendela, itungkirna arah jarikjak jendela. “Engkai maka bage lawenna gereta reh?” nina nungkun. “Engkai maka bage meletna kudana mulih?”

²⁹Ngaloi diberu-diberu si pentarna, janah iulih-ulihina ngerana man dirina jine,

³⁰“Ndatken barang perang nge kalak ndai, janah mbagi-bagikenca, sada ntah dua diberu man tiap sekalak tentera, uis si mejile man Sisera piga-piga potong kain sulam man kerahung kemberahen.”

³¹Mbera kerina musuhNdu bage permatena O, TUHAN, tapi teman-temanNdu ersinalsal bagi matawari si sangana nangkih! E maka dame negeri e empat puluh tahun dekahna.