Read Batak Karo HAKIM-HAKIM 6 Bible Online

HAKIM-HAKIM 6 - Batak Karo bible

HAKIM-HAKIM 6

¹Kenca bage erdosa ka bangsa Israel man TUHAN, e maka ipelepasNa bangsa Midian merentahsa pitu tahun dekahna.

²Gegehen bangsa Midian asang bangsa Israel, e maka cebuni bangsa Israel i gua-gua ras i bas ingan-ingan si deban i deleng-deleng.

³Tep-tep merdang kalak Israel reh bangsa Midian ras bangsa Amalek ras suku-suku si ringan i gurun pasir, iperangna bangsa Israel.

⁴Ibahanna kemahna i negeri e, janah ikernepkenna sinuan-sinuan seh ku Selatan ku sekelewet Gasa. Ibuatina kerina biri-biri, lembu, kelede, janah lanai lit sitik pe itadingkenna man bangsa Israel guna ngumputi geluhna.

⁵Teremna bangsa ndai reh desken labang. Ibabana asuh-asuhen ras kemahna. Teremna bangsa e ras untana la terbeligai perbahan buena. Ia reh ncedai negeri e,

⁶e maka bangsa Israel lanai ngasup erbahan kai pe ngelawansa.

⁷Kenca bage maka erlebuh bangsa Israel man TUHAN mindo penampat ngelawan bangsa Midian,

⁸e maka ibereken TUHAN sekalak nabi si maba berita man bangsa Israel i bas TUHAN nari, Dibata bangsa Israel, “Kubaba kam ndarat i bas perbudaken i Mesir nari.

⁹Kupulahi kam i bas bangsa Mesir nari ras i bas bangsa si ngelawan kam i negeri enda. Enggo Kupelawes ia asum kam bengket ku je, jenari Kubereken negerina man bandu.

¹⁰Kukataken man bandu maka Aku TUHAN Dibatandu, maka ola kam nembah man dibata-dibata bangsa Amori, si negerina genduari enda man inganndu nggeluh. Tapi la ibegikenndu Aku.”

¹¹Kenca bage reh malekat TUHAN ku kuta Opra kundul ia i teruh batang kecing si Joas, sekalak i bas terpuk Abieser nari. Anakna Gideon sangana ngerik gandum erbuni-buni i bas sada ingan pengeriken anggur, gelah la ia idah kalak Midian.

¹²Malekat TUHAN e encidahken bana man Gideon i je nina, “TUHAN ras kam, o kam kalak si mbisa!”

¹³Nina Gideon man malekat e, “Adi banci aku nungkun, ngkai maka kerina kiniseran enda jadi man kami, adi TUHAN kin ras kami? Kai ertina kerina tanda-tanda kuasa si ilakoken TUHAN? Ituriken nini-nini kami maka megati TUHAN ngelakoken tanda-tanda kuasa mabai ia ndarat i Mesir nari. Genduari TUHAN enggo nadingken kami janah ipelepasNa kami ikuasai bangsa Midian.”

¹⁴Kenca bage iperentahken TUHAN si Gideon nina, “To pakelah gegehndu si mbelin e guna mulahi bangsa Israel i bas kuasa bangsa Midian nari. Aku jine kap si nuruh kam.”

¹⁵Nina Gideon njabapsa, “Tapi kuga banci kubebasken Israel? Terpukku kap si la megegehna i bas suku Manase, janah aku si la mehergana i bas keluarga bapangku.”

¹⁶Ijabap TUHAN nina, “Banci idahikenndu e erkiteken Aku si nampati kam. Murah pagi iakapndu ngeripukken bangsa Midian e, tempa-tempa bagi ngeripukken sekalak jelma saja ngenca.”

¹⁷Nina Gideon, “Adi ngena atendu aku, bereken dage tandana man bangku maka Kam tuhu-tuhu TUHAN.

¹⁸Ola Kam dage lebe lawes seh kubaba ku adepenNdu sada persembahen pangan.” Nina TUHAN, “Kutimai kam seh kam mulihken ku jenda.”

¹⁹E maka lawes Gideon ku rumahna; itasakkenna kambing nguda janah ibuatna sepuluh kilo tepung guna erbahan roti si la tama ragi. Itamana daging e ku bas raga janah kuahna tare kudin, jenari ibabana kerina man malekat TUHAN i teruh batang kecing e, iberekenna man bana.

²⁰Isuruh malekat e Gideon nina, “Tamaken daging ras roti e i babo batu enda, jenari kuahi.” Ilakoken Gideon bagi si isuruh malekat e.

²¹E maka ijaka ras ikuit malekat TUHAN daging ras roti e alu ujung ciken si icikepna. Ndarat api i bas batu e nari janah itutungna daging ras roti e. Kenca bage lanai teridah malekat ndai.

²²Jenari ieteh Gideon maka si idahna e malekat TUHAN kap. E maka nina i bas kebiaren, “TUHAN si Mada Kuasa! Enggo kuidah malekatNdu petala-tala!”

²³Tapi nina TUHAN man bana, “Dame man bandu. Ola mbiar. Kam labo mate.”

²⁴Ipajekken Gideon batar-batar ingan ersembah i je janah ibanna gelarna “TUHAN e me Dame” (Batar-batar persembahen e pajek denga i Opra; empuna e me terpuk Abieser).

²⁵I bas berngi e ngerana TUHAN man Gideon nina, “Buat sada jenggi lembu sikerajangen bapandu ras jenggi lembu si deban umur pitu tahun; runtuhken batar-batar persembahen Baal sikerajangen bapandu, tabah tanda berhala Asera si lit i deherna.

²⁶Pajekken batar-batar si paguh man TUHAN Dibatandu i babo gun-gunen. Kenca bage buat lembu si peduaken, tutung kerinana jadi sada persembahen. Tanda Asera si tabahndu e bahan jadi rantingna.”

²⁷E maka idilo Gideon sepuluh kalak suruh-suruhenna, guna ngelakoken kai si enggo ikataken TUHAN man bana. Mbiar ia man keluargana ras man kalak kuta ngelakoken si e suari, e maka berngi idahikenna.

²⁸Kenca medak kalak kuta e erpagi-pagi, ijumpaina batar-batar persembahen man Baal ras tanda Asera enggo iruntuhken, janah lembu si peduaken ndai enggo itutung i babo batar-batar persembahen man TUHAN si enggo ipajekken i je.

²⁹Sisungkun-sungkunen ia sapih-sapih ia, “Ise erbanca enda?” Iselidiki kalakna, itehna maka Gideon anak Joas si ngelakokenca e.

³⁰E maka nina man Joas, “Baba anakdu e ndarat gelah ibunuh kami. Ia si ngeruntuhken batar-batar Baal ras nabah tanda Asera si lit i deher batar-batar e.”

³¹Tapi nina Joas man kerina kalak si ngkelewetti ia, “Ikapitindu kin atendu Baal? Atendu nampatisa? Ise si ngkapiti Baal la banci lang ibunuh ope denga erpagi-pagi. Adi payo kin Baal e dibata pelepas isampatina bana. Batar-batarna kap si enggo iruntuhken e.”

³²E maka mulai i jenari Gideon terberita gelarna Jerubaal erkiteken nina Joas, “Pelepas Baal nampati bana. Batar-batarna kap si enggo iruntuhken.”

³³E maka kerina bangsa Midian, bangsa Amalek ras suku-suku si ringan i gurun pasir pulung kerina. Ras-ras ia ngepari Lau Jordan janah erkemah i Baluren Jesreel.

³⁴Kesah TUHAN ngkuasai Gideon, e maka iembusna terompet ngelebuh jelma i bas terpuk Abieser gelah ngikutken ia.

³⁵Itenahkenna berita ku kerina daerah Manase ngelebuhsa guna ngikutken ia. Itenahkenna berita man suku Aser, Sebulon, ras Naptali, e maka kalak enda pe reh nampati ia.

³⁶E maka nina Gideon man Dibata, “Nindu maka enggo itetapkenNdu aku mbebasken Israel.

³⁷Genduari kuamparken sitik mbulu biri-biri i babo taneh i bas ingan kami ngerik gandum. Adi erpagi-pagi e i babo mbulu biri-biri e ngenca lit embun, tapi la lit i babo taneh, e maka enggo kueteh maka ipakeNdu ateNdu aku mbebasken Israel.”

³⁸Payo jadi bage. Sanga Gideon medak erpagi-pagi, iperehna mbulu biri-biri e janah sanga iperehna e ndarat lau i jenari dem sada mangkuk.

³⁹E maka nina Gideon man Dibata, “Ola ateNdu nembeh man bangku. Berelah aku ngerana sekali nari. Berelah maka kuuji sekali nari. Sekali enda bere lah maka kerah mbulu biri-biri e janah taneh litap.”

⁴⁰I bas berngi e ibahan Dibata pas bagi si ipindo Gideon. Pepagina erpagi-pagi kerah mbulu biri-biri e, tapi taneh litap perban embun.