Read Batak Karo HAKIM-HAKIM 7 Bible Online

HAKIM-HAKIM 7 - Batak Karo bible

HAKIM-HAKIM 7

¹I bas sada wari Gideon ras kerina anak buahna medak lampas erpagi-pagi, janah erkemah i tepi Ulu Lau Harod. Bangsa Midian erkemah arah Utara ingan kalak enda i bas baluren deherken Uruk More.

²Nina TUHAN man Gideon, “Nteremsa Kuakap kalak ras kam. Adi nteremsa labo Kubere ia menang ngelawan Midian. Banci jadi iakapna maka ia menang erkiteken gegehna jine, e maka la iberekenna man bangKu kehamaten.

³E maka momokenlah, ‘Ise mbiar mulih saja ku rumah janah kami tading i Deleng Gileat enda.’ ” E maka dua puluh dua ribu kalak mulihken, tapi lit tading sepuluh ribu kalak. [8†]

⁴Kenca bage nina TUHAN man Gideon, “Nteremsa denga si ngikut ras kam. Baba ia ku lau e, gelah Kupilihi ia i je man bandu. Adi Kukataken maka ia ikut ras kam, ia ikut. Adi kukataken maka la ia ikut ras kam, la ia ikut.”

⁵Ibaba Gideon kalak enda ngincuah ku lau e, e maka nina TUHAN man bana, “Serapkenlah kalak si minem lau alu dilahna bali ras biang, i bas kalak si deban nari si minem alu erjimpuh.”

⁶Lit telu ratus kalak si minem alu njaruk lau alu tanna e maka idilatna; kerina si deban erjimpuh ia minem.

⁷Nina TUHAN man Gideon, “Aku mulahi kam, janah Kubereken man bandu kemenangen ngelawan bangsa Midian alu telu ratus kalak si ndilati lau e. Suruh si debanna mulih ku rumah.”

⁸Isuruh Gideon kerina bangsa Israel mulihken ku rumah, seakatan si telu ratus kalak e, si ncikep bekal ras terompet. Bangsa Midian erkemah bernehen kalak enda i bas baluren e.

⁹Berngi e iperentahken TUHAN si Gideon, “Kekeken, peranglah perkemahen e. Aku merekenca man bandu kemenangen.

¹⁰Tapi adi mbiar kam ngelawansa, ngincuah kam ku perkemahen e ras suruh-suruhenndu Pura.

¹¹Ibegindu kari kai sangana icakapken bangsa Midian e, janah kenca si e kari lanai kam mbiar merangsa.” E maka ngincuah Gideon ras suruh-suruhenna Pura ku tepi perkemahen musuh e.

¹²Bangsa Midian, bangsa Amalek, ras suku-suku kalak si ringan i gurun pasir e, merap i baluren e desken labang teremna, janah untana bali buena ras kersik i tepi lawit.

¹³Sanga Gideon seh i je, ibegina sekalak dilaki nuriken nipina kempak temanna. Nina, “Ernipi aku maka lit sengkibul roti cimpa jaba megulang ku inganta erkemah enda, janah itendengna sada kemah. Runtuh kemah e janah enggo gepa ku taneh.”

¹⁴Temanna njabapsa nina, “Pedang Gideon anak Joas kap e, kalak Israel e! Lanai banci lain asang si e. Dibata enggo mereken kemenangen man bangsa Israel ngelawan bangsa Midian ras kerina tenteranta!”

¹⁵Kenca enggo ibegi Gideon kerna nipi e janah kai ertina, erjimpuh ia nembah man Dibata. E maka mulih ia ku perkemahen bangsa Israel janah nina, “Kekeken! Dibata enggo mereken kemenangen man bandu ngelawan tentera bangsa Midian!”

¹⁶Ibagina tenterana si telu ratus kalak e jadi telu terpuk, janah iberekenna sada terompet ras sada obor i bas guci man tep-tep kalak.

¹⁷Nina Gideon man bana kerina, “Kenca enggo aku seh i tepi perkemahen e pepayo aku, janah lakoken bagi si kulakoken.

¹⁸Kenca aku ras terpukku ngembus terompet, e maka iembusndu ka terompetndu kelewet perkemahen e jenari ersurak, ‘Guna TUHAN ras guna Gideon!’ ”

¹⁹Gideon ras temanna si seratus kalak e seh i tepi perkemahen e nandangi tengah berngi, pas kal kenca pertukaren jaga malam. E maka iembus kalak enda terompetna janah ipecahkenna guci si icikep-cikepna,

²⁰e maka terpuk si dua ndai pe ibahanna ka bage. Kerina ia ncikep obor alu tanna si kawes, terompet i bas tanna si kemuhen janah ersurak ia, “Pedang guna TUHAN ras guna Gideon!”

²¹Tep-tep kalak tedis i bas inganna sekelewet perkemahen e, janah kerina tentera musuh kiam janahna serko-serko.

²²Sanga anak buah Gideon ngembus terompetna, ibahan TUHAN maka tentera musuh e sitakilen alu pedangna sapih-sapih ia. Kiam tentera e kempak Saretan seh ku Bet-Sita, seh ku kuta Abel Meholah deher Tabat.

²³Kenca bage ilebuh me dilaki-dilaki i bas suku Naptali, Aser, ras dua baginna suku Manase ngelis-ngelis bangsa Midian e.

²⁴Itenahken Gideon berita ku kerina deleng-deleng Eperaim ngataken, “Ngincuahlah ngelawan bangsa Midian. Kuasai Lau Jordan ras kerina lau anak seh ku Betbara gelah ola banci kalak Midian ngepar.” Dilo dilaki-dilaki Eperaim, gelah ijagaina Lau Jordan ras lau anak seh ku Betbara.

²⁵Itaban kalak enda dua kalak peminpin bangsa Midian, e me Oreb ras Seeb. Ibunuhna Oreb deher Batu Oreb, janah Seeb i bas ingan Mereh Anggur Seeb. Iteruskenna ngayak-ngayak bangsa Midian janah ibabana takal Oreb ras takal Seeb man Gideon si enggo berkat ku lepar Lau Jordan.