Read Batak Karo HAKIM-HAKIM 8 Bible Online

HAKIM-HAKIM 8 - Batak Karo bible

HAKIM-HAKIM 8

¹Kenca bage nina dilaki-dilaki suku Eperaim man Gideon, “Engkai maka la ilebuhndu kami sanga ngelawan bangsa Midian. Engkai maka bage perbahanenndu nandangi kami?” Jungut-jungut kal kalak enda erkiteken si e.

²Nina Gideon man kalak enda, “Kai si enggo kubahan e langa kap kai pe e ibandingken ras kai si enggo ibahanndu. Aminna sitik pe si ibahanndu o kam kalak Eperaim, ergan kap e asangken kai si enggo ilakoken kerina terpukku.

³Sabap arah gegeh Dibata enggo ibunuhndu peminpin bangsa Midian si dua e, Oreb ras Seeb. Kai kin si enggo kubahan e ibandingken ras si ibahanndu e?” Kenca ikataken Gideon e lanai ate kalak enda merawasa kal. [9†]

⁴I bas paksa e Gideon ras temanna si telu ratus kalak e enggo seh i Lau Jordan janah enggo ikeparina lau e. Enggo latih iakapna, tapi ielisna denga musuh e.

⁵Sanga ia seh i Sukot nina man kalak dilaki i bas kuta e, “Tolong bereken sitik roti man teman-temanku enda. Latih kal iakapna, janah aku sangana ngelis Sebah ras Salmuna, raja bangsa Midian e.”

⁶Tapi nina peminpin kuta Sukot, “Engkai maka ibereken kami pangan man tenterandu? Langa kap itangkapndu Sebah ras Salmuna.”

⁷E maka nina Gideon, “Merandal! Kenca iendesken TUHAN ku bas tanku Sebah ras Salmuna, Kuligas kam alu duri ras rambah gurun si erduri!”

⁸Lawes Gideon ku Penuel, janah ibahanna ka pemindonna bagi si ndai man kalak si i je. Tapi seri jabap kalak Penuel ras kalak Sukot ndai.

⁹E maka nina Gideon man kalak enda, “La banci la mulih aku ku jenda alu mejuah-juah, janah sanga si e pagi kuradasken menarandu enda!”

¹⁰Sebah ras Salmuna sangana i Karkor ras tenterana. Kerina tentera i bas suku gurun pasir e 15.000 kalak nari ngenca tading; 120.000 tentera enggo ibunuh.

¹¹Gideon erdalan gedang-gedang dalan si lit i tepi gurun pasir e arah Timur kuta Nobah ras Jogbeha, jenari rempet iserangna tentera e, sanga ia la erjaga-jaga.

¹²Kiam raja Midian si dua e, Sebah ras Salmuna, tapi ielis Gideon duana seh tertangkap, janah perbahan si e huntak kerina tenterana.

¹³Sanga mulihken Gideon i bas peperangen nari arah Dalan Heres,

¹⁴itangkapna sada anak perana anak kuta Sukot janah isungkunina. Isuratken anak perana e man Gideon pitu gelar peminpin Sukot.

¹⁵Kenca bage idahi Gideon dilaki-dilaki kalak Sukot janah nina, “Ingetndu kang sanga kam la nggit nampati aku? Ikatakenndu maka la kam nggit mereken pangan man tenterangku si sangana latih erkiteken langa kutangkap Sebah ras Salmuna. Enda endi!”

¹⁶E maka ibuat Gideon duri ras rambah gurun si erduri, ipergunakenna e ngukum peminpin kuta Sukot.

¹⁷Menara i Penuel pe iruntuhkenna janah ibunuhina kerina dilaki i bas kuta e.

¹⁸Kenca bage nungkun Gideon man Sebah ras Salmuna, “Uga kalakna dilaki si ibunuhndu i Tabor?” Nina kalak ndai njabapsa, “Seri ras kam kalakna, tep-tep kalak bali ras anak raja.”

¹⁹Nina Gideon, “Seninangku kap e, anak nandengku. Situhuna adi la min ndai ibunuhndu ia, kam pe labo kubunuh.”

²⁰E maka nina Gideon man Jeter, anakna sintua, “To bunuh kalak ah!” Tapi la isintak anak e pedangna. Mbiar ia perbahan ia danak-danak denga.

²¹Perbahan e nina Sebah ras Salmuna man Gideon, “Mari, kam saja munuh kami, sabap dilaki nge maka ngasup ngelakoken pendahin dilaki.” E maka ibunuh Gideon Sebah ras Salmuna janah ibuatna perhiasen si lit i kerahung untana.

²²Kenca bage nina bangsa Israel man Gideon, “Kamlah jadi pemerentah kami, kam ras sinursurndu, sabap enggo iselamatkenndu kami i bas bangsa Midian nari.”

²³Nina Gideon njabapsa, “Aku ras anakku la banci jadi pemerentahndu. TUHAN kap pemerentahndu.”

²⁴Tapi nina Gideon ngumputisa, “Lit sada pemindonku man bandu. Tep-tep kalak kam mereken man bangku anting-anting si enggo ibuatndu.” (Kalak Midian, seri ras kalak gurun pasir si deban, ipakena anting-anting emas.)

²⁵Nina kalak e njabapsa, “Meriah kal ukur kami merekenca man bandu.” Ikimbangken kalak ndai uis e maka itamakenna ku je kerina anting-anting si enggo ibuatna.

²⁶Anting-anting emas si ialoken Gideon e menam dua puluh kilo beratna, janah e langa bengket perhiasen-perhiasen, bura ras baju raja-raja bangsa Midian, bage pe bura-bura si lit i bas kerahung untana.

²⁷Ibahan Gideon sada gana-gana i bas emas e nari janah itamakenna i kutana i Opra. Kerina bangsa Israel nadingken Dibata, janah lawes ku je nembah gana-gana e. E enggo jadi siding man Gideon ras man keluargana.

²⁸Bage me enggo italuken bangsa Israel bangsa Midian janah lanai pang kumekik pe. Negeri e dame empat puluh tahun dekahna seh Gideon mate.

²⁹Mulih Gideon ku rumahna janah i jah me ia tading.

³⁰Lit pitu puluh kalak anakna dilaki sabap melala ndeharana.

³¹I Sikem pe lit sekalak gundikna; i je lit sada anak pupusna, janah Abimelek ibahanna gelarna.

³²Gideon anak Joas mate kenca cawir metua, janah ikuburken i kuburen bapana Joas i Opra, kuta sikerajangen terpuk Abieser.

³³Kenca kematen Gideon lanai ka bangsa Israel setia man Dibata. E maka isembahna Baal. Ibahanna Baal-Perpadanen jadi dibatana,

³⁴janah lanai ingetna TUHAN Dibatana, si enggo mulahi ia i bas kerina musuh-musuh i sekelewetna nari.

³⁵La icidahkenna pe kehamatenna man keluarga Gideon kerna kerina si mehuli si enggo ibahanna nandangi Israel.