Read Batak Karo HAKIM-HAKIM 9 Bible Online

HAKIM-HAKIM 9 - Batak Karo bible

HAKIM-HAKIM 9

¹Abimelek anak Gideon lawes ku Sikem, i ja ringan kerina kade-kade nandena. Ikatakenna man keluarga nandena e

²gelah isungkunna kalak Sikem, “Apai kam pangen iperentah anak-anak Gideon si pitu puluh kalak asangken iperentah si sekalak? Ingetlah maka Abimelek e me dareh dagingndu.”

³Isingetken kade-kade nande Abimelek si enda man kalak kuta Sikem i bas gelar Abimelek, e maka iputusken kalak kuta Sikem ngikutken Abimelek erkiteken Abimelek kade-kadena.

⁴Ibereken kalak enda pitu puluh duit pirak i bas rumah pertoton Baal-Perpadanen nari,janah alu duit e iupahina kalak gutul-gutul si la terpake nemani ia.

⁵Lawes ia ku rumah bapana i Opra, janah i jah i babo sada batu ibunuhina pitu puluhna, seninana, anak Gideon. Tapi Jotam, anak Gideon si nguda cebuni, e maka la ia ibunuh.

⁶Kenca bage kerina kalak Sikem ras Betmilo pulung ras-ras, e maka lawes ia ku batang kecing i Sikem. I je itangkuhkenna Abimelek jadi raja.

⁷Kenca enggo ibegi Jotam kerna si e, lawes ia, tedis i das Uruk Gerisim janah erlebuh man kalak ndai, “Begikenlah aku, o kalak Sikem, maka ibegiken Dibata kam!

⁸Sekali jadi, pulung kerina batang kayu milih rajana. Nina man batang saitun, ‘Kamlah jadi raja kami.’

⁹Erjabap batang saitun ndai nina, ‘Adi jadi rajandu, arus kungadiken mereken minakku, si ipergunaken pehaga dibata-dibata ras manusia.’

¹⁰E maka nina batang kayu e kerina man batang ara, ‘Mari, kam me jadi raja kami.’

¹¹Tapi nina batang ara njabapsa, ‘Adi jadi rajandu, arus kungadiken erbuah si entebu.’

¹²Kenca bage nina batang-batang kayu e man batang anggur, ‘Mari kam jadi raja kami.’

¹³Tapi nina batang anggur njabapsa, ‘Adi jadi rajandu, arus aku ngadi mereken lau anggurku si erbahan meriah ukur dibata-dibata ras manusia.’

¹⁴erkiteken si e nina batang kayu e kerina man rambah duri, ‘Mari, kamlah jadi raja kami.’

¹⁵Nina batang duri njabapsa, ‘Adi tuhu kin atendu aku jadi rajandu, mari dage cilinggem i teruhku. Adi la kam nggit, ndarat api i bas dahan-dahanku si erduri nari janah itutungna batang aras Libanon.’ ”

¹⁶“E maka genduari” nina Jotam nerusken cakapna, “Tuhu-tuhu kal kin bujur ras pinter ukurndu sanga ibahanndu Abimelek jadi raja? Ihamatindu kin Gideon janah patut kin perbahanenndu man keluargana, nginget perbahanenna si mehuli e?

¹⁷Ingetlah maka bapangku erperang guna kam. Iasamkenna kesahna mulahi kam i bas bangsa Midian nari.

¹⁸Tapi genduari enggo erkusur ukurndu ilawanndu keluarga bapangku. Ibunuhndu anakna pitu puluh kalak i babo sada batu, janah erkiteken Abimelek, anak gundik bapangku, keluargandu, ibahanndu ia jadi raja Sikem.

¹⁹E maka genduari, adi bujur ras pinter kin perbahanenndu man Gideon ras man keluargana, meriahlah ukurndu ras Abimelek dingen meriahlah akapna ras kam.

²⁰Tapi adi lang ndaratlah api i bas Abimelek nari maka itutungna kalak Sikem ras Betmilo. Ndaratlah api i bas kalak Sikem ras Betmilo nari, janah itutungna Abimelek.”

²¹Erkiteken mbiar Jotam man seninana Abimelek kiam ia janah lawes ia ringan i Beer.

²²Telu tahun dekahna Abimelek merentah Israel.

²³Kenca bage ibahan Dibata maka si musuhen ia ras kalak kuta Sikem. Berontak kalak e ngelawan Abimelek.

²⁴Enda jadi gelah kejahaten Abimelek ras kalak Sikem si ngajuk ia munuh anak dilaki Gideon si pitu puluh kalak e ibalasken man bana.

²⁵Itamaken kalak Sikem kalak si nggempangi Abimelek i das uruk-uruk e, janah irampokina kasa kai si mentas arah e. Kedungenna berita kerna si enda seh man Abimelek.

²⁶Kenca bage reh Gaal, anak Ebet, ku Sikem ras senina-seninana janah erkusur ka ukur kalak Sikem man bana.

²⁷Kerina ia lawes ku peken anggurna sekalak-sekalak janah iperanina, ibahanna lau anggur, e maka erpesta ia kerina. Bengket ia ku bas inganna nembah man dewa, jenari man minem ia i je janahna numpah-numpahi Abimelek.

²⁸Nina Gaal, “Jelma si kuga kin kita kalak Sikem enda? Engkai maka sitami-tami Abimelek? Ise kin ia? Anak Gideon! Wakilna si Sebul! Tapi ngkai maka arus sitami-tami ia? Ikutkenlah ninindu Hamor si enggo majekken terpukndu!

²⁹Bicara aku siminpin bangsa enda tentu minter kuambengken Abimelek. Ningku man bana, ‘Pepulung tenterandu. Ndaratken gelah kita erperang!’ ”

³⁰Sebul si merentah kuta e, keke nembehna kenca ibegina kai si ikataken Gaal.

³¹Isuruhna piga-piga kalak persuruhen ndahi Abimelek i Aruma alu tenah, “Gaal anak Ebet ras senina-seninana enggo reh ku Sikem, janah la atena iberena kam bengket ku kuta enda.

³²E maka, kam ras anak buahndu arus lawes berngi enda jenari cebuni i mbalmbal.

³³Pepagi erpagi-pagi kenca enggo pultak matawari, keke kam, rempet serang kuta e. Jenari adi Gaal ras teman-temanna ndarat ngelawan kam, seranglah ia asa gegehndu.”

³⁴E maka berkat Abimelek ras anak buahna berngi-berngi, janah cebuni ia i darat Sikem i bas empat terpuk.

³⁵Sanga Abimelek ras anak buahna ngidah Gaal ndarat janah tedis i pintu gerbang kuta e, luar ia i bas inganna cebuni nari.

³⁶Idah Gaal kalak enda e maka nina man Sebul, “Nen adah! Lit nterem jelma nusur i das uruk-uruk ah nari!” “Labo jelma ah,” nina Sebul ngaloi. “Awih-awih saja nge ngenca si idatas uruk ah.”

³⁷Nina ka Gaal, “Nen min ah! Lit nterem jelma nusur arah reben-reben ah, janah sada terpuk sangana reh i batang kecing pertendung ah nari arah dalan mbelin!”

³⁸Kenca bage nina Sebul man Gaal, “I ja genduari cakapndu si meganjang e? Kam kap mbarenda kalakna si nungkun, ‘Ise kin Abimelek maka arus sitami-tami ia?’ Ah kap kalakna si igombangindu mbarenda. Ndaratken, lawan dage.”

³⁹Ipinpin Gaal kalak Sikem ndarat e maka ilawanna Abimelek.

⁴⁰Tapi iayaki Abimelek ia, e maka kiam Gaal. Nterem kalak luka aminna i pintu gerbang e denga pe.

⁴¹Ingani Abimelek kuta Aruma, janah ipelawes Sebul si Gaal ras senina-seninana i Sikem nari, e maka lanai banci ia ringan i je.

⁴²Pepagina ieteh Abimelek maka kalak Sikem ku juma atena.

⁴³E maka idilona anak buahna, ibagina telu terpuk, jenari cebuni i juma nggempangisa. Sanga iidahna kalak e reh i kuta nari, ndarat ia i bas inganna cebuni nari munuh kalak e.

⁴⁴Sanga Abimelek ras terpukna pedas-pedas maju ngkawal pintu gerbang kuta, temanna terpuk si dua nari ngelawan ras munuh kerina kalak si i juma.

⁴⁵Perang e terus sada wari dekahna. Italuken Abimelek kuta e, ibunuhina kalakna, iruntuhkenna janah itamburina tanehna alu sira.

⁴⁶Kenca kerina peminpin Sikem i benteng e megi kerna si e, cebuni ia nelamatken bana ku liang-liang rumah pertoton Baal-Perpadanen.

⁴⁷Man Abimelek iberitaken maka kalak e cebuni i je.

⁴⁸E maka lawes ia ku das Uruk Salmon ras anak buahna. I jah ibuatna anak buahna gelah pedas-pedas iikutkenna perbahanenna.

⁴⁹E maka tiap kalak nektek sada dahan batang kayu, janah iikutkenna Abimelek. Ipegun-gunna kayu e i duru liang-liang e jenari icilukna si lit i bas, e maka mate kerina. Teremna si i bas benteng e lit kira-kira seribu kalak dilaki ras diberu.

⁵⁰Kenca bage lawes Abimelek ngepung kuta Tebes, janah talu ibanna kuta e.

⁵¹I je lit sada menara si paguh, e maka kerina dilaki ras diberu ras peminpin-peminpinna kiam ku das tarum.

⁵²Sanga Abimelek seh i je, iserangna atena menara e; e maka ideherina pintuna icilukna atena.

⁵³Tapi sekalak diberu ndabuhken sada batu penggilingen si galang ku takal Abimelek e maka pecah takalna. [10†]

⁵⁴E maka pedas idilona sekalak anak perana si maba senjatana janah minter iperentahkenna, “Sintak pedangndu bunuh aku. La ateku bage ikataken kalak diberu si munuh aku.” E maka itebak anak perana e ia, mate.

⁵⁵Kenca enggo idah bangsa Israel maka Abimelek enggo mate, mulih ia kerina ku rumah.

⁵⁶Alu e Dibata mbalas kejahaten Abimelek si ilakokenna man bapana i bas ia munuh pitu puluh kalak seninana.

⁵⁷Dibata pe mbalas kejahaten kalak kuta Sikem, sue ras si ibelasken Jotam anak Gideon asum isumpahina kalak.