Read Batak Karo RUT 1 Bible Online

RUT 1 - Batak Karo bible

RUT 1

¹ [1-2] Sanga paksa pemerentahen hakim-hakim i taneh Israel, jadi me kelihen mesangat. E maka Elimelek kalak Eprata ras ndeharana Naomi, bage pe anakna Mahlon ras Kilyon pindah i Betlehem i Propinsi Juda nari ku negeri Moap. Bagi kalak pertandang ia kerina ringan i jah.

³Kenca mate Elimelek, tading Naomi ras anakna si dua ndai.

⁴Duana anakna enda erjabu muat beru Moap, e me Orpa ras Rut. Kenca kira-kira sepuluh tahun dekahna ia ringan i jah,

⁵mate ka Mahlon bage pe Kilyon. E maka Naomi naring tading sisada. Enggo mbalu ia janah anakna pe lanai lit.

⁶Piga-piga dekah kenca si e, ibegi Naomi berita maka TUHAN enggo masu-masu bangsaNa alu peranin si mbuah. E maka ersikap-sikap Naomi ras permainna duana nadingken negeri Moap.

⁷Kenca bage berkat ia ras permainna si dua ndai ku taneh Juda. Tapi sangana i bas perdalanen nina Naomi man permainna, “Mulihkenlah kam ku jabu orang tuandu sekalak-sekalak.

⁸TUHANlah si erbahan mehuli man bandu bagi kiniulinndu man bangku bage pe man perbulangenndu ndube.

⁹Bage pe TUHAN min mereken dalan gelah banci ka kam erjabu mulihi.” Iema Naomi permainna tanda persirang-sirangenna, tapi minter nderkuh ia duana.

¹⁰Nina man bibina, “Lang bibi! Ate kami ikut ras kam ndahi bangsandu.”

¹¹Tapi nina Naomi njabapsa, “Mulihlah kam, o anakku. Man kadendu ngikutken aku? Akapndu kin banci denga aku mupusken anak dilaki si banci jadi perbulangenndu?

¹²Enggo metuasa aku guna tersereh ka. E maka mulihkenlah kam duana ku jabu orang tuandu. Aminna lit denga umpama kuakap arapen, jenari erjabu aku i bas berngi si sendah pe, janah kupupus piga-piga anak dilaki,

¹³tertimaindu denga kin seh ia mbelin? Banci kin e erbahanca maka kam la tersereh man kalak si deban? Ola bage anakku, sabap itehndu si enda la banci jadi. TUHAN enggo jadi imbangku, janah pagit kuakap ngenehen si enggo jadi man bandu.”

¹⁴Mulihken ka ia nderkuh duana. Jenari iema si Orpa bibina, mulih ia ku jabu orangtuana. Tapi si Rut iikutkenna bibina.

¹⁵Kenca bage nina Naomi man bana, “O Rut, cimbangndu Orpa enggo mulih ku bangsana ras ku dibata-dibatana. Mulihlah kam ras ia.”

¹⁶Tapi erjabap Rut nina, “Ola suruhndu aku nadingken kam bibi! Raslah kita berkat. Ku ja kam lawes, ku je aku, i ja kam ringan i je aku ringan. Bangsandu jadi bangsangku, janah Dibatandu jadi Dibatangku.

¹⁷I ja gia kam mate, i je pe aku mate, janah i je me aku ikuburken. Ersumpah aku maka TUHAN si ngukum aku alu kiniseran si mberatna adi kusirangken kam; pala kematenkin si nirangken kita duana.”

¹⁸Kenca igejap Naomi maka enggo bulat ukur Rut ngikutken ia, lanai icakapkenna terdauhen.

¹⁹Iteruskenna me duana perdalanenna seh ku Betlehem. Seh kenca ia i je minter mbar beritana i belang-belang kuta e. Diberu-diberu anak kuta e nungkun nina, “Payo kin enda si Naomi?”

²⁰Nina si Naomi ngaloi, “Olanai igelarindu aku Naomi. Maralah bahan gelarku, sabap Dibata si Erkuasa enggo mahanca pagit kegeluhenku.

²¹Nai tupung aku nadingken kuta enda melala ertangku. Tapi genduari ibaba TUHAN aku mulih, janah la lit kai pe kubaba. Engkai maka igelarindu aku Naomi adi TUHAN si Mada Kuasa enggo ngukum aku alu mereken kiniseran si pagit?”

²²Bagenda me turi-turinna kuga Naomi ras Rut beru Moap e mulih i negeri Moap nari. Tupung duana ia seh i Betlehem rembang kal sangana ibenaken peranin gandum.