Read Batak Karo RUT 2 Bible Online

RUT 2 - Batak Karo bible

RUT 2

¹Lit sekalak kade-kade Naomi, si Boas gelarna. Ia senina Elimelek ndube. Ia kalak bayak janah mehangke kalak kerina man bana.

²I bas sada wari nina Rut man bibina Naomi, “O bibi, laweslah aku lebe ku juma mumahi ruhi gandum si tading ibahan kalak si rani. Ugapa pe lit nge kari aku jumpa kalak si nggit ngaloken aku erdahin ras ia.” “Bage-bage, anakku,” nina Naomi. [1†]

³E maka berkat Rut ku juma. Iikut-ikutna kalak si rani. Ipumahina ruhi gandum si tading ibahan kalak rani. Alu la isangka-sangka, rembang kepe ia erdahin i bas juma Boas.

⁴La ndekahsa kenca si e, reh Boas i Betlehem nari ku juma njumpai kerina si erdahin i je. Iperkuankenna kerina kalak si erdahin e nina, “Mejuah-juah!” “Mejuah-juah!” nina ka kalak ndai ngaloi.

⁵Isungkun Boas mandurna nina, “Ise nge diberu enda?”

⁶Ngaloi mandur e nina, “Ia sekalak diberu bangsa Moap, si ikut ras Naomi mulih i Moap nari.

⁷Ipindona ndai gelah banci ia ngikut-ngikut kalak rani lako mumahi ruhi gandum si tading-tading. Erpagi-pagi si lampas nari kin ndai ia erdahin, janah e denga kal nge ia pekesahken kentisik i sapo.”

⁸Kenca bage nina Boas man Rut, “Bagendalah ban: Tetaplah kam i bas juma enda pepulung gandum. Erdahinlah kam ras diberu-diberu si ngemo e.

⁹Pernehen ia kerina. I ja ia rani, ras-ras kam i je. Enggo kukataken man kerina si erdahinku si dilaki maka ola kam igasgasina. Janah adi muas kam, inem saja lau si enggo isikapken si erdahin i bas guci.”

¹⁰Nembah erjimpuh Rut i lebe-lebe si Boas, ayona seh ku taneh, janah nina, “Uga maka bage kal ulina perbahanndu, aku sekalak diberu tandang-tandang?”

¹¹Erjabap Boas nina, “Enggo kubegi kerna kerina perbahanenndu man bibindu Naomi kidekah perbulangenndu mate. Kueteh maka enggo itadingkenndu nande-bapandu ras negerindu, jenari ringan kam jadi kalak pertandang i tengah-tengah bangsa si la pernah itandaindu.

¹²TUHANlah si ersimulih man bandu erkiteken perbahanenndu si mehuli e. TUHAN, Dibata nu Israellah si mereken upahndu sabap enggo ibahanndu Ia jadi sikawalndu.”

¹³Erjabap Rut nina, “Seh kal ulina perbahanenndu e man bangku. Terapul kal aku, janah ukurku pe enggo teneng, aminna gia ergangku labo lit bagi suruh-suruhenndu si deban.”

¹⁴Tupung man nina Boas kempak Rut, “Mari kita man ras-ras. Enda nakan ras gulen.” E maka kundul Rut ras kalak si rani si deban, jenari idudurken Boas man bana pangan. Kenca e man ia seh besur, janah la kerisa pe pangan ndai.

¹⁵[15-16] Kenca Rut enggo ka berkat pepulung gandum, ipersingeti Boas kerina si erdahinna nina, “Pelepas ibuati Rut gandum si tading, aminna gia i deher raden e, ola larang-larang ia. Tambah si e sanga kam ngangkati raden e tadingi deba gelah ibuatina.”

¹⁷Bage me Rut erdahin i bas juma Boas seh ben, janah kenca ierikna gandum si nipepulungna ndai menam sada ayan buena.

¹⁸Kenca bage ibabana ku rumah, icidahkenna man bibina kuga buena si nipepulungna e. Pangan si la kerisa ndube pe iberekenna man bibina.

¹⁹Nungkun Naomi man bana nina, “I ja nari datndu e kerina? I bas juma ise kam ndai erdahin? Dibatalah si masu-masu kalak si enggo nampati kam.” E maka ituriken Rut man bibina maka gelar empu juma inganna erdahin ndai e me Boas.

²⁰Nina Naomi, “TUHANlah si masu-masu ia; TUHAN tetap nehken padanNa man kalak si nggeluh ras si enggo mate.” Nina ka tole, “Ndeher denga kal perkade-kadenta ras ia. Ia me sada i bas kalak si ertanggung jawab lako pekena-kena kita.” [2†]

²¹Kenca bage nina Rut, “I babo si e, isuruhna pe aku gelah tetap pepulung gandum ras si erdahin i bas jumana seh dung peranin.”

²²Nina Naomi kempak Rut, “Tuhu anakku. Ulin kam tetap erdahin i bas juma Boas ras diberu-diberu si deban. Adi i bas juma kalak, banci jadi igasgasi kalak kam.”

²³Bage me Rut tetap erdahin ras kalak ndai kerina seh dung peranin. Janah Rut tetap tading ras bibina.