Read Batak Karo RUT 3 Bible Online

RUT 3 - Batak Karo bible

RUT 3

¹La ndekahsa nari kenca si e nina Naomi man Rut, “Arus kudarami dilaki man perbulangenndu gelah meriah iakapndu.

²Tentu ingetndu maka kita erkade-kade ras Boas. Kari berngi ngerik ia, e maka bagendalah ban.

³Ridilah kam, minaki dagingndu salu minak wangi si merim, janah pakelah uisndu si mejilena. Kenca bage dahi ia ku inganna ngerik, tapi jaga maka ola itandaina kam, seh ia enggo elah man.

⁴Pepayo i ja ia medem, janah kenca ia tertunduh, talangi cabinna, jenari pedemken arah nahena. E maka ia kari ngatakenca kai si man bahanen tole.”

⁵Ngaloi Rut nina, “Uga nindu, bage kubahan bibi.”

⁶E maka berkat Rut ku ingan pengeriken ngelakoken kerina si nikataken bibina man bana.

⁷Kenca elah man, erlayas kal ukur Boas. E maka medem ia deherken gandum si enggo ierik ndai. Manjar-anjar ideheri Rut ia, italangina cabin Boas, jenari medem ia arah nahena.

⁸I tengah berngi medak ia, janah sanga ia erkusur tersengget ia ngidah sekalak diberu medem i deherna.

⁹“Ise kam?” nina Boas. “Aku, Rut, kalak si la metunggung dat perkuah atendu,” nina ngaloi. “Kam kap kade-kade kami si banci jadi penebus kami; e maka mekuah min atendu, ibuatndu min aku jadi ndeharandu.”

¹⁰ [10-11] Nina Boas, “TUHAN si masu-masu kam.” Belinen denga icidahkenndu kekelengenndu man kade-kadendu arah perbahanenndu si genduari enda asangken si enggo ibahanndu man bibindu. Si tuhuna banci nge kam tersereh man anak perana si bayak tah musil adi bage atendu, sabap kerina anak kuta enda metehsa maka kam sekalak diberu si mehuli. E maka ola atendu aru, kerina si nikatakenndu banci kusehken.

¹²Tuhu nge aku kade-kadendu si banci jadi penebusndu, tapi lit denga sekalak si terdeheren asa aku. [3†]

¹³E maka sada berngi enda i jenda kam. Pagi erpagi-pagi kusungkun ia, nggit ntah lang ia nehken tanggung jawabna man bandu. Adi nggit ia merandal, adi lang, erpadan aku i adep-adepen TUHAN si nggeluh maka aku ertanggung jawab muat kam jadi ndeharangku. Genduari tunduhken sajalah.

¹⁴Jenari medem Rut deherken nahe Boas. Ope denga terang wari lawes Rut i jenari sabap la ate Boas ise pe metehsa maka ia enggo ijumpai Rut i bas ingan e.

¹⁵Muatna lawes nina Boas man Rut, “Baba gandum enda, timpus tare uisndu.” E maka ikuseken Boas gandum ndai ku uis Rut, menam dua ayan buena. Jenari isampatina ngangkatsa ku takal Rut. Mulih ia ku rumah, ibabana gandum ndai.

¹⁶Sehkenca i rumah isungkun bibina ia nina, “Uga nina, anakku?” E maka ituriken Rut kerina perbahanen Boas man bana.

¹⁷Nina Rut tole, “La iberena aku ngambe-ngambe mulih, e maka iberekenna gandum enda.”

¹⁸Nina Naomi man Rut, “Adi bage kin anakku, timai sajalah. Ugapa pe sendah labo ia ngadi seh idungina persoalen enda.”