Read Batak Karo 1 SAMUEL 1 Bible Online

1 SAMUEL 1 - Batak Karo bible

1 SAMUEL 1

¹Lit me sekalak dilaki ringan i Rama, i taneh deleng-deleng Eperaim gelarna Elkana; ia i bas suku Eperaim nari. Bapana Jeroham, ninina Elihu, i bas keluarga Tohu nari, sada bagin i bas terpuk Sup.

²Ndehara Elkana lit dua kalak, gelarna Hanna ras Penina. Penina lit anakna, tapi Hanna sada pe la lit.

³Tiap tahun Elkana lawes i Rama nari ersembah ras mpersembahken persembahen man TUHAN si Mada Kuasa i Silo. Paksa e, si jadi imam TUHAN i je Hopni ras Pinehas, duana anak Eli.

⁴Tep-tep kali Elkana nehken persembahen, sada bagin i bas daging e iberekenna man Penina, janah man anakna sekalak-sekalak iberekenna sada bagin.

⁵Janah aminna gia keleng kal atena man Hanna, man bana pe sada bagin ngenca iberekenna, sabap la lit ibere TUHAN pupusna.

⁶Kiduana Penina, rusur nakiti ukurna ras naling-naling ia, sabap lalap la lit ibere TUHAN pupusna.

⁷Bagenda me jadina i bas tahun ku tahun; adi lawes kenca ia kerina ku Rumah TUHAN, la banci lang seh cedana ukur Hanna ibahan Penina, seh maka tangis ia janah la nggit man kai pe.

⁸E maka isungkuni Elkana ia nina, “Hanna, ngkai maka kam tangis? Engkai maka la kam nggit man? Engkai maka bage rusurna kam erndele ate? Ma ergan iakapndu aku asa sepuluh anak dilaki?”

⁹ [9-10] I bas sada wari kenca kerina ia enggo elah man i Rumah TUHAN i Silo, keke Hanna. Seh kal atena cedana, e maka tangis ia janahna ertoto man TUHAN. Sanga si e Imam Eli sangana kundul i bas inganna deherken pintun.

¹¹Erpadan Hanna man TUHAN nina, “O TUHAN si Mada Kuasa, perdiateken min aku suruh-suruhenNdu enda! Nehenlah kesusahenku janah ingetlah aku! Ola lupaken aku! Adi iberekenNdu man bangku sekalak anak dilaki, erpadan aku maka kuendesken ia man baNdu kidekah geluhna, janah bukna ndigan pe la ipangkasna.” [1†]

¹²Hanna terus ertoto man TUHAN seh ndekah janah iperdiateken Eli biberna.

¹³Ertoto ia i bas ukurna; biberna kemuit, tapi la ibahanna ersora. E maka iakap Eli ia enggo mabuk,

¹⁴e maka nina, “Pengadi perlangkahndu si bagi kalak mabuk ena! Ngadiken minem-minem jenari pejore-jorelah ukurndu!”

¹⁵“Lang, labo aku mabuk, Bapa,” nina ngaloi. “Aku langa bo minem Bapa! Ceda kal ateku, janah aku enggo ertoto nungtungken kerina kesusahenku man TUHAN.

¹⁶Ola iakapndu aku sekalak diberu si la mehuli. Ertoto aku ndai nari bagenda sabap susah kal kuakap.”

¹⁷“Mulihlah alu dame,” nina Eli, “ibereken Dibata Israellah man bandu kai si ipindondu.”

¹⁸“Ngarap aku gelah rusur iukurkenndu si mehuli kerna aku,” nina Hanna ngaloisa. Kenca bage lawes ia, man ia, janah lanai atena ceda.

¹⁹Pepagina Elkana ras keluargana lampas keke, jenari kenca ersembah man TUHAN, mulih ia ku rumahna i Rama. Elkana ersada kula ras ndeharana Hanna, jenari ibegiken TUHAN pertoton Hanna.

²⁰E maka mehuli kulana jenari ipupusna sekalak anak dilaki. Ibahanna gelarna Samuel, sabap nina, “Man TUHAN kupindo ia.”

²¹Seh ka me paksana Elkana ras keluargana lawes ku Silo nehken persembahen tahunen man TUHAN ras nehken totona sue ras padanna.

²²Tapi sekali enda Hanna la ikut. Ikatakenna man perbulangenna nina, “Enggo kenca anakta enda ngadi minem, minter ateku kutaruhken ku Kemah TUHAN, i je ia tading kidekah geluhna.”

²³Nina Elkana ngaloi, “Bage-bage, bahanlah kai iakapndu si mehulina; i rumah dage kam seh enggo ipengadindu ia minem. TUHAN lah si erbahanca maka padanndu e banci seh.” E maka Hanna tading i rumah janah ipekena-kenana anakna e.

²⁴Kenca enggo ipengadina minem, ibabana anak e ku Silo, janahna maba sada anak lembu umur telu tahun, sepuluh kilo tepung ras lau anggur tare guci si ibahan i bas kulit nari. Ibabana Samuel si bage denga kal kitikna, ku Rumah TUHAN i Silo.

²⁵Kenca igelehna anak lembu e, ibabana anak e man Eli.

²⁶Nina Hanna man Eli, “Sentabi aku man bandu Bapa! Ingetndu denga nge aku? Aku me diberu si idahndu mbarenda tedis i jenda, ertoto man TUHAN.

²⁷Kupindo anak enda man baNa, jenari iberekenNa man bangku kai si kupindo.

²⁸E maka kuendesken ateku ia man TUHAN. Kidekah ia nggeluh, sikerajangen TUHAN ia.” Kenca bage nembah kalak enda man TUHAN i je.