Read Batak Karo 1 SAMUEL 10 Bible Online

1 SAMUEL 10 - Batak Karo bible

1 SAMUEL 10

¹Kenca bage ibuat Samuel sada botol minak saitun jenari icurcurkenna ku takal Saul iemana janah nina, “Iminaki TUHAN kam jadi raja i bangsaNa Israel. Irajaindu pagi bangsaNa janah ikawalindu bangsa e i bas kerina musuh-musuhna nari. Janah enda me tanda man bandu maka kam enggo ipilih TUHAN jadi raja i bas bangsaNa.

²Kenca itadingkenndu aku sendah, ijumpaindu kari dua kalak dilaki deher kuburen Rahel i Selsa i bas daerah Benyamin. Ikatakenna kari man bandu maka kelede si idaramindu enggo dat, e maka bapandu lanai bo aru atena kerna si e, tapi kerna kam la erngadi-ngadi ia nungkun, ‘Kai arus kubahan kerna anakku?’

³I jenari terus kam lawes seh ku batang kayu si badia i Tabor. I je jumpa kam kari ras telu kalak dilaki muatna lawes ku Betel erbahan persembahen man Dibata. Sekalak kari negu telu kambing nguda, sekalak maba si ibahan i bas kuling-kuling nari dem isin lau anggur.

⁴Ikatakenna kari mejuah-juah man bandu jenari iberekenna roti e dua ngkibul, janah la banci la ialokenndu.

⁵Kenca bage terpaksa kam berkat ku Uruk Dibata i Gibea, ingan kalak Pilisti erkemah. I kerabangen kuta simbel kam kari ras rombongen nabi-nabi i uruk persembahen e nari. Nabi-nabi e landek janah seko-serko, arah lebena erkata murdap, gendang, suling ras kulcapi.

⁶Tupung e Kesah Tuhan ngkuasai kam jenari kam ngikuti landek ras serko jenari biakndu isalihken, jadi manusia si mbaru.

⁷Kenca enggo jadi kerina si enda, lakokenlah kai saja si isuruh Dibata.

⁸Leben kam lawes asa aku ku Gilgal; i je kujumpai kam janahku erbahan persembahen tutungen ras persembahen persadan. Timailah i je pitu wari seh aku reh gelah kukataken man bandu kai si man bahanen.”

⁹Asum Saul berkat nadingken Samuel, ibereken Dibata pusuh peraten si mbaru man Saul. Janah kai si enggo ituriken Samuel man bana jadi kerina i bas wari e.

¹⁰Kenca seh Saul ras suruh-suruhenna i Gibea, sada terpuk nabi-nabi reh njumpai ia. E maka rempet ia i kuasai Kesah Dibata, jenari ikutkenna kalak ndai landek-landek ras ersurak.

¹¹Kalak si gelgel nari ngidah ia erbahan si enda, e maka nungkun-nungkun ia sapih-sapih ia nina, “Kena kai nge anak Kis e? Enggo kin Saul jadi nabi?”

¹²Sekalak dilaki si ringan i je nungkun nina, “Uga kerna nabi-nabi si deban enda? Ise kin iakapndu bapana?” Enda me bena-benana maka enggo jadi kuan-kuan, “Enggo kin Saul pe jadi nabi?” [7†]

¹³Kenca Saul dung landek-landek ras ersurak, lawes ia ku batar-batar i das uruk.

¹⁴Senina bapana ngidah Saul ras suruh-suruhenna e, e maka isungkunna ia duana nina, “I ja kam gelgel nari?” “Ndarami kelede,” nina Saul ngaloi, “janah kenca la idat kami, lawes kami ndahi Samuel.”

¹⁵“Kai nina man bandu?” nina.

¹⁶“Ikatakenna man kami maka asuh-asuhen e enggo dat,” nina Saul ngaloi, tapi la ikatakenna man bana kai si enggo ikataken Samuel kerna ia jadi raja pagi.

¹⁷Samuel ndilo bangsa e pulung ngadap TUHAN i Mispa.

¹⁸Nina Samuel man bana kerina, “TUHAN, Dibata Israel ngataken, Kubaba kam ndarat i Mesir nari janah Kuselamatken kam i bas kalak Mesir ras i bas kerina bangsa si deban si nindih kam.

¹⁹Aku kap Dibatandu, si ngkelini kam i bas kerina kesusahen ras kiniseranndu nari, tapi sendah enggo itulakndu Aku janah enggo ipindondu man bangKu gelah Kubereken man bandu sekalak raja. Adi bage kin kepe, pulunglah kam kerina i lebe-lebe TUHAN rikutken suku-suku ras terpukndu.”

²⁰Kenca bage isuruh Samuel tep-tep suku ngadap, e maka ipilih TUHAN suku Benyamin.

²¹Jenari isuruh Samuel terpuk-terpuk suku Benyamin ngadap, e maka ipilih me terpuk Matri. Kenca bage kerina dilaki i bas terpuk Matri reh ngadap, e maka Saul anak Kis terpilih. Idarami kalak ndai ia, tapi asum la ia jumpa ras Saul,

²²isungkun kalak ndai TUHAN nina, “Lit denga kin kalak si deban?” Nina TUHAN ngaloi, “Saul arah ah sangana cebuni arah pudi barang-barang.”

²³E maka kiam kalak ndai maba Saul ndarat ku tengah-tengah jelma si nterem, janah teridah man kalak ndai gedangen Saul sada takal asa kerina kalak si deban.

²⁴Ikataken Samuel man bangsa e nina, “Enda me kalak si enggo ipilih TUHAN! La lit ise pe i bas kita bagi ia.” Kerina bangsa e ersurak nina, “Mejuah-juahlah raja e!”

²⁵Kenca e iterangken Samuel man bangsa e hak-hak ras tugas sekalak raja, jenari isuratkenna i bas sada kitap, si isimpanna i bas ingan si badia. Kenca bage isuruhna kerina mulih.

²⁶Saul pe mulih ka ku Gibea. Piga-piga kalak si mbisa, si ukurna enggo ersuruh ibahan Dibata, ngarakken Saul.

²⁷Tapi lit piga-piga kalak si la erluhu ngerana nina, “I ja nge ngasup anak ah nampati kita?” Megombang ia man Saul janah la ibabana persembahen man bana.