Read Batak Karo 1 SAMUEL 11 Bible Online

1 SAMUEL 11 - Batak Karo bible

1 SAMUEL 11

¹Kira-kira sada bulan kenca si e Nahas, raja bangsa Amon mabai tenterana ngelawan Kuta Jabes i daerah Gileat jenari ikepungna kuta e. Nina kalak Jabes man Nahas, “Bahanlah sada perpadanen ras kami, maka nggit kami ngaloken kam jadi raja kami.”

²Nina Nahas, “Nggit aku erbahan perpadanen ras kam tapi alu sada surat, e me: Kupulditken matandu si kemuhen sekalak-sekalak janah alu bage mela iakap kerina bangsa Israel kubahan.”

³Nina peminpin-peminpin Jabes man bana, “Bereken kesempaten man kami pitu wari dekahna, gelah isuruh kami pertenahen ku belang-belang negeri Israel. Adi la lit ise pe si nggit nampati kami, e maka nggit kami talu man bandu.”

⁴Persuruhen e seh i Gibea i ja Saul ringan, janah kenca ituriken kalak ndai berita e tangis anak kuta e, bene pengarapenna.

⁵Rembang tupung e Saul reh i juma nari negu lembuna, jenari nungkun ia nina, “Kai jadi maka tangis kam kerina?” Ituriken kalak ndai man bana kai si ikataken persuruhen si reh i Jabes nari ndai.

⁶Kenca ibegi Saul, ikuasai Kesah Dibata ia, e maka gara atena nembeh.

⁷Ibuatna dua lembu ilapahina, jenari isuruhna persuruhen ndai maba potongen-potongen lembu e ku kerina taneh Israel alu tenah, “Ise si la ngikutken Saul ras Samuel erperang, bagenda me ibahan man lembuna!” Bangsa Israel mbiar ntah kai kari si banci ibahan TUHAN, janah kerina ia, sada pe la si tading-tading ndarat ras-ras.

⁸Ipepulung Saul kerina i Besek. Lit 300.000 kalak i Israel nari janah 30.000 i Juda nari.

⁹Ikatakenna man persuruhen si i Jabes nari nina, “Kataken man anak kutandu, maka ope denga ciger pagi ia enggo ikelini.” Kenca anak Kuta Jabes ngaloken berita e seh kal riahna ukurna.

¹⁰Jenari ikatakenna man Nahas nina, “Pagi ngendesken bana kami man bandu, jenari enggo banci ibahanndu man kami bagi ate-atendu.”

¹¹Pepagina lampas erpagi-pagi, ibagi Saul tenterana jadi telu terpuk janah kenca teridah matawari, kiam ia ku bas ingan musuh erkemah, iserangna kalak Amon. Agakna ciger ibunuhina kalak ndai. Si pulah merap kerina, sekalak-sekalak kiam nadingken temanna.

¹²Kenca bage nina bangsa Israel man Samuel, “I ja kalak si ngataken maka Saul la patut jadi rajanta? Endesken ia man kami gelah ibunuh kami ia kerina!”

¹³Tapi nina Saul, “Ise pe la banci ibunuh sendah sabap sendah kap warina TUHAN ngkelini Israel.”

¹⁴Jenari nina Samuel man bana kerina, “Ota lawes kita kerina ku Gilgal gelah simomoken sekali nari Saul jadi rajanta.”

¹⁵E maka lawes ia kerina ku Gilgal, janah i bas ingan si badia e imomokenna Saul jadi raja. Ibahan kalak ndai persembahen persadan, jenari Saul ras kerina bangsa Israel ngerayaken kejadin e alu dem keriahen.