Read Batak Karo 1 SAMUEL 14 Bible Online

1 SAMUEL 14 - Batak Karo bible

1 SAMUEL 14

¹I bas sada wari nina Jonatan man anak perana si maba senjatana, “Ota lawes kita ngepar ku perkemahen kalak Pilisti ah.” Tapi la ikataken Jonatan man Saul, bapana,

²si sanga erkemah i teruh batang galiman i Migron, la ndauh i Gibea nari; lit enem ratus tentera ras ia.

³(Imam si maba epod guna meteh sura-sura TUHAN e me Ahia, anak Ahitup senina Ikabot, anak Pinehas, kempu Eli, imam TUHAN i Silo.) La ieteh kalak ndai maka Jonatan enggo lawes.

⁴I bas baluren dalan ku Mikmas, si arus ibentasi Jonatan gelah banci seh ku ingan kalak Pilisti erkemah, lit dua batu galang njurjur i bas lingling, sada arah kawes sada arah kemuhen baluren e; sada igelari Boses janah sada nari Sene.

⁵Sada arah Utara baluren e, ngala ku Mikmas, janah sada arah Selatan, ngala ku Geba.

⁶Nina Jonatan man anak perana ndai, “Ota ngepar kita ku ingan erkemah bangsa Pilisti si perbegu ah. Mbera-mbera TUHAN nampati kita kari. Adi bage, la lit kai pe si banci ngambati Ia mereken kemenangen man banta aminna gia la kita nterem.”

⁷Nina anak perana ndai ngaloi, “Kai pe atendu ibahanndu, aku tetap ras kam.”

⁸“Merandal,” nina Jonatan. “Lawes kita ngepar janah si pediat idah kalak Pilisti kita.

⁹Adi isuruhna kita nimai ia e maka ngadi kita i bas inganta.

¹⁰Tapi adi isuruh kita lawes ndahi ia e maka berkat kita, sabap e me tandana maka TUHAN enggo mereken kemenangen man banta ngelawan ia.”

¹¹E maka ipelepasna bana idah bangsa Pilisti jenari nina bangsa e, “Nehenlah! Piga-piga kalak Heber ndarat i bas lubang inganna cebuni nari!”

¹²Jenari erlebuh ia man Jonatan ras man anak perana e nina, “Mari ku jenda! Lit si man katanken kami man bandu!” Ikataken Jonatan man anak perana ndai nina, “Ikutken aku. TUHAN enggo mereken kemenangen man Israel ngelawan kalak ah.”

¹³Nangkeng Jonatan i bas baluren e nari cirawis-cirawis ku das, janah anak perana ndai ngikut arah pudina. Iserang Jonatan kalak Pilisti, idampeskenna ku taneh, jenari reh anak perana ndai munuhisa arah pudi.

¹⁴I bas serangen si pemena e saja lit ibunuh Jonatan ras anak perana ndai kira-kira duapuluh kalak i bas ingan si belangna kira-kira seperempat hektar.

¹⁵Kerina kalak Pilisti i bas mbalmbal e lanai kal langlang biarna; pasukan si merang bage pe tentera si lit i bas kemah nggirgir perban biarna. Taneh pe mundu-undu, e maka bene kal ukurna.

¹⁶Tentera Saul si erjaga i Gibea i daerah Benyamin ngidah kalak Pilisti kiamen lanai erturi-turin.

¹⁷E maka nina Saul man tenterana, “Beligai tentera e kerina jenari pepayo ise si lanai i je.” Minter bage ibahanna janah tereteh man bana maka Jonatan ras anak perana si maba senjatana lanai i je.

¹⁸“Baba epod ena ku jenda,” nina Saul man Imam Ahia. (I bas wari e Ahia maba epod e i lebe-lebe bangsa Israel.)

¹⁹Asum Saul sangana ngerana denga ras imam e, i bas ingan erkemah kalak Pilisti si enggo guntar e, erdekahna ergejekna, e maka nina Saul man bana, “Lanai sempat nungkun TUHAN!”

²⁰Kenca bage lawes ia ras tenterana ku peperangen ngelawan bangsa Pilisti, si enggo si tampulen sapih-sapih ia perban bage enggo guntarna.

²¹Piga-piga kalak Heber si gelgel nari arah pihak kalak Pilisti janah si enggo lawes ku bas ingan erkemah e ras ia, genduari enggo ka erbalik mulihken ukurna jenari ersada ia ras Saul ras Jonatan.

²²Si debanna, si mbarenda enggo cebuni i uruk-uruk Eperaim, megi maka kalak Pilisti sangana kiamen, e maka ia pe kerina reh nggabungken bana jenari iserangna kalak Pilisti.

²³Pertempuren e terus ngepari Bet-Awen. TUHAN ngkelini Israel i bas wari e.

²⁴I bas wari e enggo kote kalak Israel perban lihena, sabap Saul alu ersumpah enggo mereken perentah nina, “Sendah, ise saja kalak si man kai gia ope denga aku erbalas man musuhku la banci lang kena sumpah.” E maka la lit ise pe si man kai pe gedang-gedang wari e.

²⁵E maka seh me ia kerina i bas sada kerangen janah melala i je tengguli.

²⁶Tuhu melala tengguli i bas kerangen ndai, tapi ise pe la lit si manca sabap mbiar ia kerina kena sumpah Saul.

²⁷Tapi la ibegi Jonatan bapana erbahan larangen man bangsa e alu sumpah, e maka ijukjukna alu ciken si ibabana, igedapkenna ujungna ku asar wani jenari ipanna tengguli ndai. Minter ergegehna akapna.

²⁸Tapi sekalak i bas ia nari ngataken, “Kerina nge kita kote perban lihena, tapi ilarang bapandu kami nina, ‘Ise si man kai gia sendah la banci lang kena sumpah.’ ”

²⁹Ngaloi Jonatan nina, “Bene me bangsanta erkite-kiteken perbahanen bapangku. Nehenlah kuga senangna dagingku kenca enggo kupan tengguli enda ndai sitik!

³⁰Ndauhkal min ndai ulin bangsanta ipelepas man nakan si ibuatna i bas musuh si italuken e. Nterem denga min ndai kalak Pilisti si banci ibunuhna!”

³¹I bas wari e talu bangsa Pilisti ibahan bangsa Israel, iperangna mulai i Mikmas nari seh ku Ayalon. Tupung e kalak Israel seh kal kotena perban lihena.

³²E maka kurang pedas akapna muati barang-barang rampasen i bas musuh e nari; ibuatna biri-biri ras lembu, minter igelehna i je, jenari ipanna dagingna ras dareh si lit denga i bas daging e.

³³Ituriken kalak man Saul, “Nehenlah, bangsa e enggo erdosa man TUHAN sabap ipanna daging ras darehna.” Isergangi Saul kalak ndai nina, “Penghianat kam! Gulingken sada batu si galang ku jenda man bangku.” [16†]

³⁴Kenca bage iperentahkenna ka tole, “Laweslah ku tengah-tengah kerina bangsa e jenari kataken man bana kerina maba lembu ras biri-birina ku jenda. Arus igelehna jenari ipanna i jenda; la banci ia erdosa man TUHAN erkite-kiteken man daging ras dareh.” E maka i bas berngi e kerina ia maba lembuna jenari igelehna i je.

³⁵Ipajekken Saul sada batar-batar man TUHAN, janah e me si pemena ipajekkenna.

³⁶Nina Saul man tenterana, “Ota kita ku berneh gelah siserang bangsa Pilisti enggo kenca berngi, sirampasi barangna seh siang erpagi-pagi, jenari sibunuh ia kerina.” “Bahanlah kai iakapndu si mehulina,” nina kalak ndai ngaloi. Tapi nina imam, “Marilah sisungkun lebe Dibata.”

³⁷E maka isungkun Saul me Dibata nina, “Banci ka nge kuserang kalak Pilisti? IberekenNdu nge man kami kemenangen?” Tapi la ijabap Dibata i bas wari e.

³⁸Kenca bage ikataken Saul man peminpin bangsa e nina, “Marilah ku jenda jenari cubaken pepayo dosa kai si enggo ilakoken sendah.

³⁹Erpadan aku i bas TUHAN si nggeluh si mereken kemenangen man Israel, maka kalak si ersalah la banci la ibunuh aminna gia ia anakku Jonatan.” Tapi ise pe la lit si pang ngerana.

⁴⁰Kenca bage nina Saul man bana kerina, “Kam kerina tedis arah ah, janah Jonatan ras aku tedis arah enda.” “Bahanlah kai akapndu mehuli,” nina kalak ndai ngaloi.

⁴¹Nina Saul man TUHAN, Dibata Israel, “TUHAN, ngkai maka la ialoiNdu penungkunenku wari enda? TUHAN, Dibata Israel, aloilah aku arah batu si badia e. Adi kesalahen e kesalahen Jonatan ntah kesalahenku, jabaplah alu Urim, tapi adi kesalahen e kesalahen bangsaNdu Israel, jabaplah alu Tumim.” Jabapna ngataken Jonatan ras Saul si ersalah, e maka bangsa e enggo terang la ersalah. [17†]

⁴²Kenca bage nina Saul, “Tentukenlah, anakku Jonatan ntah aku.” E maka Jonatan me si ituduhken.

⁴³Jenari nungkun Saul man Jonatan nina, “Kai enggo ibahanndu?” Erjabap Jonatan nina, “Enggo kupan sitik tengguli. Kuendesken diringku, aku enggo pang mate.”

⁴⁴Nina Saul man bana, “Dibata gia si ngukum aku mate adi la kam kari ibunuh!”

⁴⁵Tapi nina bangsa e man Saul, “Arus kin Jonatan ibunuh? Adi enggo idatsa kemenangen si mbelin man bangsa Israel? Lang! Erpadan kami i bas TUHAN si nggeluh maka bukna selambar pe la banci naktak i bas takalna nari. Kai si enggo ibahanna sendah e me arah penampat Dibata.” Bage me Jonatan itebusi bangsa e maka la ibunuh.

⁴⁶Kenca si e, ingadiken Saul ngayak-ngayak bangsa Pilisti, jenari mulih bangsa Pilisti ku daerahna.

⁴⁷Kenca Saul jadi raja i taneh Israel iperangna kerina musuh-musuh i japa pe: bangsa Moap, Amon, ras Edom, raja-raja Soba, ras Pilisti. I japa pe ia erperang, ia tetap menang.

⁴⁸I bas peperangen icidahkenna maka ia kalak merawa janah kalak Amalek pe ngasup ia nalukenca. Iselamatkenna bangsa Israel i bas kerina serangen nari.

⁴⁹Anak Saul si dilaki e me Jonatan, Iswi, ras Milkisua. Gelar anakna si diberu sintua e me Merap, janah si peduaken Mihal.

⁵⁰Gelar ndeharana Ahinoam, anak Ahimas; puanglima tenterana seninana sembuyak bapa, Abner, anak Ner.

⁵¹Bapa Saul e me Kis janah bapa Abner e me Ner, duana anak Abiel.

⁵²Kidekah nggeluh Saul terpaksa erperang alu mesangat ras kalak Pilisti. E maka adi jumpa ia ras kalak si mbisa ntah merawa, minter ijadikenna jadi tenterana.