Read Batak Karo 1 SAMUEL 15 Bible Online

1 SAMUEL 15 - Batak Karo bible

1 SAMUEL 15

¹Nina Samuel man Saul, “Aku kap si isuruh TUHAN nangkuhken kam jadi raja i bas bangsaNa Israel. E maka genduari begikenlah kai si ikataken TUHAN si Mada Kuasa. [18†]

²IukumNa ateNa bangsa Amalek sabap ilawan nini-ninina nai bangsa Israel tupung ia reh i Mesir nari. [19†]

³Laweslah kam merang kalak Amalek jenari kernepkenlah kai si lit i bas ia. Sada barang pe ola tadingken; bunuh kerina dilaki, diberu, anak-anak, ras si mbaru tubuh; bage pe lembu, biri-biri, unta ras kelede.”

⁴E maka idilo Saul kerina tenterana pulung jenari ipepayona kerina i Telem: Lit 200.000 tentera i Israel nari janah 10.000 i Juda nari.

⁵Kenca bage ia ras tenterana lawes ku kuta Amalek jenari igempangina i bas sada lau belin si enggo kerah.

⁶Man kalak Keni isehkenna kata pertenget sabap kalak e nai mehuli man bangsa Israel asum ia reh i Mesir nari. Nina Saul man kalak e, “Laweslah kam, tadingken kalak Amalek, gelah ola kam pagi terbunuh aku radu ras ia.” E maka lawes minter kalak Keni.

⁷Italuken Saul kalak Amalek; iperangna mulai i Hawila nari terus ku Sur, arah Timur Mesir;

⁸itabanna Raja Agak geluh-geluhen, e me kap raja kalak Amalek jenari ibunuhna kerina bangsa e.

⁹Tapi ipelepas Saul ras tenterana Agak nggeluh. Janah la ibunuhna biri-biri ras lembu si mehulina, ras barang-barang si debanna si mehuli. Barang-barang si la terpake ntah pe si la meherga saja ngenca si ikernepkenna.

¹⁰Nina TUHAN man Samuel,

¹¹“Erkadiola Aku ngangkat Saul jadi raja; enggo itadingkenna Aku janah lanai ikutkenna pedahKu.” Erkiteken si e nembeh kal ate Samuel, janah gedang-gedang berngi meseksek pemindonna man TUHAN.

¹²Pepagina lampas ia berkat njumpai Saul. Ibegina maka Saul enggo lawes ku Karmel, i ja enggo ipajekkenna sada tugu peringet-ingeten kerna dirina jine, janah kenca e enggo ka ia lawes ku Gilgal.

¹³E maka lawes Samuel ndahi Saul. Saul ngalo-ngalo ia janahna ngerana nina, “TUHAN masu-masu kam Samuel! Enggo kusehken pedah TUHAN.”

¹⁴Nungkun Samuel nina, “Engkai dage maka kubegi sora lembu ras sora biri-biri?”

¹⁵Erjabap Saul nina, “Ibuat tenterangku i bas kalak Amalek nari. Biri-biri ras lembu si mehulina la ibunuhna gelah ibahan jadi persembahen man TUHAN Dibatandu, janah si debanna e enggo keri kal ikernepken kami.”

¹⁶“Sinikken,” nina Samuel, “Kuturiken man bandu kai si ikataken TUHAN man bangku nderbi nai.” “Turiken man bangku,” nina Saul.

¹⁷Ngaloi Samuel nina, “Aminna gia iakapndu dirindu la penting, kam me kap peminpin suku-suku bangsa Israel. Itangkuhken TUHAN kam jadi raja Israel,

¹⁸jenari isuruhNa kam berkat alu perentah gelah ikernepkenndu bangsa Amalek si jahat e. IsuruhNa kam erperang seh enggo ibunuhndu ia kerina.

¹⁹Engkai dage maka la kam erkemalangen man baNa? Engkai maka kurang pedas akap kam muat barang-barang rampasen, janah erkite-kiteken si e ibahanndu si la ngena ate TUHAN?”

²⁰“Kuikutken kap kata TUHAN,” nina Saul ngaloi. “Lawes nge aku sue ras si iperentahkenNa man bangku; sanga mulih kubaba Raja Agak, janah kubunuh kerina kalak Amalek.”

²¹“Tapi la ibunuh tenterangku biri-biri ras lembu si mehulina si itabanna; si e kerina ibabana ku Gilgal enda gelah ibahan jadi persembahen man TUHAN Dibatandu.”

²²Nina Samuel, “Apai kin ulin iakap TUHAN: ngikutken kataNa ntah persembahen tutungen ras persembahen gelehen? Ulin ngikutken kataNa asangken mpersembahken biri-biri si mehulina man baNa.

²³Nimbak Tuhan bali kap jahatna ras ertendung man guru perdiwel-diwel, janah ukur meganjang bali dosana ras nembah man gana-gana. Erkiteken kam enggo ngelawan perentah Tuhan, kam pe itulakNa jadi raja.”

²⁴“Enggo tuhu aku erdosa,” nina Saul ngaloi. “La kuikutken pedah TUHAN ras ajarndu. Mbiar aku man tenterangku e maka kubahan bagi si ngena atena.

²⁵Tapi genduari alu meteruk kupindo man bandu alemilah dosangku, jenari mulihlah ras aku ku Gilgal, gelah aku nembah man TUHAN.”

²⁶“La ateku mulih ras kam,” nina Samuel njabapsa. “Itulakndu pedah TUHAN e maka enggo itulakNa kam jadi raja Israel.”

²⁷Kenca bage erkusur Samuel, lawes atena. Tapi itagangi Saul jubahna e maka merigat minter.

²⁸Nina Samuel man bana, “Enggo icaingken TUHAN kerajan Israel i bas kam nari sendah, janah iberekenNa man kalak si deban si ulin asa kam.

²⁹Dibata bangsa Israel si mulia la perguak, dingen la ngobah ukurNa erkiteken Ia labo manusia.”

³⁰“Aku enggo erdosa,” nina Saul ngaloi. “Tapi pehagandu min sitik aku i lebe-lebe peminpin rayatndu ras kerina bangsa Israel. Mulihlah ras aku kusembah TUHAN Dibatandu.”

³¹E maka mulih Samuel ras Saul ku Gilgal, jenari isembahna TUHAN.

³²Kenca bage iperentahken Samuel nina, “Baba ku jenda Raja Agak, kalak Amalek.” Reh Agak ndahi Samuel, nggirgir ia perban biarna. Rukur ia sisada, “Andiko pagitna kematen.”

³³Jenari nina Samuel man bana, “Bagi pedangndu enggo erbahan nterem nande-nande kebenen anak, bage me genduari nandendu kebenen anak.” Jenari ikeret-keret Samuel me Agak i lebe batar-batar i Gilgal.

³⁴Jenari lawes Samuel ku Rama, janah Raja Saul mulih ku rumahna i Gibea.

³⁵Ngayak Samuel mate lanai pernah idahna raja e, tapi ceda kal atena erkite-kiteken Saul. Erkadiola kal TUHAN enggo ngangkat Saul jadi raja Israel.