Read Batak Karo 1 SAMUEL 16 Bible Online

1 SAMUEL 16 - Batak Karo bible

1 SAMUEL 16

¹Nina TUHAN man Samuel, “Asa kai nari dekahna atendu ceda kerna Saul? Enggo kutulak ia jadi raja Israel. Tapi genduari buatlah minak saitun jenari laweslah ku Betlehem ndahi Isai, sabap enggo Kupilih sekalak anakna jadi raja.”

²“Uga banci kubahan si e?” nina Samuel nungkun. “Adi ibegi Saul kerna si e tentu ibunuhna aku!” Nina TUHAN njabapsa, “Babalah sada anak lembu jenari kataken maka kam reh ku je erbahan persembahen gelehen man TUHAN.

³Undang Isai ku lakon persembahen e, jenari Aku denggo ngatakenca kai si man bahanen. Tangkuhkenlah jadi raja kalak si Kutuduhken man bandu.”

⁴Minter idahiken Samuel kai si isuruh TUHAN, jenari lawes ia ku Betlehem. Peminpin-peminpin kuta e alu nggirgir reh ngalo-ngalo ia janahna nungkun, “Ma dame nge kerehenndu enda?”

⁵“Dame” nina ngaloi, “Aku reh nehken persembahen man TUHAN. Bersihkenlah dirindu jenari ikutkenlah aku.” Isai ras anakna pe isuruh mersihken dirina, jenari iundangna kerina ku bas lakon persembahen e.

⁶Kenca ia reh kerina, idah Samuel anak Isai, Eliap gelarna, jenari nina i bas ukurna, “Si enda, si tedis i jenda i bas adep-adepen TUHAN, la banci lang enda me si enggo ipilihNa.”

⁷Tapi nina TUHAN, “Ola nehen kuga gedangna ras kuga jilena rupana. La ia Kupilih, sabap pertimbangenKu la bali ras pertimbangen manusia. Adi manusia inehenna si teridah arah darat, tapi Aku Kupernehen pusuhna.”

⁸Kenca bage idilo Isai anakna Abinadap janah ibabanna ngadap man Samuel. Tapi nina Samuel, “Ia pe langa ipilih TUHAN.”

⁹Jenari ibaba Isai ka Sammah. “Lang, ia pe langa ka bo ipilih TUHAN,” nina Samuel.

¹⁰Bagenda me ibaba Isai pitu kalak anakna ngadap man Samuel. Janah nina Samuel man bana, “Lang, sekalak pe langa ipilih TUHAN ia.”

¹¹E maka nungkun Samuel nina, “Lit denga tole anakndu?” Nina Isai ngaloi, “Lit denga si nguda, tapi sangana ermakan biri-biri.” “Suruh ia reh ku jenda,” nina Samuel. “Langa banci sisehken persembahen enda adi langa ia reh.”

¹²E maka isuruh Isai kalak ngelegisa. Ia sekalak anak perana si mejile, sehat, janah matana pe mejile. Nina TUHAN man Samuel, “Enda me kalakna, tangkuhkenlah ia!”

¹³Ibuat Samuel minak saitun jenari iminakina Daud i lebe-lebe senina-seninana. Rempet Daud ikuasai Kesah TUHAN janah mulai i bas wari e nari Kesah e tetap ras ia. Kenca bage mulih Samuel ku Rama.

¹⁴Saul enggo itadingken Kesah TUHAN, janah isuruh TUHAN kesah si jahat nakiti ia.

¹⁵Nina suruh-suruhenna man bana, “Ieteh kami maka kesah si jahat si isuruh Dibata sangana nakiti kam.

¹⁶E maka o Raja, perentahkenndulah man kami suruh-suruhenndu enda, gelah idarami kami kalak sibeluh ngkuit kulcapi. Adi reh kenca kesah si jahat e banci ikuitna minter kulcapina, maka malem ka akapndu mulihken.”

¹⁷Iperentahken Saul man bana kerina, “Darami man bangku kalak si beluh engkuit kulcapi jenari baba ngadap man bangku.”

¹⁸Sekalak i bas suruh-suruhenna nari ngerana nina, “Isai i Betlehem nari, lit sekalak anakna si beluh kal ngkuit kulcapi. Ia pe sekalak si mbisa janah mejile rupana, ngasup erperang, janah seh kal beluhna ngerana, TUHAN ras ia.”

¹⁹E maka isuruh Saul piga-piga kalak persuruhen ndahi Isai guna nehken katana nina, “Suruhlah Daud anakndu si ermakan biri-biri ndahi aku.”

²⁰Isuruh Isai minter Daud ndahi Saul; isuruhna pe Daud maba sada kambing nguda, sada kelede guna maba roti, ras sada guci si ibahan i bas kuling-kuling nari, dem isin lau anggur.

²¹Reh Daud ndahi Saul janah jadi me ia sekalak suruh-suruhenna. Seh kal ate Saul ngenana man bana, e maka ipilihna Daud jadi si nganting senjatana.

²²Kenca bage itenahken Saul berita man Isai nina, “Ngena ateku Daud, e maka pelepas ia tading i jenda jadi suruh-suruhenku.”

²³Mulai jenari, adi reh kenca kesah si jahat si isuruh Dibata ndahi Saul, minter ibuat Daud kulcapi jenari ikuitna. E maka lawes kesah si jahat e ernahangna akapna, janah malem ia mulihken.